ଭୁବନେଶ୍ୱର,୧୯/୧୦: କୋଷ୍ଟ୍ଗାର୍ଡ ଡିଆଇଜି ଓ ତାଙ୍କ ପତ୍ନୀଙ୍କୁ ଦୁର୍ବ୍ୟବହାର କରିବା ମହଙ୍ଗା ପଡ଼ିଛି ୨ ରୋଡ୍ ରୋମିଓଙ୍କୁ । ନୂଆପଲ୍ଲୀ ଥାନା ପୁଲିସ ୨ ଜଣଙ୍କୁ ଗିରଫ କରିଛି । ସେମାନେ ହେଲେ କଟକ ବାଦାମବାଡ଼ି ପାଲାମଣ୍ଡପ ଅଞ୍ଚଳରେ ରହୁଥିବା ଜଗତସିଂହପୁର ବାଲିକୁଦାର ଶିବାଶିଷ ମହାନ୍ତି(୩୦) ଓ ସମ୍ବଲପୁରରେ ରହୁଥିବା ଜଗତସିଂହପୁର ବାଲିକୁଦାର ବିକାଶ ମହାନ୍ତି(୨୭) । ଶିବାଶିଷ ଏକ ଘରୋଇ କଂପାନୀରେ ଚାକିରି କରିଥିବା ବେଳେ ବିକାଶ ଏକ ଘରୋଇ ଇଞ୍ଜିନିୟରିଂ କଲେଜରେ ଡିପ୍ଲୋମା କରୁଥିବା ଜଣାପଡ଼ିଛି । ସେମାନେ ବ୍ୟବହାର କରୁଥିବା ସ୍କୁଟରକୁ ପୁଲିସ ଜବତ କରିଛି ।
ଶୁକ୍ରବାର ସାମ୍ବାଦିକ ସମ୍ମିଳନୀରେ ଭୁବନେଶ୍ୱର ଡିସିପି ପିନାକ ମିଶ୍ର ସୂଚନା ଦେଇଛନ୍ତି, ପୋଖରୀପୁଟ କୋଷ୍ଟଗାର୍ଡ ଅଫିସର୍ସ ରେସିଡେଣ୍ଟିଆଲ ଏରିଆରେ ରହୁଥିବା କୋଷ୍ଟଗାର୍ଡ ଡିଆଇଜି ସତ୍ୟରଞ୍ଜନ ଦାଶ ଗୁରୁବାର ରାତି ୯ଟା ୪୦ରେ ପତ୍ନୀଙ୍କ ସହ ମାର୍କେଟିଂ ସାରି କାର୍ରେ ଆସୁଥିଲେ । ସେମାନଙ୍କ କାର୍ ନୂଆପଲ୍ଲୀ ବେହେରା ସାହି ଟ୍ରାଫିକ୍ ପୋଷ୍ଟରେ ୟୁ-ଟର୍ଣ୍ଣ ନେଉଥିବା ବେଳେ ହଠାତ୍ ଶିବାଶିଷ ଓ ବିକାଶ ଏକ ସ୍କୁଟରରେ ଆସିଥିଲେ । କାର୍ ଆଗରେ ସ୍କୁଟର ରଖି ଦୁର୍ବ୍ୟବହାର କରିଥିଲେ । ଅଶ୍ଳୀଳ ଭାଷାରେ ଗାଳି କରିବା ସହ କାର୍ ଡୋର୍କୁ ବାଡ଼େଇଥିଲେ ।
ଡିଆଇଜି ଶ୍ରୀ ଦାଶ ଗାଡ଼ିରୁ ଓହ୍ଲାଇ ପ୍ରତିବାଦ କରିବାରୁ ୨ଜଣ ତାଙ୍କୁ ପୁଣି ଗାଳିଗୁଲଜ କରିବା ସହ ଦୁର୍ବ୍ୟବହାର କରିଥିଲେ । ଶ୍ରୀ ଦାଶଙ୍କ ପତ୍ନୀଙ୍କୁ ମଧ୍ୟ ସେମାନେ ଅଶାଳୀନ ବ୍ୟବହାର କରିଥିଲେ । ଶ୍ରୀ ଦାଶଙ୍କ ପତ୍ନୀ ଏନେଇ ପୁଲିସ କଣ୍ଟ୍ରୋଲ ରୁମ୍କୁ ଫୋନ୍ କରିବାରୁ ପିସିଆର ଭ୍ୟାନ୍ ସଙ୍ଗେ ସଙ୍ଗେ ସେଠାରେ ପହଞ୍ଚିଥିଲା । ପିସିଆର ପୁଲିସକୁ ଦେଖି ୨ ଜଣ ସେଠାରୁ ଖସି ଯାଇଥିଲେ । ଡିଆଇଜି ଶ୍ରୀ ଦାଶ ନୂଆପଲ୍ଲୀ ଥାନାରେ ପହଞ୍ଚି ଲିଖିତ ଅଭିଯୋଗ କରିଥିଲେ । ସଙ୍ଗେ ସଙ୍ଗେ ପୁଲିସ ବେହେରାସାହି ଅଞ୍ଚଳରେ ଚଢ଼ଉ କରି ଶିବାଶିଷ ଓ ବିକାଶଙ୍କୁ ଉଠାଇ ଆଣିଥିଲା । ରାଜଧାନୀରେ ଜଣେ କୋଷ୍ଟଗାର୍ଡ ଡିଆଇଜି ଓ ପତ୍ନୀଙ୍କୁ ଦୁର୍ବ୍ୟବହାର କରା ଯାଇଥିବା ଖବରପାଇ ପୁଲିସ କମିଶନର ଦେବଦତ୍ତ ସିଂହ ନୂଆପଲ୍ଲୀ ଥାନାରେ ପହଞ୍ଚି ଘଟଣା ସଂପର୍କରେ ଡିଆଇଜିଙ୍କୁ ପଚାରି ବୁଝିଥିଲେ । ଶିବାଶିଷ ଓ ବିକାଶଙ୍କର ବ୍ରେଥ୍ ଆନାଲାଇଜର ଟେଷ୍ଟ୍ କରିବା ସମୟରେ ଉଭୟେ ପ୍ରଚୁର ମଦ୍ୟପାନ କରିଥିବା ଜଣା ପଡ଼ିଥିଲା। ପୁଲିସ ଶିବାଶିଷ ଓ ବିକାଶଙ୍କୁ ଗିରଫ କରି ଶୁକ୍ରବାର କୋର୍ଟ ଚାଲାଣ କରିଥିଲା । ଜାମିନ ନାମଞ୍ଜୁର ହେବାରୁ ଉଭୟଙ୍କୁ ଜେଲ୍ ହାଜତକୁ ପଠାଇ ଦିଆଯାଇଛି।
