ଭୁବନେଶ୍ବର,୨୨।୧୦: ବଙ୍ଗୋପସାଗରରେ ସୃଷ୍ଟି ହୋଇଥିବା ଅବପାତ ଆଜି ଗଭୀର ଅବପାତରେ ପରିଣତ ହେବ। ୨୩ ତାରିଖ ସକାଳେ ଏହା ବାତ୍ୟାର ରୂପ ନେବ। ଅକ୍ଟୋବର ୨୪ ରାତିରେ ଓଡ଼ିଶା ଉପକୂଳ ପାର ହେବାର ସମ୍ଭାବନା ରହିଛି। ଏନେଇ ଶିକ୍ଷା ଓ ଅନୁସନ୍ଧାନ (ସୋଆ) ପରିଚାଳିତ ପରିବେଶ ଓ ଜଳବାୟୁ କେନ୍ଦ୍ର (ସିଇସି) ପକ୍ଷରୁ ସୂଚନା ଦିଆଯାଇଛି।କେନ୍ଦ୍ରାପଡା ଏବଂ ଭଦ୍ରକ ଜିଲ୍ଲାର ଉପକୂଳବର୍ତ୍ତୀ ଅଞ୍ଚଳରେ ବାତ୍ୟା ଲ୍ୟାଣ୍ଡଫଲ କରିବାର ଆଶଙ୍କା ରହିଛି ବୋଲି ସିଇସି ନିର୍ଦ୍ଦେଶକ ଡକ୍ଟର ଶରତ ଚନ୍ଦ୍ର ସାହୁ କହିଛନ୍ତି। ଏହି ସମୟରେ, ଉତ୍ତର ଆଣ୍ଡାମାନ ସାଗରରେ ସୃଷ୍ଟି ହୋଇଥିବା ଲଘୁଚାପ ମଙ୍ଗଳବାର ସକାଳେ  ଅବପାତରେ ପରିଣତ ହୋଇ ପଶ୍ଚିମ-ଉତ୍ତର ପଶ୍ଚିମ ଦିଗରେ ଗତି କରୁଛି ।ମଙ୍ଗଳବାର ସକାଳ ୮ଟା ୩୦ ମିନିଟ୍‌ରେ ପାରାଦୀପ ଠାରୁ ପ୍ରାୟ ୭୦୦ କିଲୋମିଟର ଦକ୍ଷିଣ ପୂର୍ବରେ କେନ୍ଦ୍ରୀଭୂତ ହୋଇଛି ବୋଲି ସେ କହିଛନ୍ତି।

ଏହାର ତୀବ୍ରତା ଜାରି ରହିବ ଏବଂ ଅକ୍ଟୋବର ୨୩ ସନ୍ଧ୍ୟାରେ ଏହା ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗରରେ ଏକ ଘୂର୍ଣ୍ଣିବଳୟ ଝଡରେ ପରିଣତ ହେବ ବୋଲି ଆଶା କରାଯାଉଛି। ପରେ ଏହା ପଶ୍ଚିମ-ଉତ୍ତର ପଶ୍ଚିମ ଦିଗରେ ଆଉ ୨୪ ଘଣ୍ଟା ଗତି କରିବାର ସମ୍ଭାବନା ଅଛି। ଏହାପରେ ଉତ୍ତର-ପଶ୍ଚିମ ଦିଗକୁ ଗତି କରି ଅକ୍ଟୋବର ୨୪  ରାତିରେ ଉପକୂଳ ପାର କରିବାର ସମ୍ଭାବନା ଅଛି।

ଅକ୍ଟୋବର ୨୪ ଅପରାହ୍ନରେ ସମୁଦ୍ରରେ ପବନର ବେଗ ୧୨୦ କିଲୋମିଟର ଛୁଇଁପାରେ କିନ୍ତୁ ଉପକୂଳ ପାର ହେବାବେଳେ ସେହି ରାତିରେ ଓଡ଼ିଶା ଉପକୂଳରେ ଏହାର ଗତି ୮୫-୧୧୦ କିଲୋମିଟରକୁ ହ୍ରାସ ପାଇପାରେ। ଭୁବନେଶ୍ୱର ସହର ଏବଂ ନିକଟବର୍ତ୍ତୀ ଅଞ୍ଚଳରେ ୨୪ ଅକ୍ଟୋବର ରାତିରେ ୫୫ ରୁ ୭୦ କିଲୋମିଟର ଏବଂ ୨୫ ଅକ୍ଟୋବରରେ ବ୍ରହ୍ମପୁରରେ ୪୫-୫୫ କିଲୋମିଟର ବେଗରେ ପବନର ବେଗ ରହିପାରେ ଯାହା ବିଳମ୍ବିତ ରାତି ପର୍ଯ୍ୟନ୍ତ ଅନୁଭୂତ ହେବ।

ଅକ୍ଟୋବର ୨୨ ର ସନ୍ଧ୍ୟା କିମ୍ବା ରାତିରେ ମୟୂରଭଞ୍ଜ, ବାଲେଶ୍ବର, ଭଦ୍ରକ ଏବଂ କେନ୍ଦୁଝର ଜିଲ୍ଲାରେ ମଧ୍ୟମରୁ ପ୍ରବଳ ବର୍ଷା ଆରମ୍ଭ ହେବ, ଯାହା ପରଦିନ ପର୍ଯ୍ୟନ୍ତ ଜାରି ରହିବ। ଅକ୍ଟୋବର ୨୪ ଅପରାହ୍ନରୁ ଭଦ୍ରକ, ଯାଜପୁର, କେନ୍ଦ୍ରାପଡା, ଖୋର୍ଦ୍ଧା, କଟକ, ପୁରୀ, ନୟାଗଡ଼ ଏବଂ ଗଞ୍ଜାମ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ ଏବଂ ଅକ୍ଟୋବର ୨୫ ଅପରାହ୍ନ ପର୍ଯ୍ୟନ୍ତ ଜାରି ରହିବ ବୋଲି ଡକ୍ଟର ସାହୁ କହିଛନ୍ତି।ଓଡିଶା ଉପକୂଳ ଅତିକ୍ରମ କରିବା ପରେ ଏହା ଦୁର୍ବଳ ହୋଇ ଦକ୍ଷିଣ-ଦକ୍ଷିଣ ପଶ୍ଚିମ ଦିଗରେ କୋରାପୁଟ ଜିଲ୍ଲା ଆଡକୁ ଯାଇପାରେ ଏବଂ ଅକ୍ଟୋବର ୨୬ ପର୍ଯ୍ୟନ୍ତ ଦକ୍ଷିଣ ଓଡିଶା ଜିଲ୍ଲାରେ ବର୍ଷା ହୋଇପାରେ ବୋଲି ସେ କହିଛନ୍ତି।