ନୂଆଦିଲ୍ଲୀ, ୨୪/୧୨: ଏଣିକି ୫ମ ଏବଂ ୮ମ ଶ୍ରେଣୀ ବାର୍ଷିକ ପରୀକ୍ଷାରେ ଫେଲ୍ ହେଲେ ଛାତ୍ରଛାତ୍ରୀଙ୍କୁ ସ୍ୱତଃପ୍ରବୃତ୍ତ ଆଉ ଉପର ଶ୍ରେଣୀକୁ ଉନ୍ନୀତ କରାଯିବ ନାହିଁ । ସେମାନଙ୍କୁ ଫେଲ୍ ବୋଲି ଦର୍ଶାଯିବ ଓ ସେମାନେ ପୁଣିଥରେ ସେହି ଶ୍ରେଣୀରେ ପଢ଼ିବେ । କାରଣ ପୂର୍ବରୁ ଥିବା ‘ନୋ ଡିଟେନ୍ସନ ପଲିସି’କୁ କେନ୍ଦ୍ର ସରକାର ସୋମବାର ଉଠାଇ ଦେଇଛନ୍ତି । ଫେଲ୍ ପିଲାଙ୍କ ଲାଗି ପୁନଃ ପରୀକ୍ଷାର ବ୍ୟବସ୍ଥା ରଖାଯାଇଛି ।
ପଞ୍ଚମ ଓ ଅଷ୍ଟମ ଶ୍ରେଣୀରେ ପାସ୍ ହୋଇନଥିବା ଛାତ୍ରଛାତ୍ରୀଙ୍କୁ ୨ ମାସରେ ପୁନଃ ପରୀକ୍ଷା ଦେବାକୁ ସୁଯୋଗ ମିଳିବ । ଦ୍ୱିତୀୟ ଥର ପରୀକ୍ଷାରେ କୃତକାର୍ଯ୍ୟ ହେଲେ ଉପର ଶ୍ରେଣୀକୁ ଉନ୍ନୀତ କରାଯିବ । ନଚେତ ସେମାନେ ପୁଣିଥରେ ସେହି ଶ୍ରେଣୀରେ ପଢ଼ିବେ । କେନ୍ଦ୍ର ଶିକ୍ଷା ମନ୍ତ୍ରଣାଳୟ ଏଥିଲାଗି ନୂଆ ପ୍ରାବଧାନ ଆଣିଛି । ଏହା ଅନୁସାରେ ୮ମ ଶ୍ରେଣୀ ପର୍ଯ୍ୟନ୍ତ ଫେଲ୍ ପିଲାଙ୍କୁ ସ୍କୁଲରୁ ବାହାର କରାଯିବ ନାହିଁ । ପିଲାଙ୍କ ଶିକ୍ଷା ଗୁଣବତ୍ତା ବଢ଼ାଇବା ଲାଗି ଏହି ନିଷ୍ପତ୍ତି ନିଆଯାଇଥିବା ସ୍କୁଲ ଶିକ୍ଷା ଏବଂ ସାକ୍ଷରତା ବିଭାଗ ସଚିବ ସଞ୍ଜୟ କୁମାର କହିଛନ୍ତି । ଦେଶର ୩ ହଜାରରୁ ଊଦ୍ଧ୍ୱର୍ କେନ୍ଦ୍ରୀୟ ବିଦ୍ୟାଳୟରେ ଏହି ନୂଆ ନିୟମ ଲାଗୁ କରାଯିବ । ଏଥିରେ କେନ୍ଦ୍ରୀୟ ବିଦ୍ୟାଳୟ, ନବୋଦୟ ବିଦ୍ୟାଳୟ ଏବଂ ସୈନିକ ସ୍କୁଲ ରହିଛି । ପୂର୍ବରୁ ୧୬ ରାଜ୍ୟ ଏବଂ ୨ କେନ୍ଦ୍ର ଶାସିତ ଅଞ୍ଚଳ (ଦିଲ୍ଲୀ ଏବଂ ପୁଡୁଚେରୀ) ନୋ-ଡିଟେନସନ ପଲିସି ଶେଷ କରିସାରିଛନ୍ତି ।
