ନ୍ୟୁୟର୍କ,୦୮/୦୮: ଆଗାମୀ ୟୁଏସ ଓପନ ଗ୍ରାଣ୍ଡସ୍ଲାମ୍ର ପୁରସ୍କାର ରାଶି ୨୦% ବୃଦ୍ଧି କରାଯାଇଛି । ଏଥର ମୋଟ୍ ପୁରସ୍କାର ରାଶିକୁ ୯୦ମିଲିୟନ ଡଲାର ରଖାଯାଇଛି । ଅର୍ଥାତ ଗତ ବର୍ଷର ପୁରସ୍କାର ରାଶି ତୁଳନାରେ ୨୦% ବୃଦ୍ଧି ହୋଇଛି । ଏଥର ଉଭୟ ପୁରୁଷ ଓ ମହିଳା ସିଙ୍ଗଲ୍ସ ଚାମ୍ପିଅନଙ୍କୁ ୨.୫ମିଲିୟନ ଡଲାର ଲେଖାଏଁ ପୁରସ୍କାର ରାଶି ପ୍ରଦାନ କରାଯିବ । ସେମି ଫାଇନାଲ୍ ପ୍ରତିଦ୍ୱନ୍ଦ୍ୱୀଙ୍କୁ ୧.୨୬ମିଲିୟନ ଡଲାର, କ୍ୱାର୍ଟର ଫାଇନାଲ୍ ଖେଳାଳିଙ୍କୁ ୬,୬୦,୦୦୦ ଡଲାର ଓ ରାଉଣ୍ଡ-୧୬ ପ୍ରତିଯୋଗୀଙ୍କୁ ୪ଲକ୍ଷ ଡଲାର ପୁରସ୍କାର ରାଶି ପ୍ରଦାନ କରାଯିବ । ଡବଲ୍ସରେ ମଧ୍ୟ ପୁରସ୍କାର ରାଶିକୁ ୨୩% ବୃଦ୍ଧି କରାଯାଇଛି । ଫଳରେ ମହିଳା, ପୁରୁଷ ଡବଲ୍ସ ଓ ମିକ୍ସଡ ଡବଲ୍ସ ବିଜେତାଙ୍କୁ ୧୦ଲକ୍ଷ ଡଲାର ଲେଖାଏଁ ପୁରସ୍କାର ପ୍ରଦାନ କରାଯିବ ।
ଯୋଗ୍ୟତା ପର୍ଯ୍ୟାୟରେ ଖେଳାଳିମାନେ ୮ମିଲିୟନ ଡଲାର ପୁରସ୍କାର ପାଇବେ । ଗତ ବର୍ଷ ତୁଳନାରେ ଏହା ୧୦% ଅଧିକ । ଟୁର୍ଣ୍ଣାମେଣ୍ଟ ସମୟରେ ଖେଳାଳିମାନଙ୍କୁ ଯାତ୍ରା ଖର୍ଚ୍ଚ ବାବଦରେ ୧୦୦୦ ଡଲାର ଓ ୨ଟି ହୋଟେଲ କକ୍ଷ ପ୍ରଦାନ କରାଯିବ । ଖେଳାଳିମାନେ ଆୟୋଜକଙ୍କ ଅଫସିଆଲ୍ ହୋଟେଲରେ ନରହିବାକୁ ଚାହିଁଲେ ସେମାନଙ୍କୁ ଦୈନିକ ଅତିରିକ୍ତ ୬୦୦ଡଲାର ପ୍ରଦାନ କରାଯିବ ।
