ନୂଆଦିଲ୍ଲୀ : ପାକିସ୍ତାନରେ ଥିବା ଆତଙ୍କୀଙ୍କ ବିରୋଧରେ ଚାଲି ଥିବା ଅପରେସନ ସିନ୍ଦୂରର ସଫଳତାରେ ଇସ୍ରାଏଲ ପୂରା ଖୁସି ହୋଇଛି। ସେ ଆତଙ୍କ ବିରୋଧରେ ଭାରତର ଲଢେଇରେ ମଧ୍ୟ ସଂପୂର୍ଣ୍ଣ ରୂପେ ସହଯୋଗ କରିବାକୁ ଘୋଷଣା କରିଛି। ଅପେରସନ ସିନ୍ଦୂରର ପ୍ରଶଂସା କରି ଇସ୍ରାଏଲ ଭାରତ ସହ ପ୍ରତିରକ୍ଷା ସମ୍ୱନ୍ଧକୁ ଦୃଢ କରିବାକୁ ପ୍ରତିବଦ୍ଧତାର ମଧ୍ୟ ସ୍ପଷ୍ଟ କରିଛି। ଗତ ମାସରେ ୨୨ ଅପ୍ରେଲରେ ପହଲଗାମରେ ହୋଇଥିବା ଆତଙ୍କୀ ହମଲାର ଜବାବରେ ଭାରତ ପିଓକେ ଓ ପାକିସ୍ତାନରେ ଆତଙ୍କୀ ଠିକଣା ଗୁଡ଼ିକ ଉପରେ ଅପରେସନ ସିନ୍ଦୂର ମାଧ୍ୟମରେ ଏୟାର ଷ୍ଟ୍ରାଇକ୍ କରିଥିଲା। ଏଥିରେ ୧୦୦ରୁ ଅଧିକ ଆତଙ୍କୀ ନିପାତ ହୋଇଥିଲେ। ଜୈଶ ଓ ଲସ୍କରର କ୍ୟାମ୍ପକୁ ମଧ୍ୟ ଧ୍ୱଂସ କରି ଦିଆ ଯାଇଛି।
ଇସ୍ରାଏଲର ପ୍ରତିରକ୍ଷା ମନ୍ତ୍ରଣାଳୟର ମହାନିର୍ଦ୍ଦେଶକ ମେଜର ଜେନେରାଲ (ଆରଇଏସ) ଆମିର ବାରମ୍ ଗୁରୁବାର ଭାରତର ପ୍ରତିରକ୍ଷା ସଚିବ ରାଜେଶ କୁମାର ସିଂହଙ୍କ ସହ ଫୋନରେ କଥାବାର୍ତ୍ତା ହୋଇଛନ୍ତି ଏବଂ ଆତଙ୍କବାଦ ବିରୋଧରେ ଭାରତର ଲଢେଇକୁ ଇସ୍ରାଏଲର ପୂରା ସମର୍ଥନ ଥିବା କହିଛନ୍ତି। ଏହା ବ୍ୟତୀତ , ଅପରେସନ ସିନ୍ଦୂରର ସଫଳତାର ମଧ୍ୟ ପ୍ରଶଂସା କରିଛନ୍ତି। ଉଭୟ ପକ୍ଷ ଦ୍ୱିପାକ୍ଷୀୟ ପ୍ରତିରକ୍ଷା ସମ୍ୱନ୍ଧତୁ ମଜବୁତ କରିବାକୁ ନିଜର ପ୍ରତିବଦ୍ଧତାକୁ ସ୍ପଷ୍ଟ କରିଛନ୍ତି ତଥା ରଣନୀତିକ ସହଯୋଗକୁ ଆହୁରି ମଜବୁତ କରିବା ପାଇଁ ଭବିଷ୍ୟତର ରୂପରେଖ ଉପରେ ଆଲୋଚନା କରିଛନ୍ତି।
ଏହା ପୂର୍ବରୁ, ଭାରତରେ ଇସ୍ରାଏଲର ରାଷ୍ଟ୍ରଦୂତ ରୁବେନ ଅଜାର ଇସ୍ରାଏଲର ସମର୍ଥନର ସ୍ପଷ୍ଟ କରି କହିଥିଲେ ଯେ, ଇସ୍ରାଏଲ ଭାରତର ଆତ୍ମରକ୍ଷାର ଅଧିକାରର ସମର୍ଥନ କରିଥାଏ। ଆତଙ୍କବାଦୀଙ୍କୁ ଜଣାପଡ଼ିବା ଦରକାର ଯେ ନିର୍ଦ୍ଦୋଷ ଲୋକଙ୍କ ବିରୋଧରେ ତାଙ୍କର ଜଘନ୍ୟ ଅପରାଧରୁ ରକ୍ଷା ପାଇବା ପାଇଁ ତାଙ୍କ ପାଖରେ ଲୁଚିବାର କୌଣସି ରାସ୍ତା ନାହିଁ । ଏହା ବ୍ୟତୀତ , ଭାରତର ଆଉ ଜଣେ ନିକଟତର ବନ୍ଧୁ ଭାବେ ବିଦେଶ ମନ୍ତ୍ରଣାଳୟର ପ୍ରବକ୍ତା ମାରିଆ ଜଖାରୋଭା କହିଥିଲେ ଯେ, ରୁଷ୍ ଆତଙ୍କବାଦର ସବୁ କାର୍ଯ୍ୟର କଡ଼ା ନିନ୍ଦା କରିଥାଏ ଏବଂ ଏହାର ବିରୋଧ କରିଥାଏ। ଏହି ବୈଶ୍ୱିକ ବିପଦରୁ ବର୍ତ୍ତିବା ପାଇଁ ଅନ୍ତରାଷ୍ଟ୍ରୀୟ ସଂପ୍ରଦାୟର ଏକାଠି ହେବା ଜରୁରୀ ।
