ଭୁବନେଶ୍ୱର,୦୩/୦୧: ବୁଲା ଗୋରୁଙ୍କୁ ଥଇଥାନ ପାଇଁ ରାଜ୍ୟ ସରକାର ନୂଆ ଯୋଜନା ଆଣୁଛନ୍ତି । ବୁଲା ଗୋରୁଙ୍କ ଯତ୍ନ ନେଲେ ସରକାର ବର୍ଷକୁ ୨୦ ହଜାର ଟଙ୍କାର ସହାୟତା ରାଶି ଯୋଗାଇ ଦେବେ । ଏହା ସହ ଗୋଶାଳା ନିର୍ମାଣ କରିବାକୁ ୫୨ ଲକ୍ଷ ଟଙ୍କାର ସହାୟତା ଯୋଗାଇ ଦିଆଯିବ ବୋଲି ଆଜି ପଶୁ ସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ କହିଛନ୍ତି ।
ପଶୁ ସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ କହିଛନ୍ତି ଯେ, ଭୁବନେଶ୍ୱର ସମେତ ଅନ୍ୟ ପୌରାଞ୍ଚଳକୁ ବୁଲା ଗୋରୁ ମୁକ୍ତ କରାଯିବ । ଏନେଇ ପଦକ୍ଷେପ ନିଆଯାଉଛି । ଗାଈ ଓ ଷଣ୍ଢଙ୍କୁ ଉଦ୍ଧାର କରାଯାଇ ଗୋଶାଳାରେ ରଖାଯିବ । ରାଜଧାନୀକୁ ବୁଲା ଗୋରୁଗାଈ ମୁକ୍ତ କରିବାକୁ କୋଟି କୋଟି ଟଙ୍କା ଖର୍ଚ୍ଚ ହେଉଛି । ତଥାପି ମାଳ ମାଳ ଗୋରୁଗାଈ ରାସ୍ତାରେ ବୁଲୁଛନ୍ତି । ଆଗକୁ ପ୍ରବାସୀ ଭାରତୀୟ ସମ୍ମିଳନୀ ରହିଛି । ଏଥିପାଇଁ ବୁଲା ଗୋରୁଙ୍କୁ ହଟାଇବାକୁ ବିଏମ୍ସି ନିର୍ଦ୍ଦେଶିତ ହୋଇଛି । ହେଲେ ବିଏମ୍ସି ପକ୍ଷରୁ କୌଣସି ପଦକ୍ଷେପ ନିଆଯାଉନି ।