ଶିକ୍ଷା ମନ୍ତ୍ରଣାଳୟ ଅନୁସାରେ ସ୍କୁଲ ଶିକ୍ଷା ହେଉଛି ରାଜ୍ୟର ବିଷୟ । ତେଣୁ ରାଜ୍ୟଗୁଡ଼ିକ ଶିକ୍ଷା ବାବଦରେ ସ୍ୱତନ୍ତ୍ର ନିଷ୍ପତ୍ତି ନେଇପାରିବେ । କେନ୍ଦ୍ର ସରକାରଙ୍କ ନୂଆ ନୀତି ଅନୁସାରେ, ଆବଶ୍ୟକ ପଡ଼ିଲେ ଶ୍ରେଣୀ ଶିକ୍ଷକ ଛାତ୍ରଛାତ୍ରୀଙ୍କ ଦୁର୍ବଳତା ଚିହ୍ନଟ କରି ସେମାନଙ୍କ ବାପାମା’ଙ୍କ ସହ ଆଲୋଚନା କରିବା ସହ ସ୍ୱତନ୍ତ୍ର ଇନ୍ପୁଟ ଦେବେ । ପ୍ରିନ୍ସପାଲ ୫ମ ଏବଂ ୮ମ ଶ୍ରେଣୀରୁ ଉନ୍ନୀତ ହୋଇ ନ ଥିବା ଛାତ୍ରଛାତ୍ରୀଙ୍କ ତାଲିକା ବନାଇ ପାଠପଢ଼ାରେ ସେମାନଙ୍କ ଅଗ୍ରଗତିକୁ ତଦାରଖ କରିବେ । ଏପରି ଛାତ୍ରଛାତ୍ରୀଙ୍କ ପରୀକ୍ଷା ଏବଂ ପୁନଃ ପରୀକ୍ଷା ସେମାନଙ୍କ ସ୍ମୃତି ଶକ୍ତି ଉପରେ ଆଧାରିତ ହେବନାହିଁ । ଯେପର୍ଯ୍ୟନ୍ତ ପିଲାଙ୍କ ମୌଳିକ ଶିକ୍ଷା ସମ୍ପୂର୍ଣ୍ଣ ନ ହୋଇଛି, ସ୍କୁଲରୁ ବାହାର କରାଯିବ ନାହିଁ । ଶୈଖିକ ପ୍ରଦର୍ଶନରେ ସୁଧାର ଲାଗି କେନ୍ଦ୍ର ସରକାରଙ୍କ ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି ।
ନୋ ଡିଟେନ୍ସନ ପଲିସି ଶିକ୍ଷା ଅଧିକାର ଆଇନ ୨୦୦୯ର ଅଂଶବିଶେଷ । ଭାରତର ଶିକ୍ଷା ନୀତିରେ ସୁଧାର ଆଣିବା ଲାଗି ସରକାର ଏହି ନିୟମ ଆଣିଥିଲେ । ୨୦୧୮ରେ ଶିକ୍ଷା ଅଧିକାର ଆଇନରେ ସଂଶୋଧନ କରିବା ଲାଗି ଲୋକସଭାରେ ବିଧେୟକ ଗୃହୀତ ହୋଇଥିଲା । ଏହା ଅନୁସାରେ ୫ମ ଏବଂ ୮ମ ଶ୍ରେଣୀ ପିଲାଙ୍କ ପାଇଁ ରେଗୁଲାର ପରୀକ୍ଷା ଏବଂ ଫେଲ୍ ହେଉଥିବା ପିଲାଙ୍କ ପାଇଁ ୨ ମାସରେ ପୁନଃ ପରୀକ୍ଷା କରାଇବା କଥା କୁହାଯାଇଥିଲା । ୨୦୧୯ରେ ରାଜ୍ୟସଭାରେ ବିଲ୍ ପାସ୍ ହୋଇଥିଲା । ଏହି ନୀତିକୁ ଜାରି ରଖିବେ ନା ଉଚ୍ଛେଦ କରିବେ ନିଷ୍ପତ୍ତି ରାଜ୍ୟ ଉପରେ ଛଡ଼ାଯାଇଥିଲା ।
