ତେହେରାନ: ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ସଂଘର୍ଷ ମଧ୍ୟରେ ପୁଣି ଏକ ନୂଆ ମୋଡ଼ ଆସିଛି। ବିଶ୍ଳେଷକମାନେ ଏକ ନୂଆ ତଥ୍ୟ ରଖି କହିଛନ୍ତି ଯେ ଇରାକରେ ପ୍ରାୟ ୨୦ଟି ନୂଆ ବିପ୍ଲବି ସଙ୍ଗଠନ ମୁଣ୍ଡ ଟେକିବା ଆରମ୍ଭ କଲାଣି। ଯେଉଁମାନେ ଏହି ଆଞ୍ଚଳିକ ଉତ୍ତେଜନାରେ ଗୁରୁତ୍ୱପୂର୍ଣ୍ଣ ଭୂମିକା ନେଇପାରନ୍ତି। ଏହା ସହିତ, ଇରାନର ନିର୍ବାସିତ ରାଜକୁମାର ରେଜା ପହଲଭୀ ଦାବି କରିଛନ୍ତି ଯେ ଇରାନର ଇସଲାମିକ ରିପବ୍ଲିକ ସରକାର ପତନର ପଥରେ ଅଛି।
ବିଶ୍ଳେଷକମାନଙ୍କ ମତରେ, ଇରାକରେ ଦେଖା ଦେଇଥିବା ଏହି ୨୦ଟି ସଙ୍ଗଠନ ମଧ୍ୟରୁ କେତେକ ସଶସ୍ତ୍ର ଗୋଷ୍ଠୀ ମଧ୍ୟ ରହିଛନ୍ତି। ଯେଉଁମାନେ ଇରାନ ବା ଇସ୍ରାଏଲ ସହ ସମ୍ପର୍କ ରଖି କାର୍ଯ୍ୟ କରିପାରନ୍ତି। ଏହି ଗୋଷ୍ଠୀଗୁଡ଼ିକ ଇରାକର ରାଜନୈତିକ ଏବଂ ସାମରିକ ପରିସ୍ଥିତିକୁ ଆହୁରି ଜଟିଳ କରିପାରନ୍ତି। ଇରାନର ପ୍ରଭାବ ଥିବା ଶିଆ ମିଲିସିଆ ଗୋଷ୍ଠୀ ଏବଂ ଅନ୍ୟ ସ୍ୱାଧୀନ ସଙ୍ଗଠନମାନଙ୍କ ମଧ୍ୟରେ ମତଭେଦ ମଧ୍ୟ ଦେଖାଦେଇଛି, ଯାହା ଆଞ୍ଚଳିକ ସ୍ଥିରତା ପାଇଁ ବିପଦ ସୃଷ୍ଟି କରିଛି।
ଇରାନର ଶେଷ ସାହା(ରାଜା)ଙ୍କ ପୁଅ ହେଉଛନ୍ତି ରେଜା ପହଲଭୀ। ତେବେ ୧୯୭୯ ମସିହାରେ ଇରାନରେ ହୋଇଥିବା ଇସଲାମିକ ବିପ୍ଳବ ପରେ ତାଙ୍କୁ ଦେଶରୁ ନିର୍ବାସିତ କରିଦିଆ ଯାଇଥିଲା। ସେ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ଭିଡିଓ ବାର୍ତ୍ତା ଜାରି କରି ଦାବି କରିଛନ୍ତି ଯେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇ "ଭୟଭୀତ ଲୋକଙ୍କ ପରି ଲୁଚି ରହିଛନ୍ତି" ଏବଂ ସରକାର ଉପରୁ ନିଜ ନିୟନ୍ତ୍ରଣ ହରାଇଛନ୍ତି। ସେ ଇରାନୀ ନାଗରିକ ଏବଂ ସୈନ୍ୟମାନଙ୍କୁ ଏକଜୁଟ ହୋଇ ସରକାରକୁ ଉତ୍ଥାନ କରିବାକୁ ଆହ୍ୱାନ ଦେଇଛନ୍ତି। ପହଲଭୀ ଆହୁରି ମଧ୍ୟ କହିଛନ୍ତି ଯେ, "ଇସଲାମିକ ରିପବ୍ଲିକର ଅନ୍ତ ହୋଇଛି, ଏହା ଅପରିବର୍ତ୍ତନୀୟ। ଏବେ ଇରାନକୁ ପୁନରୁଦ୍ଧାର କରିବାର ସମୟ ଆସି ଯାଇଛି।"
