ଜୟପୁର: ଟପ୍ ଅର୍ଡରର ପତନ ସତ୍ତ୍ୱେ ପଞ୍ଜାବ କିଙ୍ଗସ୍ ୨୦୦ ରୁ ଅଧିକ ସ୍କୋର କରିଛି । ନେହାଲ ୱାଧେରା ପଞ୍ଜାବ କିଙ୍ଗସ୍ ପାଇଁ ୩୭ ବଲରେ ୭୦ ରନର ଇନିଂସ ଖେଳିଛନ୍ତି । ସେ ୫ଟି ଚୌକା ଏବଂ ୫ଟି ଛକା ମାରି ଏହି ରନ୍ କରିଛନ୍ତି । ଶେଷରେ ଶଶାଙ୍କ ସିଂହ ୩୦ ବଲରେ ୫୯ ରନର ଅପରାଜିତ ଇନିଂସ ଖେଳିଛନ୍ତି । ସେ ୫ଟି ଚୌକା ଏବଂ ୩ଟି ଛକା ମାରିଛନ୍ତି। ଆଜମତୁଲ୍ଲା ଓମରଜାଇ ୯ ବଲରୁ ୨୧ ରନ୍ କରି ଅପରାଜିତ ରହିଛନ୍ତି। ଅଧିନାୟକ ଶ୍ରେୟସ ଆୟର ୨୫ ବଲରେ ୩୦ ରନର ଇନିଂସ ଖେଳିଛନ୍ତି। ଗୋଟିଏ ସମୟରେ ପଞ୍ଜାବ ମାତ୍ର ୩୪ ରନରେ ୩ ୱିକେଟ ହରାଇଥିଲା । ତଥାପି ପଞ୍ଜାବ ୨୦ ଓଭରରେ ୫ ୱିକେଟ୍ ହରାଇ ୨୧୯ ରନ୍ କରିଛି। ରାଜସ୍ଥାନ ରୟାଲ୍ସ ସାମ୍ନାରେ ୨୨୦ ରନ୍ର ବିଜୟ ଲକ୍ଷ୍ୟ ରଖିଛି ପଞ୍ଜାବ କିଙ୍ଗସ୍ ।
ସେପଟେ ରାଜସ୍ଥାନ ପକ୍ଷରୁ ତୁଷାର ଦେଶପାଣ୍ଡେ ସର୍ବାଧିକ ୨ଟି ଓ୍ବିକେଟ ନେଇଛନ୍ତି । ତାଙ୍କ ବ୍ୟତୀତ କ୍ବେନା ମଫାକା, ରିୟାନ ପରାଗ ଏବଂ ଆକାଶ ମଧଓ୍ବାଲ ଗୋଟିଏ ଲେଖାଏଁ ଓ୍ବିକେଟ ଅକ୍ତିଆର କରିଛନ୍ତି । ପ୍ରଥମେ ଟସ୍ ଜିତି ବ୍ୟାଟି କରିଥିଲା ପଞ୍ଜାବ ଟିମ୍ । ପ୍ରଥମେ ବ୍ୟାଟିଂ ବିପର୍ଯ୍ୟୟର ସାମ୍ନା କରିଥିବା ପଞ୍ଜାବ ଶେଷ ଆଡ଼କୁ ଧୂଆଁଧାର ବ୍ୟାଟିଂ ସହ ବିଶାଳ ସ୍କୋର ଛିଡ଼ା କରିଛି । ପ୍ରଭସିମରନ ସିଂହ ୨୧ ରନ୍ କରି ଆଉଟ ହୋଇଥିଲେ । ପ୍ରିୟାଂଶ ଆର୍ଯ୍ୟ ଭଲ ପ୍ରଦର୍ଶନ କରିନପାରି କେବଳ ୯ ରନ୍ କରିଥିଲେ ।
ପରେ ପରେ ନେହାଲ ଓ୍ବାଧେରା ଦଳର ସ୍କୋରକୁ ବଢ଼ାଇବାରେ ବେଶ ସହାୟକ ହୋଇଥିଲେ ।ସେ ୭୦ ରନ୍ କରିଥିଲେ । ସେହିଭଳି ଅଧିନାୟକ ଶ୍ରେୟସ ଆୟର ୩୦ ରନ୍ କରି ପାଭିଲିୟନ୍ ଫେରିଥିଲେ । ଶେଷ ଆଡ଼କୁ ଶଶାଙ୍କ ସିଂହ ଏବଂ ଆଜମତୁଲ୍ଲା ଓମରଜାଇଙ୍କ ବିସ୍ଫୋରକ ବ୍ୟାଟିଂ ରାଜସ୍ଥାନ ବୋଲରଙ୍କୁ ଅସହାୟ କରି ପକାଇଥିଲା । ୫ ଓ୍ବିକେଟ ହରାଇସାରିଥିବା ପଞ୍ଜାବ ୨୦ ଓଭର ଶେଷ ସୁଦ୍ଧା ୨୧୯ ରନ୍ ବିଶାଳ ସ୍କୋର କରିଥିଲା ।
