ନୂଆଦିଲ୍ଲୀ,୦୮/୦୮: ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ ସେଣ୍ଟର ଅଫ୍ ଏକ୍ସଲେନ୍ସ ପାଇଁ ନୂଆ ପ୍ରଶିକ୍ଷକ ଖୋଜୁଛି । ବିସିସିଆଇ ବୋଲିଂ ପ୍ରଶିକ୍ଷକ, ବ୍ୟାଟିଂ, କ୍ରୀଡା ବିଜ୍ଞାନ ଏବଂ ଚିକିତ୍ସା ବିଭାଗ ପାଇଁ ଆବେଦନ ମାଗିଛି । ପୂର୍ବତନ ଅଷ୍ଟ୍ରେଲୀୟ ପ୍ରଥମ ଶ୍ରେଣୀ ଦ୍ରୁତ ବୋଲର ଟ୍ରାୟ କୁଲି  ୨୦୨୧ ମସିହାରେ NCAର ବୋଲିଂ ପ୍ରଶିକ୍ଷକ ହୋଇଥିଲେ । ତାଙ୍କର ୩ ବର୍ଷର କାର୍ଯ୍ୟକାଳ ଶେଷ ହୋଇଥିଲା । ସେ ବର୍ଦ୍ଧିତ କାର୍ଯ୍ୟକାଳରେ ଥିଲେ । ତାଙ୍କ ପର କିଏ ସେହି ସ୍ଥାନରେ ରହିବ ସେ ନେଇ କୋଚ୍ ଖୋଜୁଛି ବିସିସିଆଇ ।

ନୀତିନ ପଟେଲ ଦେଇଥିଲେ ଇସ୍ତଫା- କୁହାଯାଉଛି କି, ଟ୍ରାୟ କୁଲିଙ୍କ ସ୍ଥାନରେ ଭାରତୀୟ ଦ୍ରୁତ ବୋଲର ଭିଆରବି ସିଂହଙ୍କୁ ସ୍ଥାନ ମିଳିବାର ସମ୍ଭାବନା ରହିଛି । ସେ ପୂର୍ବରୁ ମଧ୍ୟ ତାଙ୍କ ସହିତ କାମ କରିଛନ୍ତି । ମେଡ଼ିକାଲ ଟିମ୍‌ର ମୁଖ୍ୟ ନୀତିନ ପଟେଲଙ୍କ ସମେତ ଅନେକ କର୍ମଚାରୀଙ୍କ ବିଦାୟ ପରେ ଅନେକ ପଦବୀ ଖାଲି ପଡ଼ିଛି । ନୀତିନ ପଟେଲ ମାର୍ଚ୍ଚ ମାସରେ ପଦରୁ ଇସ୍ତଫା ଦେଇଥିଲେ । ସ୍ପିନ୍ ବୋଲିଂ ପ୍ରଶିକ୍ଷକ ସାଇରାଜ ବାହୁଟୁଲେ ମଧ୍ୟ ପଦ ଛାଡିଛନ୍ତି । ବର୍ତ୍ତମାନ ସେ ରାଜସ୍ଥାନ ରୟାଲ୍ସର ସହାୟକ କର୍ମଚାରୀରେ ଅଛନ୍ତି ।

ଭିଭିଏସ୍‌ ଲକ୍ଷ୍ମଣଙ୍କ କାର୍ଯ୍ୟକାଳ ଶେଷ ହେଉଛି- ଆଉ ଜଣେ ଏନ୍‌ସିଏ ପ୍ରଶିକ୍ଷକ ସୀତାଂଶୁ କୋଟକ ଜାତୀୟ ଦଳରେ ଯୋଗ ଦେଇଛନ୍ତି । ପୂର୍ବତନ ଭାରତୀୟ କ୍ରିକେଟର ଭିଭିଏସ ଲକ୍ଷ୍ମଣଙ୍କ ସିଇଓ ମୁଖ୍ୟ ଭାବରେ କାର୍ଯ୍ୟକାଳ ଚଳିତ ବର୍ଷ ଶେଷରେ ସମାପ୍ତ ହେଉଛି । ସେ ତାଙ୍କ କାର୍ଯ୍ୟକାଳକୁ ବୃଦ୍ଧି କରିବାକୁ ଚାହୁଁନାନାହିଁ । ତାଙ୍କୁ ୨୦୨୭ ଦିନିକିଆ ବିଶ୍ୱକପ୍ ପର୍ଯ୍ୟନ୍ତ ଏହି ପଦବୀରେ ରହିବାକୁ କୁହାଯାଇପାରେ ବୋଲି ଅନୁମାନ କରାଯାଉଛି ।

ଆବେଦନର ଶେଷ ତାରିଖ ଅଗଷ୍ଟ ୨୦- ବିସିସିଆଇ ୩ଟି ପ୍ରମୁଖ ପଦବୀ ପାଇଁ ବିଜ୍ଞାପନ ଦେଇଛି । ଯେଉଁଥିରେ କୁହାଯାଇଛି ଯେ ବ୍ୟାଟିଂ ଏବଂ ବୋଲିଂ ପ୍ରଶିକ୍ଷକ ପଦବୀ ପାଇଁ ପ୍ରାର୍ଥୀ ଜଣେ ପୂର୍ବତନ ପ୍ରଥମ ଶ୍ରେଣୀ କିମ୍ବା ଅନ୍ତର୍ଜାତୀୟ କ୍ରିକେଟର ହେବା ଉଚିତ । ଯାହାଙ୍କ ପାଖରେ ବିସିସିଆଇ ସ୍ତରୀୟ ଦୁଇ କିମ୍ବା ତିନି ପ୍ରଶିକ୍ଷକ ପ୍ରମାଣପତ୍ର ହେବା ଜରୁରୀ । ବ୍ୟାଟିଂ ପ୍ରଶିକ୍ଷକ ପଦବୀ ପାଇଁ, ରାଜ୍ୟ କିମ୍ବା ଉଚ୍ଚସ୍ତରୀୟ ଯୁବ ସ୍ତରରେ ସର୍ବନିମ୍ନ ୫ ବର୍ଷର ପ୍ରଶିକ୍ଷକ ଅଭିଜ୍ଞତା ରହିଥିବା ଦରକାର । ସେହିପରି ବୋଲିଂ ପ୍ରଶିକ୍ଷକ ପାଇଁ ମଧ୍ୟ ସମାନ ଅଭିଜ୍ଞତା ଆବଶ୍ୟକ । କ୍ରୀଡ଼ା ବିଜ୍ଞାନ ମୁଖ୍ୟ ପଦବୀ ପାଇଁ, ପ୍ରାର୍ଥୀଙ୍କର କ୍ରୀଡ଼ା ବିଜ୍ଞାନ କିମ୍ବା ସମ୍ବନ୍ଧୀୟ ବିଷୟରେ ମାଷ୍ଟର୍ସ (ଡକ୍ଟରେଟ୍ ) ଏବଂ ସର୍ବନିମ୍ନ ପାଞ୍ଚ ବର୍ଷର ଅଭିଜ୍ଞତା ଥିବା ଉଚିତ୍‌  । ଆବେଦନ ପଠାଇବାର ଶେଷ ତାରିଖ ଅଗଷ୍ଟ ୨୦ ତାରିଖ ରହିଛି ।