ମାଲକାନଗିରି,୨୨/୦୭: ପ୍ରବଳ ବର୍ଷାରେ ବେହାଲ ମାଲକାନଗିରି ଜିଲ୍ଲା। ବିଭିନ୍ନ ସ୍ଥାନରେ ଲଗାଣ ବର୍ଷା ଯୋଗୁଁ ବ୍ୟାପକ କ୍ଷୟକ୍ଷତି । ଚିତ୍ରକୋଣ୍ଡା ବ୍ଲକ ସ୍ଥିତ ସ୍ୱାଭିମାନ ଅଞ୍ଚଳ ଯୋଡ଼ାମ୍ବ ସ୍ୱାସ୍ଥ୍ୟକେନ୍ଦ୍ର ଭିତରେ ପଶିଲା ୩ ଫୁଟ ଉଚ୍ଚର ପାଣି। ଫଳରେ ରୋଗୀ ଓ କର୍ମଚାରୀ ହନ୍ତସନ୍ତ ହେବା ସହିତ ଔଷଧ ଆସବାବପତ୍ର ନଷ୍ଟ ହୋଇଥିବା ଦେଖିବାକୁ ମିଳିଛି।
ତେବେ ଗତ ଦୁଇ ଦିନ ମାଲକାନଗିରି ଜିଲ୍ଲାରେ ଲଗାଣ ବର୍ଷା ଜାରି ରହିଛି। ଫଳରେ ଯୋଡ଼ାମ୍ବ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ବର୍ଷାପାଣି ପଶି କୃତିମ ବନ୍ୟା ପରିସ୍ଥିତି ସୃଷ୍ଟି ହୋଇଛି। ସେଠାରେ ୧୦ରୁ ଉର୍ଦ୍ଧ ରୋଗୀ ଥିବାବେଳେ ଗତକାଲି ସନ୍ଧ୍ୟାରେ ହଠାତ୍ ବର୍ଷା ଜଳ ମେଡିକାଲ ଭିତରେ ପ୍ରବେଶ କରିବାରୁ ରୋଗୀ ଓ ସ୍ୱାସ୍ଥ୍ୟକେନ୍ଦ୍ର କର୍ମଚାରୀ ନାହିଁ ନଥିବା ଅସୁବିଧାର ସମ୍ମୁଖିନ ହୋଇଛନ୍ତି । ତେବେ ସ୍ୱାସ୍ଥ୍ୟକେନ୍ଦ୍ରରେ ହଠାତ ୩ ଫୁଟରୁ ଉର୍ଦ୍ଧ୍ବ ପାଣି ପ୍ରବେଶ ଯୋଗୁଁ ରୋଗୀଙ୍କୁ ସ୍ଥାନାନ୍ତର କରିବା ପାଇଁ ସହଯୋଗର ହାତ ବଢାଇଥିଲେ ଯୋଡ଼ାମ୍ବ ଗ୍ରାମବାସୀ।
ଏ ସମ୍ପର୍କରେ ଗ୍ରାମବାସୀ ଭାରପ୍ରାପ୍ତ ଜିଲ୍ଲା ମୁଖ୍ୟ ସ୍ୱାସ୍ଥ୍ୟ ଅଧିକାରୀ ଡାକ୍ତର ବ୍ରଜ ବନ୍ଧୁ ଦାଶଙ୍କୁ ଯୋଗାଯୋଗ କରିଥିଲେ। ସେ କହିଥିଲେ ଯେ, ଉକ୍ତ ସ୍ୱାସ୍ଥ୍ୟକେନ୍ଦ୍ରଟି ପୂର୍ବରୁ ପାହାଡ଼ ତଳେ ନୀଚା ସ୍ଥାନରେ ନିର୍ମାଣ ହୋଇଥିବାରୁ ଅଧିକ ବର୍ଷା ହେଲେ ବର୍ଷା ପାଣି ସ୍ୱାସ୍ଥ୍ୟକେନ୍ଦ୍ର ଭିତରକୁ ପ୍ରବେଶ କରୁଛି, ଏହି ଘଟଣା ଜାଣିବା ପରେ ଚିତ୍ରକୋଣ୍ଡା ଓ ଜିଲ୍ଲା ସ୍ୱାସ୍ଥ୍ୟ ଟିମଙ୍କୁ ସେଠାକୁ ପଠାଯାଇଛି। ପରବର୍ତ୍ତୀ ସମୟରେ ଯେପରି ସ୍ୱାସ୍ଥ୍ୟକେନ୍ଦ୍ର ଭିତରକୁ ବର୍ଷା ପାଣି ପ୍ରବେଶ ନ କରିବ ସେଥିପ୍ରତି ଗୁରୁତ୍ୱ ଦିଆଯିବ ବୋଲି ଡାକ୍ତର ବ୍ରଜ ବନ୍ଧୁ ଦାଶ କହିଛନ୍ତି। ଅନ୍ୟପଟେ ଅଧିକ ବର୍ଷା ଯୋଗୁଁ ଜିଲ୍ଲାର ଚିତ୍ରକୋଣ୍ଡା ବ୍ଲକର ୩ଟି ପଞ୍ଚାୟତର ଅନେକ ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଥିବାର ଜଣାପଡିଛି।
