ନୂଆଦିଲ୍ଲୀ : ଦିଲ୍ଲୀର ବୁରାରିରେ ବଡ଼ ଦୁର୍ଘଟଣା ଘଟିଥିବା ଖବର ସାମନାକୁ ଆସିଛି। ଏଠାରେ ୪ ମହଲା ବିଲ୍ଡିଂ ଭାଙ୍ଗିବାରୁ ଆତଙ୍କ ଖେଳି ଯାଇଛି। ଭଗ୍ନାବଶେଷରେ ଅନେକ ଶ୍ରମିକଙ୍କ ଫସି ରହିବାର ଆଶଙ୍କା ରହିଛି। ସେଠାରେ ଦୁର୍ଘଟଣାର ସୂଚନା ମିଳିବା କ୍ଷଣି ପୁଲିସ, ଦମକଳ ଓ ଏନଡିଆରଏଫ୍ ର ଯବାନ ଘଟଣା ସ୍ଥଳରେ ପହଞ୍ଚି ଯାଇଛନ୍ତି।
ଘଟଣା ସୋମବାର ସନ୍ଧ୍ୟା ୭ଟା ସମୟ ପାଖାପାଖି ଥିବା କୁହାଯାଉଛି । ସେଠାରେ ଦମକଳର ୯ଟି ଗାଡ଼ି ମଧ୍ୟ ଉଦ୍ଧାର କାର୍ଯ୍ୟ ପାଇଁ ବାହାରି ଯାଇଛନ୍ତି। ଭଗ୍ନାବଶେଷରେ ଫସି ରହିଥିବା ଲୋକଙ୍କୁ ବଞ୍ଚାଇବା ପାଇଁ ରେସ୍କ୍ୟୁ ଅପରେସନ ଆରମ୍ଭ ହୋଇ ଯାଇଛି। ଏହି ସମୟରେ ୬ଜଣ ଲୋକଙ୍କୁ ସଠିକ୍ ଭାବେ ବାହାରକୁ ଆଣି ହସ୍ପିଟାଲ ନିଆଯାଇଛି। ଅନ୍ୟ ଫସି ରହିଥିବା ଲୋକଙ୍କୁ ବାହାରକୁ ଆଣିବା ପାଇଁ ଉଦ୍ଧାର ଅଭିଯାନ ଜାରି ରହିଛି। ଏଥିପାଇଁ ଏନଡିଆରଏଫ୍ର ମେସିନ ମଧ୍ୟ ମଗା ଯାଇଛି।
ଘଟଣା ବୁରାଡିର କୌଶିକ ଏନକ୍ଲେଭ୍ର ଓସ୍କାର ପବ୍ଲିକ ସ୍କୁଲ ନିକଟରେ ଘଟିଥିବା କୁହାଯାଉଛି। ସୂଚନା ମୁତାବିକ ଦୁର୍ଘଟଣା ପରେ ପୂରା ଅଞ୍ଚଳରେ ବିଦ୍ୟୁତ୍ ମଧ୍ୟ କାଟି ଦିଆଯାଇଛି।
ଏହା ପୂର୍ବରୁ ଉତ୍ତର-ପୂର୍ବ ଦିଲ୍ଲୀର ବ୍ରହ୍ମପୁରୀ ଅଞଚଳରେ ଗୁରୁବାର ଏକ କୋଠାର ଆଶିଂକ ଭୁଶୁଡିବାରୁ ୫ଜଣ ଶ୍ରମିକ ଆହତ ହୋଇଥିଲେ। ପୁଲିସ କହିଛିକି ସନ୍ଧ୍ୟା ସମୟ ପାଖାପାଖି ୫.୨୫ରେ କୋଠା ସଂଖ୍ୟା ୫୩ର ୩ୟ ମହଲାର କାନ୍ଥ ହଠାତ୍ ଭୁଶୁଡ଼ି ଯାଇଛି, ଯେଉଁଥିରେ ପଡୋଶୀଙ୍କ କୋଠାର ଛାତକୁ କ୍ଷତି ଘଟିଛି।
ଘଟଣା ସମୟରେ କାନ୍ଥକୁ ଭାଙ୍ଗିବା କାମ କରାଯାଉ ଥିଲା। ଏହି ସମ୍ୱନ୍ଧରେ ଜଣେ ଅଧିକାରୀ କହିଛନ୍ତି, ଘଟଣାର ତୁରନ୍ତ ପରେ ଉଦ୍ଧାର ଓ ସୁରକ୍ଷା ଟିମ୍ ଘଟଣା ସ୍ଥଳରେ ପହଞ୍ଚି ଯାଇଛି। ବରିଷ୍ଠ ପୁଲିସ ଅଧିକାରୀ ଓ ଅଗ୍ନିଶମ ବାହିନୀର ଟିମ୍ ମଧ୍ୟ ସେଠାରେ ପହଞ୍ଚିଛନ୍ତି ଏବଂ ଉଦ୍ଧାର ଅଭିଯାନ ଆରମ୍ଭ ହୋଇ ଯାଇଛି।
