ନୂଆଦିଲ୍ଲୀ,୧୯।୬: ଆହୁରି ଭୟଙ୍କର ହେଲା ଇରାନ-ଇସ୍ରାଏଲ ଯୁଦ୍ଧ । ଘନଘନ ମିସାଇଲ୍ ମାଡ ଓ ଆକ୍ରମଣରେ ଥରୁଛି ଦୁଇ ଦେଶ। ଇରାନର କ୍ଷେପଣାସ୍ତ୍ର ମାଡ଼ରେ ଇସ୍ରାଏଲ୍ର ଡାଇମଣ୍ଡ ଏକ୍ସଚେଞ୍ଜ ସହ ଅନେକ ହସ୍ପିଟାଲ୍ କ୍ଷତିଗ୍ରସ୍ତ। ସେଠାରୁ ଧୂଆଁ ବାହାରୁଥିବାର ଦେଖିବାକୁ ମିଳିଛି। କେବଳ ସେତିକି ନୁହେଁ ଏକ ଲାଇଭ୍ କାର୍ଯ୍ୟକ୍ରମକୁ ସାମ୍ବାଧନ କଲା ବେଳେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଖାମେନି ଘୋଷଣା କରିଛନ୍ତି ଯେ ଦେଶ ଏକତାରେ ରହିଛି । ବାହ୍ୟ ଚାପ ଆଗରେ ମୁଣ୍ଡ ନୁଆଁଇବ ନାହିଁ।
ସେପେଟ ଇରାନର ଏହି ଆକ୍ରମଣର ଜୋରଦାର ଜବାବ ଦେଇଛି ଇସ୍ରାଏଲ। ଅରାକରେ ଥିବା ଇରାନର ହେଭି ଓ୍ବାଟର ରିଆକ୍ଟର ଉପରେ ହମଲା କରିଛି ଇସ୍ରାଏଲ। ଆକ୍ରମଣର କିଛି ଘଣ୍ଟା ପୂର୍ବରୁ ଇସ୍ରାଏଲୀ ସେନା ଅରାକ ଓ ଖୋଣ୍ଡବ ସହରର ଲୋକଙ୍କୁ ଅଞ୍ଚଳ ଖାଲି କରିବାକୁ ଚେତାବନୀ ଦେଇଥିଲା। ଅରାକ ଇରାନ ନ୍ୟୁକ୍ଲିଅର ପୋଗ୍ରାମର ଏକ ଗୁରୁତ୍ବପୂର୍ଣ୍ଣ ଅଂଶ। ସେଠାରୁ ବହୁପରିମାଣରେ ଅସ୍ତ୍ରଶସ୍ତ୍ର ଉତ୍ପାଦନ ହୁଏ। ଇରାନ ମଧ୍ୟ ଇସ୍ରାଏଲର ୪ ସହର ତେଲ ଅଭିଭ, ବିରସେଭା, ରମତ ଗଣ ଓ ହୋଲେନ୍ ଉପରେ ୩୦ ମିଜାଇଲ ମାଡ଼ କରିଛି। ୭ଟି ମିଜାଇଲକୁ ଇସ୍ରାଏଲ ଡିଫେନ୍ସ ସିଷ୍ଟମ ରୋକିବାରେ ସଫଳ ହୋଇଛି। ଏଥିରେ ୧୭୬ ଜଣ ଆହତ ହୋଇଛନ୍ତି। ତାଙ୍କ ମଧ୍ୟରୁ ୬ ଜଣଙ୍କ ସ୍ଥିତି ଗୁରୁତର ରହିଛି।
ସେପଟେ ଯୁଦ୍ଧଗ୍ରସ୍ତ ଇରାନରୁ ଭାରତୀୟଙ୍କୁ ସୁରକ୍ଷିତ ପ୍ରତ୍ୟାବର୍ତ୍ତନ ପାଇଁ ଆରମ୍ଭ ହୋଇଛି ଅପରେସନ ସିନ୍ଧୁ । ଇତି ମଧ୍ୟରେ ଇରାନରେ ଥିବା ଭାରତୀୟଙ୍କୁ ସ୍ବଦେଶ ଫେରାଇ ଆଣିବା ପ୍ରକ୍ରିୟା ଆରମ୍ଭ ହୋଇଛି । ତେହେରାନରୁ ପ୍ରଥମ ପର୍ଯ୍ୟାୟରେ ୧୧୦ ଭାରତୀୟଙ୍କୁ ଉଦ୍ଧାର କରି ଏକ ବିମାନ ନୂଆଦିଲ୍ଲୀରେ ଅବତରଣ କରିଛି । ଆଉ ଭାରତ ମାଟିରେ ପାଦ ଦେବା ପରେ ଭାରତ ସରକାରଙ୍କୁ ଧନ୍ୟବାଦ ଦେବା ସହ ଭାରତୀୟ ବୋଲି ନିଜକୁ ଗର୍ବ କରି ଇରାନର ଯୁଦ୍ଧ ପରିସ୍ଥିତି ବାବଦରେ ବଖାଣିଛନ୍ତି ଇରାନରେ ପଢୁଥିବା ଭାରତୀୟ ଛାତ୍ରଛାତ୍ରୀ ।
୧୩ ଜୁନ୍ରେ ଇସ୍ରାଏଲର ଆରମ୍ଭ ହୋଇଥିବା ‘ଅପରେସନ୍ ରାଇଜିଂ ଲାୟନ’ ଅନୁସାରେ ଇରାନର ପରମାଣୁ ଓ ସାମରିକ ଆଡ୍ଡା ଉପରକୁ ଏୟାରଷ୍ଟ୍ରାଇକ୍ କରିଥିଲା। ଏହାପରେ ଦୁଇ ଦେଶ ମଧ୍ୟରେ ଆରମ୍ଭ ହୋଇଥିଲା ଯୁଦ୍ଧ। ବର୍ତ୍ତମାନ ସୁଦ୍ଧା ଯୁଦ୍ଧରେ ଇସ୍ରାଏଲର ୨୪ ଜଣଙ୍କର ମୃତ୍ୟୁ ହୋଇଛି। ସେପଟେ ଇରାନରେ ଏପର୍ଯ୍ୟନ୍ତ ୬୩୯ ଜଣଙ୍କର ମୃତ୍ୟୁ ହୋଇଥିବା ବେଳେ ୧୩୨୯ ଆହତ ହୋଇଛନ୍ତି।
