ଲକ୍ଷ୍ନୌ ୧୯/୦୫: ଆଇପିଏଲ୍ର ୬୧ତମ ଲିଗ୍ ମୁକାବିଲାରେ ଘରୋଇ ଲକ୍ଷ୍ନୌ ସୁପରଜାଏଣ୍ଟ୍ସ ଓ ସନ୍ରାଇଜର୍ସ ହାଇଦ୍ରାବାଦ ପରସ୍ପରକୁ ଭେଟିବାକୁ ଯାଉଛନ୍ତି । ସନ୍ରାଇଜର୍ସ ପ୍ଲେ-ଅଫ୍ ଦୌଡ଼ରୁ ବାଦ୍ ପଡ଼ିସାରିଛି । ତେଣୁ ଦଳ କେବଳ ପଏଣ୍ଟ ତାଲିକାରେ ଉନ୍ନତି ଆଣିବା ଉପରେ ଗୁରୁତ୍ୱ ଦେବ । ମାତ୍ର ସୁପରଜାଏଣ୍ଟ୍ସ ପାଇଁ ଏହି ମ୍ୟାଚ୍ ‘କର ବା ମର’ ସଦୃଶ ରହିଛି । ସନ୍ରାଇଜର୍ସଠୁ ହାରିଲେ ଦଳର ପ୍ଲେ-ଅଫ୍ ଆଶା ଧୂଳିସାତ୍ ହୋଇଯିବ । ଫଳରେ ଆଜି ସୁପରଜାଏଣ୍ଟ୍ସ ବିଜୟ ପାଇଁ ସବୁ ଶକ୍ତି ଖଟାଇବ ।
ସୁପରଜାଏଣ୍ଟ୍ସ ୧୧ଟି ମ୍ୟାଚ୍ ଖେଳି ୧୦ ପଏଣ୍ଟ ସହ ସପ୍ତମ ସ୍ଥାନରେ ରହିଛି । ଦଳର ଆଉ ୩ଟି ମ୍ୟାଚ୍ ବାକି ଅଛି । ପ୍ଲେ-ଅଫ୍ ଦୌଡ଼ରେ ରହିବାକୁ ହେଲେ ସବୁ ମ୍ୟାଚ୍ ଜିତିବାକୁ ପଡ଼ିବ । ଶେଷ ୩ଟି ମ୍ୟାଚ୍ ଜିତିଲେ ମଧ୍ୟ ଅନ୍ୟ ଦଳର ପ୍ରଦର୍ଶନ ଉପରେ ଦଳର ଭାଗ୍ୟ ନିର୍ଭର କରିବ । ଅନ୍ୟ ପଟରେ ସନ୍ରାଇଜର୍ସ ୧୧ଟି ମ୍ୟାଚ୍ରୁ ୭ପଏଣ୍ଟ ସହ ଅଷ୍ଟମ ସ୍ଥାନରେ ରହିଛି ।
ଷ୍ଟାର୍ ବ୍ୟାଟର ଓ ବୋଲିଂ ବିଭାଗର ନୈରାଶ୍ୟଜନକ ପ୍ରଦର୍ଶନ ପାଇଁ ସୁପରଜାଏଣ୍ଟ୍ସ ବିଦାୟ ଦ୍ୱାରରେ ରହିଛି । ଅଧିନାୟକ ରିଷଭ ପନ୍ତ ଓ ଡେଭିଡ୍ ମିଲର ସଂଘର୍ଷ କରୁଛନ୍ତି । ଆଜି ଉଭୟଙ୍କୁ ଦାୟିତ୍ୱ ମୁଣ୍ଡାଇବାକୁ ପଡ଼ିବ । ନଚେତ ଦଳର ଆଶା ଧୂଳିସାତ୍ ହୋଇଯିବ । ଯୁବ ବ୍ୟାଟର ଆୟୂଷ ବାଦୋନି ଓ ଅବଦୁଲ ସମଦ ସନ୍ରାଇଜର୍ସ ବୋଲିଂ ବିଭାଗ ପାଇଁ ଆହ୍ୱାନପୂର୍ଣ୍ଣ ହୋଇପାରନ୍ତି । ପେସ୍ ବୋଲର ମୟଙ୍କ ଯାଦବ ଆହତ ହୋଇ ବାଦ୍ ପଡ଼ିଛନ୍ତି ।
ସନ୍ରାଇଜର୍ସକୁ ହରାଇବାକୁ ହେଲେ ବୋଲିଂ ବିଭାଗରେ ଶ୍ରେଷ୍ଠ ପ୍ରଦର୍ଶନ ଦେବାକୁ ପଡ଼ିବ । ସନ୍ରାଇଜର୍ସ ଦୁର୍ଦ୍ଧର୍ଷ ବ୍ୟାଟିଂକୁ ଗୁରୁତ୍ୱ ଦେଇ ବିଫଳ ହୋଇଛି । ଆଜି ଟ୍ରେଭିସ୍ ହେଡ୍ ଖେଳିବେନି । ସେ କରୋନା ଭାଇରସ୍ରେ ସଂକ୍ରମିତ ହୋଇଥିବା ଜଣାପଡ଼ିଛି । ଫଳରେ ଅଭିଷେକ ଶର୍ମାଙ୍କ ସହ ଈଶାନ କିଷନ ଓପନ କରିବେ । ସଚିନ ବେବି କିମ୍ବା ହର୍ଷ ଦୁବେ ୩ନଂ ସ୍ଥାନରେ ବ୍ୟାଟିଂ କରିବା ସମ୍ଭାବନା ରହିଛି । ଆଜି ଅଭିଷେକଙ୍କ ସମେତ ପେସ୍ ବୋଲର ପ୍ୟାଟ କମିନ୍ସଙ୍କ ଉପରେ ସମସ୍ତଙ୍କ ନଜର ରହିବ । ଏକାନ୍ନା ଷ୍ଟାଡିୟମର ପିଚ୍ ବ୍ୟାଟରଙ୍କୁ ସୁହାଉଛି । ଆଜି ମଧ୍ୟ ବଡ଼ ସ୍କୋର ହେବା ଆଶା କରାଯାଉଛି ।
ସମ୍ଭାବ୍ୟ ଦ୍ବାଦଶ
ସୁପରଜାଏଣ୍ଟ୍ସ: ଆଡେନ ମାରକ୍ରମ, ମିଚେଲ ମାର୍ଶ, ନିକୋଲାସ ପୂରନ, ରିଷଭ ପନ୍ତ (ଅଧିନାୟକ), ଆୟୂଷ ବାଦୋନି, ଡେଭିଡ୍ ମିଲର, ଅବଦୁଲ ସମଦ, ରବି ବିଷ୍ଣୋଇ, ସର୍ଦୁଲ ଠାକୁର, ଦିଗବେଶ ରାଠି, ପ୍ରିନ୍ସ ଯାଦବ, ଅଭେଶ ଖାନ ।
ସନ୍ରାଇଜର୍ସ: ଈଶାନ କିଷନ, ଅଭିଷେକ ଶର୍ମା, ସଚିନ ବେବି/ ହର୍ଷ ଦୁବେ, ହେନରିକ କ୍ଲାସେନ, ନୀତିଶ ରେଡ୍ଡୀ, ଅନିକେତ ବର୍ମା, କାମିଣ୍ଡୁ ମେଣ୍ଡିସ, ପ୍ୟାଟ କମିନ୍ସ (ଅଧିନାୟକ), ଜୟଦେବ ଉନାକାତ, ହର୍ଷଲ ପଟେଲ, ମହମ୍ମଦ ସାମି, ଜୀଶାନ ଅନସାରୀ ।
IPL 2025 : ପ୍ଲେ ଅଫ୍ରେ ଗୁଜରାଟ, ବେଙ୍ଗାଲୁରୁ, ପଞ୍ଜାବ, ଶେଷ ସ୍ଥାନ ପାଇଁ ଦୌଡ଼ରେ ଦିଲ୍ଲୀ, ମୁମ୍ବାଇ, ଲକ୍ଷ୍ନୌ
