ଭୁବନେଶ୍ୱର,୨୧/୦୫: ଚା’ । ଯାହାର ଆଦର ରାସ୍ତାକଡ଼ଠୁ ପଞ୍ଚତାରକା ହୋଟେଲ ପର୍ଯ୍ୟନ୍ତ । ଧନୀ ହୁଅନ୍ତୁ କି ସାଧାରଣବର୍ଗ, ସଭିଙ୍କ ପାନୀୟ ତାଲିକାରେ ଏହାର ପ୍ରବେଶ । ଯଦି ମନ ଭଲ ନାହିଁ, ମୁଣ୍ଡ ବିନ୍ଧୁଛି କିମ୍ବା କିଛି ଖୁସି ଖବର ମିଳୁଛି ତେବେ ଆଗ ପାଟିରୁ ବାହାରୁଛି ‘ଚାଲ ଟିକେ ଚା ପିଇଦବା’ । ବିଶେଷକରି ବର୍ତ୍ତମାନ ଯୁବପିଢିଙ୍କ ପସନ୍ଦ ହେଉଛି ଚା’ । ସେଥିପାଇଁ ରାଜଧାନୀର ବିଭିନ୍ନ ସ୍ଥାନରେ ଅନେକ ଚା’ ଷ୍ଟଲ ଖୋଲିଛି । ଖାଲି ସେତିକି ନୁହେଁ ଯୁବପିଢିଙ୍କୁ ଆକର୍ଷିତ କରିବା ପାଇଁ ବିଭିନ୍ନ ଫ୍ଲେଭର ଓ ସ୍ୱାଦର ଚା’ ପ୍ରସ୍ତୁତ କରାଯାଉଛି । ଚାହିଦାକୁ ଲକ୍ଷ୍ୟକରି ଅନେକ ନିଜର ସ୍ୱତନ୍ତ୍ର ଚା’ ବ୍ୟବସାୟ କରି ବେଶ୍ ଭଲ ଟଙ୍କା ରୋଜଗାର କରୁଛନ୍ତି । ଆଜି ଅନ୍ତର୍ଜାତୀୟ ଚା’ ଦିବସ । ପ୍ରତିବର୍ଷ ମେ ୨୧ ତାରିଖକୁ ଚା’ ଦିବସ ଭାବରେ ପାଳନ କରାଯାଏ ।
ମୁଖ୍ୟତଃ ଚା’ କହିଲେ ଆମେ ୨ ପ୍ରକାର ଚା’କୁ ବୁଝିଥାଉ । ଗୋଟେ କ୍ଷୀର ମିଶା ହୋଇଥିବା ବେଳେ ଅନ୍ୟଟି ହେଉଛି ନାଲି ଚା’ । ହେଲେ ସିଆରପି ଛକ ନିକଟରେ ଥିବା ରାମ ଭାଇ ଟି ସେଣ୍ଟରରେ ମିଳିଯାଉଛି ୧୭୦ରୁ ଅଧିକ ପ୍ରକାର ଚା’ । ଯାହାର ନାମ ମଧ୍ୟ ବେଶ୍ ମଜାଦାର । ସେହିଗୁଡ଼ିକ ହେଉଛି ଲେମନ ଆଇସ୍ ଟି, ଫାଲୁଦା ଟି, ମଖନ ଚା’, ବ୍ଲାକ୍ ଚା’, ରୋଜ୍ ଚା’, ବ୍ଲୁଟି ଟି’, କେଶର ଚା’, ଇରାନ୍ ଟି’, ଦମ୍ ଟି’, ଗୁଡ୍କି ଟି’, ଜାଗିରି ଟି’ ଭଳି ଚା’ ତାଙ୍କ ଦୋକାନରେ ମିଳିଯାଉଛି । ଏହିସବୁ ଚା’ର ମୂଲ୍ୟ ୧୦ ଟଙ୍କାରୁ ଆରମ୍ଭ ହୋଇ ୨୦୦ ଟଙ୍କା ପର୍ଯ୍ୟନ୍ତ ରହୁଛି । ଯୁବପିଢ଼ି ଠାରୁ ଆରମ୍ଭ କରି ବୟସ୍କ ଲୋକଙ୍କ ପର୍ଯ୍ୟନ୍ତ ସବୁବର୍ଗଙ୍କ ଗହଳି ରାମ ଭାଇଙ୍କ ଚା’ ଦୋକାନରେ ଦେଖାଯାଏ । ବିଶେଷକରି ସନ୍ଧ୍ୟା ବେଳେ ଲୋକଙ୍କର