ଖୋର୍ଦ୍ଧା,୫।୪ : ସ୍ତ୍ରୀର ଅତ୍ୟାଚାର ସହି ନପାରି ସ୍ବାମୀର ଆତ୍ମହତ୍ୟା। ଆତ୍ମହତ୍ୟା ପୂର୍ବରୁ ସ୍ବାମୀ କରିଥିବା ଭିଡିଓ ଏବେ ସୋସିଆଲ ମିଡିଆରେ ଘୁରି ବୁଲୁଛି।ଯେଉଁଥିରେ ସେ ନିଜ ସ୍ତ୍ରୀ ପାଇଁ ଆତ୍ମହତ୍ୟା କରୁଥିବା କହିଛନ୍ତି। ଏମିତି ଏକ ଭିଡିଓ ମୋବାଇଲରୁ ମୋବାଇଲ ଘୁରି ବୁଲୁଛି। ଏଭଳି ଏକ ଅଭାବନୀୟ ଘଟଣା ଘଟିଛି ଖୋର୍ଦ୍ଧା ଶିଳ୍ପାଂଚଳ ଥାନା ଅନ୍ତର୍ଗତ କୁମାରବସ୍ତ ଗ୍ରାମରେ।
ଶୁକ୍ରବାର ରାତିରେ ଜଂକିଆ ଥାନା ଅନ୍ତର୍ଗତ ନରଣଗଡ଼ ଟ୍ରେନ ଲାଇନରେ ଜଣେ ଯୁବକର ମୃତଦେହ ମିଳିଥିଲା। ଏହା ରାମଚନ୍ଦ୍ର ବଡ଼ଜେନାଙ୍କ ବୋଲି ଜଣାପଡିଥିଲା। ମୃତଦେହକୁ ରାମଚନ୍ଦ୍ର ପରିବାର ଲୋକ ଚିହ୍ନଟ କରିଥିଲେ। ରାମଚନ୍ଦ୍ର ଜଂକିଆ ଥାନା ଅଞ୍ଚଳରେ ବିବାହ କରିଥିଲେ। ତାଙ୍କର ଏକ କନ୍ୟା ସନ୍ତାନ ମଧ୍ୟ ଅଛି। ଦାମ୍ପତ୍ୟ କଳହ ଘଟି ସ୍ତ୍ରୀ ର ନିର୍ଯ୍ୟାତନା ଅସହ୍ୟ ହେବାରୁ ମୋବାଇଲରେ ନିଜ ଭିଡିଓ ଉତ୍ତୋଳନ କରି ସୋସିଆଲ ମିଡିଆରେ ପଠାଇ ଟ୍ରେନ ଆଗକୁ ଯାଇ ଆତ୍ମହତ୍ୟା କରିଥିଲେ। ରେଳ ବିଭାଗ ପୋଲିସ ମୃତଦେହ ଜବତ କରି ବ୍ୟବଛେଦ ପାଇଁ ପଠାଇଛି। ମୃତକଙ୍କ ପରିବାର ଖୋର୍ଦ୍ଧା ଶିଳ୍ପାଞ୍ଚଳ ଥାନାରେ ଅଭିଯୋଗ କରିଛନ୍ତି। ପୋଲିସ ତଦନ୍ତ ଜାରି ରଖିଛି।
