ଆନନ୍ଦପୁର, ୨୯।୧୨ : ଆନନ୍ଦପୁର ଥାନା ଅନ୍ତର୍ଗତ ବୈତରଣୀ ନଦୀର ସୁନାମୁନି ଘାଟ ଠାରୁ ପଥର ବନ୍ଧା ହୋଇଥିବା ଅବସ୍ଥାରେ ମହିଳାଙ୍କ ମୃତଦେହ ମିଳିବା ଘଟଣାର ପୋଲିସ ପର୍ଦ୍ଦାଫାଶ କରିଛି। ବାହା ହୋଇ ଘରେ ରଖିବାକୁ ଜିଦ୍ କରିବାରୁ ପ୍ରେମିକାକୁ ହତ୍ୟା କରି ପ୍ରେମିକ ନଦୀରେ ଫିଙ୍ଗି ଦେଇଥିଲା ବୋଲି ପୋଲିସ ସୂଚନା ଦେଇଛି। ପ୍ରେମିକ ମନହରପୁର ଗାଁ ର ବଲକା ଟୁଡୁଙ୍କୁ ପୋଲିସ ଗିରଫ କରିଛି।
ଆନନ୍ଦପୁର ଥାନା ମନହରପୁର ଗାଁ ର ବଲକା ଟୁଡୁ ଓ ଘଷିପୁରା ଥାନା ସୁଆପୁର ହାତୀନଚା ଗାଁ ର ମେରୀ ବିଶ୍ରା ଙ୍କ ସହ ଭଦ୍ରକରେ କାମ କରିବା ସମୟରେ ଦେଖା ହୋଇଥିଲା । ଦୁହଁଙ୍କ ମଧ୍ଯରେ ସମ୍ପର୍କ ବଢିବା ପରେ ଉଭୟେ ଦୁନିଆଁ ଆଖିରେ ପତିପତ୍ନି ଧରି ପ୍ରାୟ ୩ବର୍ଷ ହେବ ସେଠାରେ ରହୁଥିଲେ । ତେବେ କିଛିଦିନ ହେବ ମେରୀ ବାହାହେବାକୁ କହିବା ସହ ବାହାହୋଇ ନିଜ ଘରକୁ ନେବାକୁ ବଲକା ଙ୍କ ନିକଟରେ ଜିଦ୍ ଧରିଥିଲେ । ହେଲେ ଏଥିରେ ରାଜି ନଥିଲା ବଲକା ।
ପ୍ରାୟ ୧୫ ଦିନ ତଳେ ବଲକା ମେରୀକୁ ନିଜ ଘର ମନହରପୁରକୁ ନେଇ ଆସିଥିଲା । ଗତ ୨୬ ତାରଖ ରାତିରେ ସୁଯୋଗ ଦେଖି ତାର ତଣ୍ଟି ଚିପି ପ୍ରଥମେ ହତ୍ୟା କରିଥିଲା । ପରେ ପରେ ମୃତଦେହ କୁ ବାଇକ୍ ଯୋଗେ ନେଇ ହାତରେ ଓ ଅଣ୍ଟାରେ ପଥର ବାନ୍ଧି ଗାଁ ନିକଟ ବୈତରଣୀର ସୁନାମୁନୀ ଘାଟରେ ଭସାଇ ଦେଇଥିଲା । ଆଜି ମୃତଦେହ ମିଳିବା ପରେ ପୋଲିସ୍ ଦମକଳ ବାହିନି ସହାୟତାରେ ପାଣିରୁ ଉଦ୍ଧାର କରିଥିଲା । ପରେ ପରେ ସନ୍ଧାନି କୁକୁର ଓ ସାଇଣ୍ଟିଫକ୍ ଟିମ୍ ର ସହାୟତା ନେଇଥିଲା ପୋଲିସ୍ । ଗାଁ ଲୋକଙ୍କ ଠାରୁ ସୁରାକ ପାଇ ବଲକାକୁ ଅଟକ ରଖିବା ପରେ ସେ ସବୁସତ ମାନିନେଇଥିଲା ସେ ଘଟଣା ସ୍ଥଳରୁ କେତେକ ଲୁଗା ଓ ଅନ୍ୟାନ୍ୟ ସାମଗ୍ରୀ ଜବଦ କରିବା ସହ ମୃତଦେହ କୁ ବ୍ୟବଛେଦ କରାଇଛି ପୋଲିସ୍ । ଏଥିସହ ଏକ ହତ୍ୟା ମାମଲା ରୁଜୁକରି ବଲକା ଟୁଡୁଙ୍କୁଗିରଫ କରିଛି ପୋଲିସ୍ ।
