ବ୍ରହ୍ମପୁର,୧୧/୦୯: ଚୋରି କରିବା ପାଇଁ ଘରେ ପଶିଥିଲା ଦୁର୍ବୃତ୍ତ । ଧରା ପଡ଼ିବା ଭୟରେ ଦମ୍ପତ୍ତିଙ୍କୁ ମରଣାନ୍ତକ ଆକ୍ରମଣ କଲା । ଏହି ଆକ୍ରମଣରେ ସ୍ୱାମୀ ସତୀଶ କୁମାର ସୁବୁଦ୍ଧି ଏବଂ ସ୍ତ୍ରୀ ଶ୍ରବନ୍ତି ସୁବୁଦ୍ଧି ଗୁରୁତର ଭାବେ ଆହତ ହୋଇଛନ୍ତି ।  ବ୍ରହ୍ମପୁର ବଡବଜାର ଥାନା ଗୌଡ଼ ସାହିରେ ଏଭଳି ଘଟଣା ଘଟିଛି ।

ସୂଚନା ମୁତାବକ, ସତୀଶ ଜଣେ ସୁନା ବ୍ୟବସାୟୀ । ସେ ମଙ୍ଗଳବାର ରାତିରେ ଖାଇ ସାରି ଘରେ ଶୋଇଥିଲେ । ବୁଧବାର ଭୋର ସମୟରେ ଘର ଭିତରେ ଶବ୍ଦ ହେଉଥିବା ଶୁଣି ଶ୍ରବନ୍ତି ତାଙ୍କ ସ୍ୱାମୀଙ୍କୁ ଉଠାଇଥିଲେ । ସେମାନେ ବାହାରକୁ ଆସି କଣ ହେଉଛି ଦେଖିବା ବେଳକୁ ଘରୁ ଚୋରି କରିବା ପାଇଁ ଆସିଥିବା ଦୁର୍ବୃତ୍ତ ଜଣଙ୍କ ଖଣ୍ଡାରେ ସତୀଶଙ୍କୁ ଆକ୍ରମଣ ହୋଇଥିଲା । ସତିଶଙ୍କ ବେକରେ ଖଣ୍ଡା ଚୋଟ ପକାଇ  ତାଙ୍କ ସ୍ତ୍ରୀଙ୍କ ଦୁଇ  ହାତ ଖଣ୍ଡା ଚୋଟ ପକାଇଛି ଚୋର । ସ୍ୱାମୀଙ୍କୁ ହାଣି ଦେଉଥିବା ଦେଖି ଶ୍ରବନ୍ତି ତାହାର ପ୍ରତିବାଦ କରିଥିଲେ । ଏହା ଦେଖି ମହିଳା ଜଣଙ୍କ ଘର ବାହାରକୁ ଆସି ଚିତ୍କାର କରିଥିଲେ । ମହିଳାଙ୍କ ଚିତ୍କାର ଶୁଣି ସାହି ଲୋକ ସେଠାରେ ପହଞ୍ଚି ଉଭୟ ଆହତଙ୍କୁ ଉଦ୍ଧାର କରି ଏମକେସିଜି ମେଡିକାଲରେ ଭର୍ତ୍ତି କରିଥିଲେ । ପରେ ଏହି ଘଟଣା ସମ୍ୱନ୍ଧରେ ପୋଲିସକୁ ଖବର ଦେଇଥିଲେ ସାହି ଲୋକେ । ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ କରିବା ସହ ଆହତଙ୍କୁ ମେଡିକାଲରେ ଭେଟି ଘଟଣା ସମ୍ପର୍କରେ ପଚରାଉଚରା କରୁଛି । ଲୂଟେରା ଜଣଙ୍କ ଘର ଉପର ମହଲାରେ ଗ୍ରୀଲ କାଟି ଘରେ ପଶି ଏହି କାଣ୍ଡ କରିଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । ଏହି ଘଟଣାକୁ ନେଇ ଅଞ୍ଚଳରେ ଓ ବ୍ୟବସାୟୀଙ୍କ ମହଲରେ ଚାଞ୍ଚଲ୍ୟ ଖେଳିଯାଇଛି।