ନୂଆଦିଲ୍ଲୀ, ୧୮/୦୫: ଚଳିତ ଆଇପିଏଲ୍ର ୬୦ତମ ଲିଗ୍ ମ୍ୟାଚ୍ରେ ଘରୋଇ ଦିଲ୍ଲୀ କ୍ୟାପିଟାଲ୍ସ ଟେବୁଲ ଟପ୍ପର ଗୁଜରାଟ ଟାଇଟନ୍ସକୁ ଭେଟିବ । ୧୧ଟି ମ୍ୟାଚ୍ରୁ ୧୩ ପଏଣ୍ଟ ଅର୍ଜନ କରିସାରିଥିବା କ୍ୟାପିଟାଲ୍ସ ‘କର ବା ମର’ ସ୍ଥିତିରେ ରହିଛି । ପ୍ଲେ-ଅଫ୍ରେ ପ୍ରବେଶ କରିବାକୁ ହେଲେ ଦଳକୁ ବାକି ୩ଟି ଯାକ ଲିଗ୍ ମ୍ୟାଚ୍ ଜିତିବାକୁ ହେବ। ଘରୋଇ ଗ୍ରାଉଣ୍ଡରେ ଖେଳୁଥିବାରୁ କ୍ୟାପିଟାଲ୍ସ ଏହି ସୁଯୋଗକୁ ହାତଛଡ଼ା କରିବ ନାହିଁ । ଟାଇଟନ୍ସ ମଧ୍ୟ ୧୬ ପଏଣ୍ଟ ସହ ପ୍ଲେ-ଅଫ୍ ଦ୍ୱାରରେ ପହଞ୍ଚି ସାରିଛି । ଆଗକୁ ଦଳ ୩ଟି ମ୍ୟାଚ୍ ଖେଳିବ । ଅତି କମ୍ରେ ଗୋଟିଏ ମ୍ୟାଚ୍ ଜିତିଲେ ଟାଇଟନ୍ସ ପ୍ଲେ-ଅଫ୍ରେ ପ୍ରବେଶ କରିପାରିବ ।
ଗତ ଏପ୍ରିଲ ୮ ତାରିଖରେ ଧର୍ମଶାଳାର ଭୟକୁ କ୍ୟାପିଟାଲ୍ସ ଖେଳାଳି ଭୁଲି ପାରି ନାହାନ୍ତି । ପଞ୍ଜାବ କିଙ୍ଗ୍ସ ବିପକ୍ଷ ମ୍ୟାଚ୍ ବେଳେ ଭାରତ ଉପରେ ପାକିସ୍ତାନର ମିସାଇଲ ମାଡ଼ ଆତଙ୍କ ଖେଳାଇ ଦେଇଥିଲା । ଧର୍ମଶାଳା ନିକଟସ୍ଥ ପଠାନ କୋଟ୍ରେ ମିସାଇଲ ମାଡ଼କୁ ନେଇ ଖେଳକୁ ଅଧାରୁ ବନ୍ଦ କରାଯାଇଥିଲା । ଖେଳାଳିମାନଙ୍କୁ ତରବରିଆ ଭାବେ ସୁରକ୍ଷିତ ସ୍ଥାନକୁ ନିଆଯାଇଥିଲା । ପରଦିନ ଟ୍ରେନ ଯୋଗେ ଦିଲ୍ଲୀ କ୍ୟାପିଟାଲ୍ସ ଓ ପଞ୍ଜାବ କିଙ୍ଗ୍ସ ଦଳ ଦିଲ୍ଲୀରେ ପହଞ୍ଚିଥିଲେ । ଯୁଦ୍ଧ ବନ୍ଦ ହେବା ପରେ ବିଦେଶୀ ଖେଳାଳିମାନଙ୍କୁ ପୁଣି ଥରେ ଭାରତ ଫେରାଇ ଆଣିବା ପାଇଁ ସବୁ ଫ୍ରାଞ୍ଚାଇଜ୍ ବହୁ ପରିଶ୍ରମ କରିଥିଲେ । ବିଳମ୍ବରେ ହେଉ ପଛେ ପ୍ରାୟତଃ ସବୁ ବିଦେଶୀ ଖେଳାଳିଙ୍କୁ ଭାରତ ଫେରାଇ ଆଣିବାରେ ଫ୍ରାଞ୍ଚାଇଜ ସଫଳ ହୋଇଛି । ତଥାପି ମିଚେଲ ଷ୍ଟାର୍କଙ୍କ ଅନୁପସ୍ଥିତିକୁ ଦଳ ଅନୁଭବ କରିବ ।
