ଭୁବନେଶ୍ୱର,୧୯/୦୪: ଜେଇଇ ମେନ୍ ୨୦୨୫ ପରୀକ୍ଷା ଫଳ ପ୍ରକାଶ ପାଇଛି । ୨୪ ପରୀକ୍ଷାର୍ଥୀ ଶତ ପ୍ରତିଶତ ମାର୍କ ରଖି କୃତକାର୍ଯ୍ୟ ହୋଇଛନ୍ତି । ଓଡ଼ିଶାର ଓମ୍ ପ୍ରକାଶ ବେହେରା ଟପ୍ପର ହୋଇଛନ୍ତି । ମୋବାଇଲ୍ଠୁ ଦୂରରେ ଥିଲେ । ସେଲ୍ଫ ଷ୍ଟଡି କରୁଥିଲେ । ଦିନକୁ ପ୍ରାୟ ୮ ରୁ ୯ ଘଣ୍ଟା ପଢୁଥିଲେ । ଏବେ ଜେଇଇ ମେନ୍ରେ ଅଲ ଇଣ୍ଡିଆ ରାଙ୍କ ୱାନ୍ ହାସଲ କରିଛନ୍ତି ଭୁବନେଶ୍ୱରର ଓମ୍ ପ୍ରକାଶ ବେହେରା । ଏହି ସଫଳତା ହାସଲ କରି ସେ ଦେଶରେ ଓଡ଼ିଶାର ନାଁ ରଖିଛନ୍ତି । କଠିନ ପରିଶ୍ରମ ବଳରେ ସଫଳତା ନିଶ୍ଚିତ ମିଳେ ତାହା ପ୍ରମାଣ କରିଛନ୍ତି ଓମ୍ ।
୨୦୦୮ ଜାନୁଆରୀ ୧୨ରେ ଏକ ସାଧାରଣ ପରିବାରରେ ଓମ୍ ପ୍ରକାଶଙ୍କର ଜନ୍ମ । ତାଙ୍କ ବାପା କମଳକାନ୍ତ ବେହେରା ଓଡ଼ିଶା ପ୍ରଶାସନିକ ସେବାରେ କାର୍ଯ୍ୟରତ । ମାଆ ସ୍ମିତା ଜଣେ ଅଧ୍ୟାପିକା । ଓମ୍ଙ୍କ ପାଠପଢାର ତଦାରଖ ପାଇଁ ତାଙ୍କ ମାଆ ଚାକିରି ଜୀବନରୁ ୩ ବର୍ଷ ବ୍ରେକ୍ ନେଇଥିଲେ । କୋଟାରେ ଓମ୍ଙ୍କ ସହ ରହୁଥିଲେ । ପିଲାଟି ଦିନୁ ଜଣେ ମେଧାବୀ ଛାତ୍ର ଓ ଅସାଧାରଣ ପ୍ରତିଭାର ଅଧିକାରୀ ଥିଲେ ଓମ୍ । ଦଶମରେ ସେ ୯୨% ମାର୍କ ରଖିଥିଲେ । ଏହାପରେ କୋଟାର ଏଲନ କ୍ୟାରିୟର ଇଷ୍ଟିଚ୍ୟୁଟରେ ଭର୍ତ୍ତି ହୋଇଥିଲେ ।
୩ ବର୍ଷ ହେବ ସେଠି ଜେଇଇ ପାଇଁ ପ୍ରସ୍ତୁତି କରୁଥିଲେ । ଦିନକୁ ୮ରୁ୯ଘଣ୍ଟା ପଢୁଥିଲେ । ସବୁ ପରୀକ୍ଷା ଦେବା ପରେ କେଉଁଠି ଭୁଲ ରହିଲା ସେନେଇ ସମୀକ୍ଷା କରୁଥିଲେ । ଏବେ ୨୦୨୫ ଜେଇଇ ମେନ୍ ସେସନ୍ରେ ସେ ଓଡ଼ିଶାରୁ ଅଲ ଇଣ୍ଡିଆ ରାଙ୍କ-୧ ହାସଲ କରିଛନ୍ତି। ୩୦୦ରୁ ୩୦୦ ମାର୍କ ରଖିଛନ୍ତି । କଠିନ ପରିଶ୍ରମ, ଅନୁଶାସନ ଓ ପାଠ ପଢା ପ୍ରତି ସମର୍ପଣ ଭାବ ବଳରେ ଏହି ସଫଳତା ହାସଲ କରିଛନ୍ତି ଓମ୍ ପ୍ରକାଶ । ସେ କୁହନ୍ତି, ବାପାମାଆଙ୍କ ସମର୍ଥନ ଏବଂ ଆଶୀର୍ବାଦ ତାଙ୍କ ସଫଳତା ପଛର ମୂଳ କାରଣ। ଏହି ସଫଳତା ହାସଲ କରି ଜେଇଇ ଆଶାୟୀଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି ସେ ।
ଅଧିକ ପଢନ୍ତୁ...ଜେଇଇ ମେନ୍ ପରୀକ୍ଷା ଫଳ ପ୍ରକାଶ ,୨୪ ପରୀକ୍ଷାର୍ଥୀଙ୍କର ୧୦୦% ମାର୍କ
ଜେଇଇ ମେନ-୨୦୨୫ ରେଜଲ୍ଟ ପ୍ରକାଶ ପାଇଛି । ୨୪ ଜଣ ଛାତ୍ରଛାତ୍ରୀ ଶତ ପ୍ରତିଶତ ମାର୍କ ରଖିଛନ୍ତି । ଅର୍ଥାତ୍ ୩୦୦ରୁ ୩୦୦ ମାର୍କ ରଖଛନ୍ତି । ସେମାନଙ୍କ ମଧ୍ୟରେ ୨୨ଜଣ ଛାତ୍ର ଓ ୨ଜଣ ଛାତ୍ରୀ ରହିଛନ୍ତି । ଦୁଇଟି ସେସନ୍ରେ ୧୪,୭୫,୧୦୩ ଛାତ୍ରଛାତ୍ରୀ ପରୀକ୍ଷା ଦେଇଥିଲେ । ଓଡ଼ିଶାରୁ ଓମ୍ ପ୍ରକାଶ ବେହେରା ଟପ୍ପର ହୋଇଛନ୍ତି । ଓମ୍ ତାଙ୍କ ସଫଳତାର ଶ୍ରେୟ କୋଚିଂ ଟିଚରଙ୍କୁ ଦେଇଛନ୍ତି । ମୁମ୍ବାଇ ଆଇଆଇଟିରେ ବି-ଟେକ୍ କରିବାକୁ ସେ ଆଶା ରଖିଛନ୍ତି । ଏବେ ଜେଇଇ ଆଡଭାନ୍ସ ପାଇଁ ପ୍ରସ୍ତୁତ ହେଉଛନ୍ତି ଓମ୍ ।
