ନୂଆଦିଲ୍ଲୀ,୨୨/୧୦:ଦିନକୁ ଦିନ ରାଜଧାନୀ ଦିଲ୍ଲୀରେ ବଢ଼ି ଚାଲିଛି ପ୍ରଦୂଷଣ। ଦୀପାବଳି ପୂର୍ବରୁ ରାଜଧାନୀ ଦିଲ୍ଲୀର ଅବସ୍ତା ବେହାଲ। ବାୟୁର ଗୁଣବତ୍ତା ଦିନକୁ ଦିନ ଅତି ନିମ୍ନସ୍ତରକୁ ଖସି ଚାଲିଛି। ବିଷାକ୍ତ ହେବାରେ ଲାଗିଛି ବାୟୁ । ଆଖି ଜଳିବା ସହ ନିଶ୍ୱାସ ନେବା ବି ଏବେ କଷ୍ଟକର ହୋଇପଡିଲାଣି। ଯାହାକୁ ନେଇ ଆଜିଠୁ ଦିଲ୍ଲୀରେ ଗ୍ରେଡେଡ୍ ରେସ୍ପନ୍ସ ଆକ୍ସନ ପ୍ଲାନ୍ ବା GRPA ଫେଜ୍-୨ ଲାଗୁ କରାଯାଇଛି।
ସୂଚନା ମୁତାବକ, ଆଜି ସକାଳ ୮ଟାରୁ ଦିଲ୍ଲୀରେ ଡିଜେଲ ଚାଳିତ ଜେନେରେଟର ଉପରେ ମଧ୍ୟ ରୋକ୍ ଲାଗାଯାଇଛି। ଏଥିସହ କୋଇଲାରେ ଜଳୁଥିବା ଭାଟି ତଥା ତନ୍ଦୁର ମଧ୍ୟ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି। ସେହିପରି ଦିଲ୍ଲୀ ସରକାରଙ୍କ ରେଡ୍ ଲଇଟ୍ ଅନ୍, ଗାଡ଼ି ଅଫ୍ ଅଭିଯାନ ଆଜିଠୁ ଆରମ୍ଭ ହୋଇଛି। ଦିଲ୍ଲୀରେ ଗାଡି ଚଳାଚଳ କମ୍ କରିବା ପାଇଁ ପାର୍କିଂ ଫିସ୍କୁ ମଧ୍ୟ ବଢ଼ାଇ ଦିଆଯାଇଛି। ତେବେ ଶୀତ ନ ଆସୁଣୁ ଦିଲ୍ଲୀର ଅବସ୍ଥା ବେହାଲ ହୋଇପଡିଛି। କେନ୍ଦ୍ରୀୟ ପ୍ରଦୂଷଣ ବୋର୍ଡ ମୁତାବକ, ଦିଲ୍ଲୀରେ ବାୟୁର ଗୁଣବତ୍ତା ଅତ୍ୟନ୍ତ ଖରାପ ଶ୍ରେଣୀରେ ପହଞ୍ଚିଛି। ୧୩ଟି ସ୍ଥାନକୁ ହଟ୍ସ୍ପଟ୍ ରୂପେ ଚିହ୍ନଟ କରାଯାଇଛି। ସବୁଠାରୁ ଉପରେ ରହିଛି ଆନନ୍ଦ ବିହାର। ଆଜି ସକାଳ ୮ଟା ସୁଦ୍ଧା ଏଠାକାର ବାୟୁର ଗୁଣବତ୍ତା ୩୮୫ ରେକର୍ଡ କରାଯାଇଛି।ସମସ୍ତ ଅଞ୍ଚଳକୁ ରେଡ୍ ଜୋନ୍ ଭିତରେ ରଖାଯାଇଛି। ଅଧିକାଂଶ ଅଞ୍ଚଳର ଏୟାର କ୍ୱାଲିଟି ଇଣ୍ଡେକ୍ସ ଅତ୍ୟନ୍ତ ଖରାପ ଶ୍ରେଣୀରେ ଥିବା ସୂଚନା ମିଳିଛି।