ଗୁଜରାଟ ଟାଇଟନ୍ସର ସମସ୍ତ ଖେଳାଳି ଭାରତ ଫେରିଥିଲେ ହେଁ ପ୍ଲେ-ଅଫ୍ ବେଳକୁ କିଛି ଖେଳାଳିଙ୍କ ଅନୁପସ୍ଥିତି ଦଳକୁ ପ୍ରଭାବ ପକାଇବ । ବିଶେଷ କରି ଫର୍ମରେ ରହିଥିବା ଜୋସ ବଟଲର ଲିଗ ରାଉଣ୍ଡର ଶେଷ ୩ଟି ମ୍ୟାଚ୍ ଖେଳି ଇଂଲଣ୍ଡ ଫେରିଯିବେ । ଅବଶ୍ୟ ତାଙ୍କ ସ୍ଥାନରେ କୁଶଲ ମେଣ୍ଡିସଙ୍କୁ ଡାକରା ମିଳିସାରିଛି । ବାକି ସବୁ ବିଦେଶୀ ଖେଳାଳି ଟୁର୍ଣ୍ଣାମେଣ୍ଟ ଶେଷ ହେବା ପର୍ଯ୍ୟନ୍ତ ଦଳରେ ରହିବା ପାଇଁ ଅନୁମତି ପାଇଛନ୍ତି ।
ଦିଲ୍ଲୀ କ୍ୟାପିଟାଲ୍ସର ଭାଗ୍ୟ ସେମାନଙ୍କ ବ୍ୟାଟିଂ ବିଭାଗର ପ୍ରଦର୍ଶନ ଉପରେ ନିର୍ଭର କରିବ । କରୁଣ ନାଏର, କେଏଲ ରାହୁଲ ଓ ଫାଫ ଡୁ ପ୍ଲେସିଙ୍କ ବ୍ୟାଟ୍ରୁ ବଡ଼ ଇନିଂସ ଆଶା କରାଯାଉଛି । ଷ୍ଟାର୍କ ଦଳରେ ନଥିଲେ ମଧ୍ୟ ବୋଲିଂ ବିଭାଗ ବେଶ ସନ୍ତୁଳିତ ରହିଛି । ଜେକ ଫ୍ରେଜର-ମ୍ୟାକଗର୍କଙ୍କ ସ୍ଥାନରେ ଡାକରା ପାଇଥିବା ମୁସ୍ତାଫିଜୁର ରେହମାନ ଆଜି ଖେଳିିବା ସମ୍ଭାବନା ନାହିଁ । ତେଣୁ କେବଳ ଏକମାତ୍ର ବାମ ହାତି ପେସ୍ ବୋଲର ଟି ନଟରାଜନଙ୍କ ଉପରେ ଦଳ ନିର୍ଭର କରିବ । ବାକି ବୋଲର ସବୁ ଫର୍ମରେ ରହିଛନ୍ତି । କୁଲଦୀପ ଯାଦବ ଲୟକୁ ଫେରିଲେ କ୍ୟାପିଟାଲ୍ସର ବିଜୟ ସହଜ ହେବ ।
ଟାଇଟନ୍ସ ଦଳ ସନ୍ତୁଳିତ ରହିଥିଲେ ହେଁ ମଧ୍ୟ କ୍ରମ ବ୍ୟାଟିଂ ବିଭାଗ ଏପର୍ଯ୍ୟନ୍ତ ଚ୍ୟାଲେଞ୍ଜ ମୁଣ୍ଡାଇ ନାହାନ୍ତି । କାରଣ ଉପର ଭାଗର ୩ବ୍ୟାଟର ଶୁଭମନ ଗିଲ୍, ସାଇ ସୁଦର୍ଶନ ଓ ବଟଲର ଚମତ୍କାର ଫର୍ମରେ ରହିଛନ୍ତି । ଦଳର ବୋଲିଂ ବିଭାଗ ମଧ୍ୟ ବେଶ୍ ସନ୍ତୁଳିତ । ତଥାପି ରସିଦ ଖାନଙ୍କ ଫର୍ମକୁ ନେଇ ଦଳ ସାମାନ୍ୟ ଚିନ୍ତାରେ ରହିଛି ।
