ଭୁବନେଶ୍ଵର, ୨୬/୦୩ : ମାସାଚୁସେଟ୍ସ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଏମ୍ଆଇଟି)ର ବୈଜ୍ଞାନିକମାନେ ଏକ ନୂଆ ପ୍ରକାର ଇଞ୍ଜେକ୍ସନ୍ ପ୍ରସ୍ତୁତ କରିଛନ୍ତି । ଏହା ଗର୍ଭଧାରଣରୁ ଲମ୍ବା ସମୟ ପର୍ଯ୍ୟନ୍ତ ସୁରକ୍ଷା ପ୍ରଦାନ କରିବ । ଏଥିପାଇଁ ଅନ୍ୟ ଚିକିତ୍ସା ପ୍ରକ୍ରିୟା କିମ୍ବା ଔଷଧ ଆବଶ୍ୟକ ହେବ ନାହିଁ । ଏହି ଇଞ୍ଜେକ୍ସନ୍କୁ ମହିଳାମାନେ ନିଜେ ଉପଯୋଗ କରିପାରିବେ । ଏଥିରେ ସୂକ୍ଷ୍ମ ସ୍ଫଟିକ ରହିଛି, ଯାହା ତ୍ୱଚା ଭିତରେ ଏକତ୍ର ହୋଇ ପ୍ରଜନନ ପାଇଁ ସୃଷ୍ଟି କରୁଥିବା ହର୍ମୋନ ଉତ୍ପନ୍ନ କରିବାରୁ ମହିଳାଙ୍କୁ ଅଟକାଇଥାଏ ।
ବର୍ତ୍ତମାନ ଉପଯୋଗ ହେଉଥିବା ଗର୍ଭନିରୋଧକ ଉପକରଣ ଅନେକ ବର୍ଷ ଧରି କାମ କରୁଛି । କିନ୍ତୁ ଡାକ୍ତରଙ୍କ ଦ୍ୱାରା ସର୍ଜରି ପ୍ରକ୍ରିୟା ମାଧ୍ୟମରେ ଏହାକୁ ମହିଳାଙ୍କ ଶରୀର ଭିତରେ ଲଗାଇବାକୁ ପଡୁଛି । ସେହିପରି ଗର୍ଭନିରୋଧକ ଇଞ୍ଜେକ୍ସନ୍ ମଧ୍ୟ ମାତ୍ର ୩ ମାସ ପାଇଁ ଗର୍ଭଧାରଣକୁ ଅଟକାଇ ପାରୁଛି । କିନ୍ତୁ ନୂଆ ଇଞ୍ଜେକ୍ସନ୍ ଉଭୟ ସମସ୍ୟାର ସମାଧାନ କରିବାରେ ସକ୍ଷମ । ଯଦିଓ ଏହାକୁ ମଣିଷଠାରେ ପରୀକ୍ଷା କରାଯାଇ ନାହିଁ, ଏହାର ପ୍ରଭାବକୁ ନେଇ ବୈଜ୍ଞାନିକମାନେ ଆଶାବାଦୀ ଅଛନ୍ତି ।
ନେଚର୍ କେମିକାଲ ଇଞ୍ଜିନିୟରିଂ ପତ୍ରିକାରେ ଅଧ୍ୟୟନଟି ପ୍ରକାଶ ପାଇଛି । ଇଞ୍ଜେକ୍ସନ୍ର ନାଁ ସ୍ଲିମ୍ । ଏହି ଇଞ୍ଜେକ୍ସନ୍ର ଔଷଧକୁ ମୂଷାଙ୍କଠାରେ ପରୀକ୍ଷା କରାଯାଇଥିଲା, ଯାହା ଅତିକମ୍ରେ ୯୭ ଦିନ ଧରି ତିଷ୍ଠିଲା । ଆହୁରି ଅଧିକ ସମୟ ପର୍ଯ୍ୟନ୍ତ ଏହାର ସାମର୍ଥ୍ୟ ଥିଲା ବୋଲି ବୈଜ୍ଞାନିକମାନେ ଦାବି କରୁଛନ୍ତି । ଗର୍ଭନିରୋଧକ ଭାବେ ପ୍ରୟୋଗରେ ‘ସ୍ଲିମ୍’ର (ସେଲ୍ଫ-ଆଗ୍ରିଗେସନ୍ ଲଙ୍ଗ୍-ଆକ୍ଟିଂ ଇଞ୍ଜେକ୍ଟେବଲ୍ ମାଇକ୍ରୋକ୍ରିଷ୍ଟାଲ୍ସ) ଦୀର୍ଘକାଳୀନ ଔଷଧ ଉତ୍ପନ୍ନ ସାମର୍ଥ୍ୟ ବର୍ତ୍ତମାନର ସ୍ୱୟଂ-ପରିଚାଳିତ ବିକଳ୍ପଗୁଡ଼ିକର ସାମର୍ଥ୍ୟ ତୁଳନାରେ ଅଧିକ ଥିଲା । ଅଧ୍ୟୟନର ସହ-ଲେଖକ ଡା. ଜିଓଭାନି ଟ୍ରାଭର୍ସୋ କହିଛନ୍ତି, ମହିଳା ଘରେ ରହି କିଭଳି ସହଜରେ ଏହି ଇଞ୍ଜେକ୍ସନ୍କୁ ନେଇପାରିବେ, ତା’ର ସମାଧାନ କରିବା ସେମାନଙ୍କ ପାଇଁ ମୁଖ୍ୟ ଆହ୍ୱାନ ଥିଲା । ଛୋଟ ଛୁଞ୍ଚି ବ୍ୟବହାର କରି ରୋଗୀଙ୍କୁ ଆରାମ ପହଞ୍ଚାଇବାର ମାର୍ଗ ଖୋଜିବା ବି ଚାଲେଞ୍ଜ୍ ଥିଲା, ଯାହା ସାଧାରଣତଃ ଯନ୍ତ୍ରଣା କିମ୍ବା ରକ୍ତସ୍ରାବର କାରଣ ହୋଇଥାଏ ।
ସ୍ୱଳ୍ପ ସାଧନ ପାଉଥିବା ଲୋକଙ୍କ ପାଇଁ ଦୈନିକ ଔଷଧ ଖାଇବା କିମ୍ବା ଶରୀରରେ ଗର୍ଭନିରୋଧକ ଉପକରଣ ଫିଟ୍ କରିବା ସମ୍ଭବ ନ ଥିବାବେଳେ ଏହି ଉଦ୍ଭାବନର ଉତ୍ତମ ବିକଳ୍ପ ହେବାରେ ସାମର୍ଥ୍ୟ ରହିଛି ବୋଲି ଟ୍ରାଭର୍ସୋ କହିଛନ୍ତି । ସ୍ଲିମ୍ ଇଞ୍ଜେକ୍ସନ୍ ବର୍ତ୍ତମାନର ପରିବାର ନିୟୋଜନ ବିକଳ୍ପରେ ମହିଳାଙ୍କ ପାଇଁ ନୂଆ ବିକଳ୍ପ ହୋଇପାରେ । ଖାସ୍କରି ସୀମିତ ସଂସାଧନ ଓ ସୀମିତ ସ୍ୱାସ୍ଥ୍ୟସେବା ସୁବିଧା ପାଉଥିବା ଲୋକଙ୍କ ପାଇଁ ଏହା ସହାୟକ ହେବ । ଏଚ୍ଆଇଭି, ଯକ୍ଷ୍ମା, ସ୍କିଜୋଫ୍ରେନିଆ, ପୁରୁଣା ଯନ୍ତ୍ରଣା ଓ ମେଟାବଲିକ୍ ରୋଗ ଭଳି ଦୀର୍ଘକାଳୀନ ପ୍ରଭାବ ଆବଶ୍ୟକ କରୁଥିବା ଅନ୍ୟ ଔଷଧ ପାଇଁ ମଧ୍ୟ ଏହି ଇଞ୍ଜେକ୍ସନ୍କୁ ବ୍ୟବହାର କରାଯାଇ ପାରିବ । ଟ୍ରାଭର୍ସୋ କହିଛନ୍ତି, ଏହା ଅତ୍ୟନ୍ତ ସରଳ ପ୍ରଣାଳୀ । ଏହି ଔଷଧ ମୂଳତଃ ଏକ ଘୋଳ । ଏଥିରେ ଆପଣ ଅଳ୍ପ ବାୟୋରିସୋର୍ବେବଲ ପଲିମର ମିଶାଯାଇ ପାରିବେ । ସଫଳତା ପରେ ମଣିଷଙ୍କଠାରେ ଇଞ୍ଜେକ୍ସନ୍ର ପ୍ରଭାବ ଆକଳନ ପାଇଁ ବୈଜ୍ଞାନିକମାନେ ପ୍ରସ୍ତୁତି ଚଳାଇଛନ୍ତି ।