ଇସ୍ରାଏଲ ଶୁକ୍ରବାର ଦିନ ଇରାନରେ ଥିବା ବିଭିନ୍ନ ପରମାଣୁ ଅବସ୍ଥାନ ଏବଂ ସାମରିକ ଆଡ୍ଡାଗୁଡ଼ିକ ଉପରେ ବଡ ଧରଣର ବିମାନ ଆକ୍ରମଣ ଆରମ୍ଭ କରିଥିଲା। ଇରାନର ପରମାଣୁ ଅସ୍ତ୍ର ବିକାଶର ପ୍ରୟାସ କରୁଛି ବୋଲି ଅଭିହିତ କରି ଇସ୍ରାଏଲ ଏହି ଆକ୍ରମଣ କରିଥିଲା। ଇରାନ ଏହି ଅଭିଯୋଗକୁ ଖଣ୍ଡନ କରିବା ସହ ଦେଶ ଶାନ୍ତିର ପଥରେ ଥିବା ନେଇ ଘୋଷଣା କରିଛି। ଇସ୍ରାଏଲର ଆକ୍ରମଣରେ ଇରାନର ଉଚ୍ଚ ସାମରିକ ଅଧିକାରୀ ନିହତ ହୋଇଥିବା ରିପୋର୍ଟ ମିଳିଛି। ଏହାର ଜବାବରେ ଇରାନ ମଧ୍ୟ ଇସ୍ରାଏଲ ଉପରେ ହାଇପରସୋନିକ ମିସାଇଲ ନିକ୍ଷେପ କରିଛି। ଯାହା ତେଲ ଆଭିଭ ଏବଂ ହାଇଫା ପରି ସହରଗୁଡ଼ିକୁ ଟାର୍ଗେଟ କରିଛି।
ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ "ନିଃସର୍ତ୍ତ ଆତ୍ମସମର୍ପଣ" କରିବାକୁ ଚେତାବନୀ ଦେଇଛନ୍ତି ଏବଂ ଦାବି କରିଛନ୍ତି ଯେ ଆମେରିକା ଇରାନର ଆକାଶ ମାର୍ଗରେ ପୂର୍ଣ୍ଣ ନିୟନ୍ତ୍ରଣ ହାସଲ କରିଛି। ଟ୍ରମ୍ପ ଇସ୍ରାଏଲକୁ ସମର୍ଥନ ଜାରି ରଖିବା ପାଇଁ ନୌସେନା ଏବଂ ବିମାନ ସୁରକ୍ଷା ବଳକୁ ମଧ୍ୟପ୍ରାଚ୍ୟକୁ ପଠାଇଛନ୍ତି। ତେବେ, ଇରାନର ଉପ-ବୈଦେଶିକ ମନ୍ତ୍ରୀ ମଜିଦ ତଖତ-ରାଭାଞ୍ଚି ଚେତାବନୀ ଦେଇଛନ୍ତି ଯେ ଆମେରିକାର ସାମରିକ ହସ୍ତକ୍ଷେପ ଆଞ୍ଚଳିକ ଯୁଦ୍ଧକୁ ଆମନ୍ତ୍ରଣ କରିବ।
ଇରାକର ଶୀର୍ଷ ଶିଆ ଧର୍ମଗୁରୁ ଗ୍ରାଣ୍ଡ ଆୟାତୋଲ୍ଲା ଅଲି ସିସ୍ତାନୀ ଇରାନର ନେତୃତ୍ୱକୁ ଟାର୍ଗେଟ ନକରିବାକୁ ଚେତାବନୀ ଦେଇଛନ୍ତି। ଏନେଇ ସେ କହିଛନ୍ତି ଯେ ଏହା ସମଗ୍ର ମଧ୍ୟପ୍ରାଚ୍ୟକୁ ଅସ୍ଥିର କରିପାରେ। ରୁଷ ଏବଂ ଚୀନ ମଧ୍ୟ ଆମେରିକାର ସାମରିକ ହସ୍ତକ୍ଷେପ ବିରୋଧରେ ନିଜର ଆପତ୍ତି ଜଣାଇଛନ୍ତି।
ଇସ୍ରାଏଲ-ଇରାନ ସଂଘର୍ଷ ଏବେ ଏକ ଗୁରୁତର ଆଞ୍ଚଳିକ ସଙ୍କଟର ରୂପ ନେଇଛି। ଇରାକରେ ନୂଆ ସଙ୍ଗଠନଗୁଡ଼ିକର ଉତ୍ଥାନ ଏବଂ ଇରାନ ଭିତରେ ରାଜନୈତିକ ଅସ୍ଥିରତା ଏହି ସଂଘର୍ଷକୁ ଆହୁରି ଜଟିଳ କରୁଛି। ରେଜା ପହଲଭୀଙ୍କ ଆହ୍ୱାନ ଇରାନୀ ନାଗରିକମାନଙ୍କୁ ଏକ ନୂଆ ରାଜନୈତିକ ପରିବର୍ତ୍ତନ ଆଡ଼କୁ ପ୍ରେରଣା ଦେଇପାରେ, କିନ୍ତୁ ଏହାର ଫଳାଫଳ ଅନିଶ୍ଚିତ ରହିଛି।