ରାହୁଲ ଆଉ ୩୩ ରନ କଲେ ଟି-ଟ୍ୱେଣ୍ଟି ଫର୍ମାଟ୍ରେ ୮୦୦୦ ରନ ପୂରଣ କରିବେ । ସେ ବିରାଟ କୋହଲିଙ୍କ ରେକର୍ଡ ଭାଙ୍ଗି ପାରିବେ । ରାହୁଲ ଓ ରସିଦଙ୍କ ମଧ୍ୟରେ ଏକ ଲଢ଼େଇ ଦେଖିବାକୁ ମିଳିପାରେ । ରାହୁଲଙ୍କୁ ରସିଦ ୪୭ଟି ବଲ୍ ପକାଇ ୪୦ ରନ ପ୍ରଦାନ କରିବା ସହ ୩ଥର ଆଉଟ୍ କରିଛନ୍ତି ।
ଅକ୍ଷର ପଟେଲଙ୍କୁ ନେଇ ଟାଇଟନ୍ସ ସ୍ପିନର ଚିନ୍ତାରେ ରହିବା ସ୍ୱାଭାବିକ । ଅକ୍ଷର ଚଳିତ ସିଜନରେ ସ୍ପିନରଙ୍କ ବିପକ୍ଷରେ ବିସ୍ଫୋରକ ବ୍ୟାଟିଂ କରିଛନ୍ତି । ସ୍ପିନରଙ୍କ ବିପକ୍ଷରେ ତାଙ୍କ ଷ୍ଟ୍ରାଇକ ରେଟ୍ ୧୯୨.୮୫ ରହିଛି ।
କୋଟଲା ଗ୍ରାଉଣ୍ଡର ପିଚ୍ ସ୍ପିନରଙ୍କୁ ବେଶ୍ ସହାୟତା କରୁଛି । ଏଠାରେ ଖେଳାଯାଇଥିବା ୪ଟି ମ୍ୟାଚ୍ରେ ସ୍ପିନରମାନେ ୨୬ଟି ୱିକେଟ୍ ନେଇଛନ୍ତି । ବ୍ୟାଟରମାନେ ମଧ୍ୟ ପିଚ୍ର ଫାଇଦା ଉଠାଇବେ । ରାତ୍ରିରେ ମ୍ୟାଚ୍ ଖେଳାଯାଉଥିବାରୁ କାକର ଯୋଗୁଁ ଦ୍ୱିତୀୟ ଭାଗରେ ବ୍ୟାଟିଂ ସହଜ ହେବ । ତେଣୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ।
ସମ୍ଭାବ୍ୟ ଦ୍ୱାଦଶ
ଦିଲ୍ଲୀ କ୍ୟାପିଟାଲ୍ସ :- ଫାଫ ଡୁ ପ୍ଲେସି, ଅଭିଷେକ ପୋରେଲ, କରୁଣ ନାଏର, କେଏଲ ରାହୁଲ, ଅକ୍ଷର ପଟେଲ (ଅଧିନାୟକ), ଟ୍ରିଷ୍ଟନ ଷ୍ଟବ୍ସ, ଆଶୁତୋଷ ଶର୍ମା, ବିପ୍ରଜ ନିଗମ, କୁଲଦୀପ ଯାଦବ, ଦୁଷ୍ମନ୍ତ ଚାମୀରା, ମୋହିତ ଶର୍ମା/ ମୁକେଶ କୁମାର, ଟି. ନଟରାଜନ ।
ଗୁଜରାଟ ଟାଇଟନ୍ସ :- ଶୁଭମନ ଗିଲ୍ (ଅଧିନାୟକ), ସାଇ ସୁଦର୍ଶନ, ଜୋସ ବଟଲର, ସେରଫାନ ରଦରଫୋର୍ଡ, ଶାହରୁଖ ଖାନ, ରାହୁଲ ତେୱାତିଆ, ରସିଦ ଖାନ, କାଗିସୋ ରାବାଡା, ପ୍ରସିଦ୍ଧ କ୍ରିଷ୍ଣା, ମହମ୍ମଦ ସିରାଜ, ଅର୍ସଦ ଖାନ, ସାଇ କିଶୋର ।
