ଉଦଳା,୧୯/୦୯: ରାତିରେ ମିଳି ପାରିଲା ନାହିଁ ଚିକିତ୍ସା । ଚିକିତ୍ସା ଅଭାବରେ କପ୍ତିପଦା ଥାନା ଦେୱାନବାହାଳୀ ଗ୍ରାମର ମଧୁସୂଦନ ରାଉତଙ୍କ ୫ ମାସ ଶିଶୁକନ୍ୟାର ଜୀବନ ଚାଲିଗଲା । ମୃତଦେହ ଧରି ଡାକ୍ତରଖାନା ସମ୍ମୁଖରେ ଧାରଣାରେ ବସିଲେ ପରିବାର ଲୋକେ । ମୟୁରଭଞ୍ଜ ଜିଲ୍ଲା ଉଦଳା ବ୍ଲକରେ ଏଭଳି ଅଭାବନୀୟ ଘଟଣା ଘଟିଛି ।
ସୂଚନା ମୁତାବକ, ମଧୁସୂଦନ ରାଉତଙ୍କ ୫ ମାସର ଝିଅ ଅସୁସ୍ଥ ଥିଲେ । ପରେ ବୁଧବାର ରାତିରେ ଝିଅର ସ୍ୱାସ୍ଥ୍ୟାବସ୍ଥା ଅଧିକ ଖରାପ ହୋଇଥିଲା । ତେଣୁ ମଧୁସୂଦନ ତାଙ୍କ ଝିଅକୁ ନେଇ ଉଦଳା ଡାକ୍ତରଖାନାକୁ ଯାଇଥିଲେ । କିନ୍ତୁ ସେଠାରେ ଚିକିତ୍ସାରେ ଅବହେଳା ହେବାରୁ ଡାକ୍ତରଖାନାରେ ପ୍ରାଣ ହରାଇଲା ୫ ମାସର ଝିଅ । ଏଥିରେ ଆତ୍ମହରା ହୋଇପଡ଼ିଥିଲେ ମଧୁସୂଦନଙ୍କ ପରିବାର ଲୋକେ । ପରେ ଝିଅର ମୃତଦେହ ଧରି ଡାକ୍ତରଖାନା ସମ୍ମୁଖରେ ଧାରଣାରେ ବସିଲେ । ଏନେଇ ସ୍ଥାନୀୟଲୋକେ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ପରିବାର ଲୋକଙ୍କୁ ବୁଝାସୁଝା କରି ଘଟଣାର ତଦନ୍ତ ଆରମ୍ଭ କରିଛି ।
