ନୂଆଦିଲ୍ଲୀ: ଇସ୍ରାଏଲର ସୋରୋକା ହସ୍ପିଟାଲ ଏବଂ ଷ୍ଟକ୍ ଏକ୍ସଚେଞ୍ଜକୁ କ୍ଷେପଣାସ୍ତ୍ର ଆକ୍ରମଣରେ ଉଡ଼ାଇ ଦିଆଯିବା ପରେ, ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନିଙ୍କ ଏକ ବଡ଼ ବୟାନ ଏବେ ସାମ୍ନାକୁ ଆସିଛି। ଖାମେନି ତାଙ୍କ X ଆକାଉଣ୍ଟରେ ଦେଶବାସୀଙ୍କୁ ସମ୍ବୋଧିତ ଏକ ପୋଷ୍ଟରେ କହିଛନ୍ତି ଯେ "ଯଦି ତୁମେ ଶତ୍ରୁକୁ ଭୟ କର, ତେବେ ସେମାନେ କେବେବି ତୁମକୁ ଛାଡିବେ ନାହିଁ।" ଅନ୍ୟପକ୍ଷରେ, ଇସ୍ରାଏଲ ଇରାନର ଏହି ଆକ୍ରମଣକୁ ନେଇ ଏବେ ପ୍ରତିଶୋଧ ଆଡକୁ ମୁହାଁଇଛି । ଇସ୍ରାଏଲ ଖାମେନିଙ୍କ ଅସ୍ତିତ୍ୱକୁ ପୋଛି ଦେବାକୁ ପ୍ରତିଜ୍ଞା କରିଛି।

ଖାମେନି ପୋଷ୍ଟରେ ଲେଖିଛନ୍ତି,"ମୁଁ ମୋର ପ୍ରିୟ ରାଷ୍ଟ୍ରକୁ କହିବାକୁ ଚାହୁଁଛି ଯେ, ଯଦି ଶତ୍ରୁକୁ ଏହା ଅନୁଭବ ହୁଏ ଯେ, ତୁମେ ସେମାନଙ୍କୁ ଭୟ କର, ତେବେ ସେମାନେ କେବେବି ତୁମକୁ ଛାଡିବେ ନାହିଁ। ତୁମେ ଏପର୍ଯ୍ୟନ୍ତ ଯେଉଁ ସାହସ ଏବଂ ଆଚରଣ ଦେଖାଇଛ, ଭବିଷ୍ୟତରେ ମଧ୍ୟ ସମାନ ଦୃଢ଼ତାର ସହିତ ଏହାକୁ ଜାରି ରଖିବା ଉଚିତ୍ । ସାହସ ଏବଂ ଶକ୍ତିର ସହିତ ନିଜ ସ୍ଥିତିରେ ଦୃଢ଼ ରୁହ।" ଖାମେନିଙ୍କ ଏହି ବୟାନ ଦର୍ଶାଉଛି ଯେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଧମକ ଏବଂ ଇସ୍ରାଏଲର ଆକ୍ରମଣ ସତ୍ତ୍ୱେ, ଇରାନ ଆତ୍ମସମର୍ପଣ କରିବାକୁ ଇଛା କରୁନାହିଁ । ଇରାନ ଇସ୍ରାଏଲ ଉପରେ ଦ୍ରୁତ ଆକ୍ରମଣ କରି ପ୍ରମାଣ କରିବାକୁ ଚେଷ୍ଟା କରିଛି ଯେ, ସେ କାହାକୁ ଭୟ କରେ ନାହିଁ।

ସୋରୋକା ହସ୍ପିଟାଲ ଏବଂ ଇସ୍ରାଏଲୀ ଷ୍ଟକ୍ ଏକ୍ସଚେଞ୍ଜ ଉପରେ ଇରାନର ଘାତକ କ୍ଷେପଣାସ୍ତ୍ର ଆକ୍ରମଣରେ ଇସ୍ରାଏଲର ଆକ୍ରୋଶ ବୃଦ୍ଧି ପାଇଛି । ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କାଟଜ କହିଛନ୍ତି ଯେ "ଖାମେନି ଆଉ ରହିବା ଉଚିତ୍ ନୁହେଁ"। କାରଣ ଇରାନ ଏକ କ୍ଷେପଣାସ୍ତ୍ର ଆକ୍ରମଣରେ ଏକ ଇସ୍ରାଏଲୀ ହସ୍ପିଟାଲକୁ ଟାର୍ଗେଟ କରିଛି।