ସମ୍ବଲପୁର,୨୮/୦୭: ଆଜି ହୀରାକୁଦ ଜଳଭଣ୍ଡାରରୁ ନିଷ୍କାସିତ ହେବ ବର୍ଷର ପ୍ରଥମ ବନ୍ୟାଜଳ । ଏହାକୁ ନେଇ ଜଳଭଣ୍ଡାର କର୍ତ୍ତୃପକ୍ଷଙ୍କ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି ।
ପ୍ରାୟ ମାସାଧିକ ସମୟ ଧରି ନିଅଣ୍ଟିଆ ସ୍ଥିତିରେ ରହିଥିଲା ହୀରାକୁଦ ଡ୍ୟାମ୍ । ଉପରମୁଣ୍ଡରେ ଲଗାଣ ବର୍ଷା ଫଳରେ ଦ୍ରୁତଗତିରେ ଭର୍ତ୍ତି ହେଉଛି ଜଳଭଣ୍ଡାର । ମାତ୍ର ୫ ଦିନରେ ଅଧାରୁ ଅଧିକ ଭରିଗଲାଣି । ଶନିବାର ରାତି ୯ଟା ସୁଦ୍ଧା ଜଳସ୍ତର ୬୧୫.୨୯ ଫୁଟ୍ ଛୁଇଁଛି । ରାତି ୯ଟା ସୁଦ୍ଧା ୨ ଲକ୍ଷ ୯୪ ହଜାର କ୍ୟୁସେକ୍ ଜଳ ପ୍ରବେଶ କରୁଛି । ଫଳରେ ରବିବାର ଜଳସ୍ତର ୬୧୭ ଫୁଟ୍ ଟପିବାର ସମ୍ଭାବନା ରହିଛି । ଏଣୁ ପ୍ରାଥମିକ ପର୍ଯ୍ୟାୟରେ ୧୨ରୁ ୧୫ଟି ଗେଟ୍ ଖୋଲିପାରେ ବୋଲି ଆକଳନ କରାଯାଉଛି । ଗଚ୍ଛିତ ଜଳର ପରିମାଣ, ଜଳପ୍ରବାହ ଏବଂ ପାଣିପାଗ ବିଭାଗର ଆକଳନକୁ ଦେଖି କେତୋଟି ଗେଟ୍ ଖୋଲାଯିବ ସେ ନେଇ ନିଷ୍ପତ୍ତି ନିଆଯିବ ବୋଲି ଭାରପ୍ରାପ୍ତ ମୁଖ୍ୟଯନ୍ତ୍ରୀ ସୁଶୀଳ କୁମାର ବେହେରା ସୂଚନା ଦେଇଛନ୍ତି ।
ରବିବାର ସକାଳ ୯ଟାରୁ ସାଢ଼େ ୯ଟା ମଧ୍ୟରେ ହୀରାକୁଦ ନଦୀବନ୍ଧରୁ ଚଳିତ ବର୍ଷର ପ୍ରଥମ ବନ୍ୟାଜଳ ମହାନଦୀକୁ ଛଡ଼ାଯିବ । ପରମ୍ପରା ଅନୁଯାୟୀ ପୂଜାର୍ଚ୍ଚନା ପରେ ନଦୀବନ୍ଧର ବାମପାଶ୍ୱର୍ ଅର୍ଥାତ ହୀରାକୁଦ ପଟର ୭ ନମ୍ବର ସ୍ପିଲ୍ୱେକୁ ଖୋଲାଯିବ । ପରେ ପର୍ଯ୍ୟାୟକ୍ରମେ ଅନ୍ୟ ଗେଟ୍ ଖୋଲିବ ।
ରୁଲ୍ କର୍ଭ ଅନୁଯାୟୀ, ଜୁଲାଇ ୩୧ ସୁଦ୍ଧା ହୀରାକୁଦ ଜଳଭଣ୍ଡାର ଜଳସ୍ତର ୬୦୫ ଫୁଟ୍ ରହିବା କଥା । ଦୁଇ ଦିନ ପରେ ଏହି ଅବଧି ଶେଷ ହେଉଛି । ତେଣୁ ଜଳସ୍ତରକୁ ୬୦୮ରୁ ୬୦୯ ଫୁଟ୍ ମଧ୍ୟରେ ରଖିବାକୁ କର୍ତ୍ତୃପକ୍ଷ ଯୋଜନା କରୁଛନ୍ତି । ହୀରାକୁଦ ଛାଡ଼ିବାକୁ ଥିବା ପାଣି ତଳମୁଣ୍ଡରେ କୌଣସି ସମସ୍ୟା ସୃଷ୍ଟି କରିବ ନାହିଁ । ହେଲେ ପାଣି ଛଡ଼ାଯିବା ପରେ ମହାନଦୀରେ ସ୍ରୋତ ବଢ଼ିବ । ତେଣୁ ତଳମୁଣ୍ଡର ୧୨ ଜିଲ୍ଲାକୁ ସତର୍କ କରାଇ ଦିଆଯାଇଥିବା କର୍ତ୍ତୃପକ୍ଷ ସୂଚନା ଦେଇଛନ୍ତି।
