ପାଟଣା,୦୩/୧୧: ପାଟଣା ରେଞ୍ଜରେ ହାତୀପଲଙ୍କ ଆତଙ୍କ । ଏକ ୨୯ ଟିକିଆ ହାତୀପଲ ବିଳମ୍ବିତ ରାତିରେ ପାଟଣା ଓ ସଦର ରେଞ୍ଜ ଅଞ୍ଚଳରେ ଆତଙ୍କ ଖେଳାଇଛନ୍ତି । ଶରଧାପୁର ବଡଘାଟ ସାହିରେ ପଶି ୪ ଟି ଘର ଭାଙ୍ଗି ଘର ଭିତରୁ ଧାନ ଚାଉଳ ଖାଇ ନଷ୍ଟ କରିଦେଇଛନ୍ତି । କେନ୍ଦୁଝର ଜିଲ୍ଲା ପାଟଣା ରେଞ୍ଜରେ ଏଭଳି ଘଟଣା ଘଟିଛି ।

ସୂଚନା ମୁତାବକ, ଏକ ୨୯ ଟିକିଆ ହାତୀପଲ ଶନିବାର ବିଳମ୍ୱିତ ରାତିରେ ପାଟଣା ଓ ସଦର ରେଞ୍ଜ ଅଞ୍ଚଳରେ ଆତଙ୍କ ଖେଳାଇଥିଲେ । ପାଟଣା ଶରଧାପୁର ବଡଘାଟ ସାହିରେ ପଶି ୪ ଟି ଘର ଭାଙ୍ଗି ଘର ଭିତରୁ ଧାନ ଚାଉଳ ଖାଇ ନଷ୍ଟ କରିଦେଇଥିଲେ । ସାହିର ବିଦେଶୀ ମୁଣ୍ଡାଙ୍କ ଖପର ଘରକୁ ହାତୀପଲ ସମ୍ପୁର୍ଣ୍ଣ ଭାଙ୍ଗି ମାଟିରେ ମିଶାଇ ଦେଇଥିଲେ । କେବଳ ସେତିକି ନୁହେଁ, ଘର ଭିତରୁ ଧାନ ଚାଉଳ ମଧ୍ୟ ଖାଇ ନଷ୍ଟ କରି ଦେଇଥିଲେ । ଫଳରେ ସେ ଏବେ ବାସହୀନ ହୋଇ ଭୋକ ଉପାସରେ ରହିଛନ୍ତି । ଏନେଇ ଗାଁଲୋକେ ବନ ବିଭାଗକୁ ଖବର ଦେଇଥିଲେ । ଖବର ପାଇ ବନ ବିଭାଗ ଘଟଣାସ୍ଥଳରେ ପହଞ୍ଚିଛି । ସେଠାରେ ଉପସ୍ଥିତ ରହି ହାତୀପଲଙ୍କ ଉପରେ ତୀକ୍ଷ୍ଣ ନଜର ରଖିଛନ୍ତି । ଅନ୍ୟପଟେ ଖୁବ ଶୀଘ୍ର ତାଙ୍କୁ ସରକାରୀ ସହାୟତା ଯୋଗାଇ ଦେବାକୁ ବିଦେଶୀ ଦାବି କରିଛନ୍ତି । ଏଥି ସହ ଏହି ହାତୀପଲ ଅଞ୍ଚଳର ଧାନ ଜମିରେ ପଶି ବ୍ୟାପକ ଧାନ ଚାଷ ନଷ୍ଟ କରିଛନ୍ତି । ହାତୀପଲଙ୍କୁ ଏହି ଅଞ୍ଚଳରୁ ସୁରକ୍ଷିତ ସ୍ଥାନକୁ ଘଉଡାଇବାକୁ ଅଞ୍ଚଳବାସୀ ଦାବି କରିଛନ୍ତି ।