ଯୋଡା,୧୮/୦୨: କେନ୍ଦୁଝର ଜିଲ୍ଲାର ଯୋଡ଼ା ଅଞ୍ଚଳରେ ଥିବା ଚାଷୀମାନଙ୍କୁ ସହଯୋଗ କରିବା ଲାଗି ଟାଟା ଷ୍ଟିଲ୍ ଫାଉଣ୍ଡେସନ୍ (ଟିଏସ୍ଏଫ୍) ନିରନ୍ତର ଉଦ୍ୟମ ଜାରି ରଖିଛି। ଏହି ଅଞ୍ଚଳରେ ମାଛ ଚାଷ ମାଧ୍ୟମରେ ଚାଷୀମାନଙ୍କ ଜୀବନଜୀବିକାରେ ହୋଇଥିବା ଉନ୍ନତି ସ୍ପଷ୍ଟ ଭାବେ ପରିଲକ୍ଷିତ ହେଉଛି।
ଯୋଡ଼ାର ସ୍ଥାନୀୟ ଅର୍ଥନୀତି ମୁଖ୍ୟତଃ, ଖଣି ଓ ଧାନ ଚାଷ ଉପରେ ନିର୍ଭରଶୀଳ। ଅନିୟମିତ ବର୍ଷା ଓ ଫସଲ ଅମଳରେ ଲଗାତାର ଦେଖାଦେଉଥିବା ଅସ୍ଥିରତା ଦ୍ୱାରା ଏହି ଅଞ୍ଚଳର ଚାଷ ପ୍ରଭାବିତ ହେଉଥିଲା। ତେଣୁ ଏହି ଅଞ୍ଚଳରେ ଫସଲରେ ବିବିଧତା ଆଣିବା ଏକ ଆବଶ୍ୟକତା ହୋଇପଡ଼ିଥିଲା।
ଏହି ସମସ୍ୟାକୁ ବୁଝିପାରି, ଟିଏସ୍ଏଫ୍ ସହଯୋଗ କରିବା ପରେ ଏହି ଅଞ୍ଚଳର ୩୯୨ ଜଣ ଚାଷୀ ପୋଖରୀରେ ମାଛ ଚାଷ ଭଳି କାର୍ଯ୍ୟ ହାତକୁ ନେଇ ନିଜ ଆୟ ବଢ଼ାଇବାରେ ସକ୍ଷମ ହୋଇଛନ୍ତି।
ଯୋଡ଼ା ଅନ୍ତର୍ଗତ ସରସପୋଷୀ ଅଞ୍ଚଳର ସେଭଳି ଜଣେ ଚାଷୀ ହେଉଛନ୍ତି ସୁବାସ ମହାନ୍ତ। ଟିଏସ୍ଏଫ୍ର ମାର୍ଗଦର୍ଶନ ଓ ସହଯୋଗରେ ସେ ନିଜ ଚାଷ ଜମିରେ ପୋଖରୀ ଖୋଳି ମାଛ ଚାଷ ଆରମ୍ଭ କରିଛନ୍ତି। ଗତବର୍ଷ ବଡ଼ଦିନ ସମୟରେ ସେ ୧୩୨ କିଲୋ ମାଛ ଅମଳ କରିଥିଲେ। ମାଛ ଚାଷର ସେହି ସଫଳତାରେ ଉତ୍ସାହିତ ହୋଇ ସେ ଚଳିତ ବର୍ଷ ମାର୍ଚ୍ଚ ମାସ ରେ ଆଉ ଥରେ ମାଛ ଅମଳ କରିବାକୁ ଯୋଜନା କରିଛନ୍ତି।
ସୁବାସ କହିଛନ୍ତି ଯେ, “ମାଛ ଚାଷ ଆମ ପାଇଁ ନୂଆ ସୁଯୋଗ ଆଣିଦେଇଛି। ଏଥିପାଇଁ ଟାଟା ଷ୍ଟିଲ୍ ଫାଉଣ୍ଡେସନକୁ ଆମେ ଧନ୍ୟବାଦ ଜଣାଇବାକୁ ଚାହୁଁଛୁ। ମୋର ଏବେ ଏକ ସ୍ଥିର ଦ୍ୱିତୀୟ ଆୟ ଅଛି ଏବଂ ତାହା ବଢ଼ାଇବା ପାଇଁ ମୁଁ ଚେଷ୍ଟା ଜାରିରଖିଛି ।’’ ସୁବାସଙ୍କ ସଫଳତା ଗ୍ରାମୀଣ ସମୁଦାୟକୁ ସଶକ୍ତ କରିବାରେ ମାଛ ଚାଷ ଓ ଟିଏସ୍ଏଫ୍ ଗ୍ରହଣ କରୁଥିବା ଭୂମିକା ଉପରେ ଆଲୋକପାତ କରୁଛି।
ପୋଖରୀଗୁଡ଼ିକ କେବଳ ମାଛ ଚାଷ ନୁହେଁ, ପନିପରିବା ଚାଷରେ ସହାୟକ ହୋଇଛି, ଯାହା ଅତିରିକ୍ତ ଆୟ ପ୍ରଦାନ କରୁଛି। ଅନେକ ଚାଷୀ ନିଜ ପାରମ୍ପରିକ ଚାଷ ପଦ୍ଧତି ସହିତ ମାଛ ଚାଷକୁ ଯୋଡ଼ିଛନ୍ତି ଯାହା ଫସଲ ବିବିଧୀକରଣର ବର୍ଦ୍ଧିତ ଧାରାକୁ ଦର୍ଶାଉଛି।
ପୋଖରୀ ଖୋଳାଯାଇଥିବାରୁ ଏହି ଅଞ୍ଚଳର ଜଳ ଧାରଣ କ୍ଷମତାରେ ଉଲ୍ଲେଖନୀୟ ଉନ୍ନତି ହୋଇପାରିଛି। ଏହା ଜଳ ଉପଲବ୍ଧତାକୁ ବଢ଼ାଇଥିବା ବେଳେ ଉଭୟ ଫସଲ ଚାଷ ଓ ମାଛ ଚାଷରେ ତାହା ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛି, ଫଳରେ ଉତ୍ପାଦକତା ଓ ଜୀବନଜୀବିକାରେ ଉନ୍ନତି ସହିତ ଚାଷୀମାନେ ସଶକ୍ତ ହୋଇପାରିଛନ୍ତି।
ସ୍ଥାନୀୟ ଲୋକମାନଙ୍କ ଜୀବନଜୀବିକାରେ ଉନ୍ନତି ଆଣିବା ହେଉଛି ଟାଟା ଷ୍ଟିଲ୍ର ମୁଖ୍ୟ ଉଦ୍ଦେଶ୍ୟ। ମାଛ ଚାଷ ଜରିଆରେ ଅତିରିକ୍ତ ଆୟ ଉତ୍ସ ସୃଷ୍ଟି କରିବା ସେହି ଉଦ୍ଦେଶ୍ୟକୁ ପୂରଣ କରୁଥିବା ବେଳେ ପାରମ୍ପରିକ ଚାଷ ପାଇଁ ଜଳ ଉପଲବ୍ଧତାରେ ମଧ୍ୟ ତାହା ଉନ୍ନତି ଆଣିପାରିଛି।