ଗହଳି ଅଧିକ ରହିଥାଏ । ପ୍ରାୟ ୨୬ ବର୍ଷ ହେବ ଲୋକମାନଙ୍କୁ ବିଭିନ୍ନ ପ୍ରକାର ଚା’ ଚଖାଉଥିବା ରାମ ପ୍ରଧାନ କୁହନ୍ତି, ମୁଁ ପ୍ରଥମେ ସାଧାରଣ ଭାବେ ଚା’ ବିସ୍କୁଟ ବିକ୍ରି କରୁଥିଲି । ପରବର୍ତ୍ତୀ ସମୟରେ କିଛି ନୂଆ କରିବାକୁ ଇଛା ହେଲା । ସେଥିପାଇଁ ନିଜ ଦୋକାନରେ ଏତେପ୍ରକାର ଚା’ ରଖିଛି । ଏଥିପାଇଁ କୋଲକାତା ଏବଂ ହାଇଦ୍ରାବାଦ୍ରୁ ମୁଁ ପ୍ରଶିକ୍ଷଣ ନେଇଛି ।
ରାଜଧାନୀର ବିଭିନ୍ନ ଛକରେ ଥିବା ଚା’ ଦୋକାନରେ ଲୋକମାନେ ଚା ପିଇବା ସହିତ ଖଟି କରିଥାନ୍ତି । ସେହିଭଳି ଖଟି ଓ ଚା’ ପାଇଁ ବେଶ୍ ପରିଚିତ ଦୋକାନ ହେଉଛି ଜୟଦେବ ଭବନ ନିକଟରେ ଥିବା ମହାବୀର ଓମ୍ଫେଡ୍ ଚା’ । ଯେଉଁଠାରେ ନେତା ମନ୍ତ୍ରୀଙ୍କଠାରୁ ଆରମ୍ଭ କରି ସାଧାରଣ ଜନତା ପର୍ଯ୍ୟନ୍ତ ସମସ୍ତେ ଏକାଠି ହୋଇଥାନ୍ତି । ଖଟି କରୁ କରୁ କିଏ ୪ କପ୍ ଚା ପିଇଦିଏ ତ କିଏ ୫ କପ୍ । ବିଶେଷକରି ଏଠାରେ ମିଳୁଥିବା ଗୁଡ଼ ଚା ଲୋକମାନଙ୍କୁ ବେଶ୍ ପସନ୍ଦ । ଯାହାର ମୂଲ୍ୟ ୧୫ ଟଙ୍କା । ଏହି ଦୋକାନରେ କ୍ଷୀର ଚା, ଲେମନ୍ ଚା, ଅଦରକ ଚା’, ନାଲି ଚା’, ଗୁଡ଼ ଚା, ଆମରନ୍ ଟି, ଗ୍ରୀନ୍ ଟି ଭଳି ପ୍ରାୟ ୮ ରୁ ୧୦ ପ୍ରକାର ଚା ମିଳିଯାଉଛି । ଏହି ଦୋକାନରେ କାଗଜ କପ୍ ଆଦୌ ବ୍ୟବହାର କରାଯାଏ ନାହିଁ । କେବଳ ମାଟି କିମ୍ବା କାଚ କପ୍ରେ ଗ୍ରାହକମାନଙ୍କୁ ଚା’ ଦିଆଯାଇଥାଏ । ସକାଳ ସାଢ଼େ ୫ରୁ ରାତି ୧୦ଟା ଯାଏଁ ଦୋକାନ ଖୋଲାଥାଏ । ମହାବୀର ଚା’ ଦୋକନର ଦୋକନୀ ସ୍ୱରାଜ ମହାନ୍ତି କୁହନ୍ତି, ସକାଳୁ ବହୁତ ଭିଡ଼ ହୋଇଥାଏ । ଆମର ଅନେକ ଗ୍ରାହକ ପ୍ରତିଦିନ ବହୁଦୂରରୁ ନାଲି ଚା’ ଓ ଗୁଡ଼ ଚା’ ପିଇବାକୁ ଆସିଥାନ୍ତି । ବିଶେଷକରି ଆମ ନାଲି ଚା’ ରେ ଆମେ ୭ ପ୍ରକାର ମସଲା ପକାଇଥାଉ । ଚା’ ରେ ଆମେ ହାତ ତିଆରି ମସଲା ବ୍ୟବହାର କରିଥାଉ ।
