ନୂଆଦିଲ୍ଲୀ, ୨୧। ୧୦: ତିନି ଥର ଜମ୍ମୁକାଶ୍ମୀରର ମୁଖ୍ୟମନ୍ତ୍ରୀ ପଦ ସମ୍ଭାଳିଛନ୍ତି ଫାରୁକ୍ ଅବଦୁଲ୍ଲା । ୧୨ ବର୍ଷ ଧରି ମୁଖ୍ୟମନ୍ତ୍ରୀର ଭୂମିକା ତୁଲାଇଛନ୍ତି । ଆଜି ସେ ୮୪ ବର୍ଷରେ ପାଦ ଥାପିଛନ୍ତି ଫାରୁକ ଅବଦୁଲ୍ଲା ମନମୋହନ ସିଂସରକାରରେ କ୍ୟାବିନେଟ୍ ମନ୍ତ୍ରୀ ଥିଲେ । ଗତ ୫ ଦଶକ ଧରି ଜମ୍ମୁକାଶ୍ମୀର ରାଜନୀତିରେ ସକ୍ରିୟ ଅଛନ୍ତି । ୨୦୧୪ ପରେ ସେ ବିଜେପି ମୋର୍ଚ୍ଚାର ଖୋଲାଖୋଲି ସମର୍ଥନ କରିଥିଲେ । ବର୍ତ୍ତମାନ ସେ ଜମ୍ମୁ କାଶ୍ମୀର ନ୍ୟାସନାଲ କନଫରେନ୍ସର ଅଧ୍ୟକ୍ଷ ଭାବେ ଦାୟିତ୍ୱ ତୁଲାଉଛନ୍ତି ।
ଡା. ଫାରୁକ୍ ଅବଦୁଲ୍ଲାଙ୍କ ଜନ୍ମ ୧୯୩୭ ଅକ୍ଟୋବର ୨୧ରେ କାଶ୍ମୀରର ଏକ ରାଜନୈତିକ ପରିବାରରେ ତାଙ୍କର ଜନ୍ମ । ତାଙ୍କ ବାପା ଶେଖ୍ ଅବଦୁଲ୍ଲା ଜମ୍ମୁ-କାଶ୍ମୀରର ପ୍ରଥମ ନିର୍ବାଚିତ ମୁଖ୍ୟମନ୍ତ୍ରୀ ଥିଲେ । ଫାରୁକ୍ ନିଜ ପାଠପଢ଼ା ସାରିବା ପରେ ଲଣ୍ଡନରେ ଡାକ୍ତରୀ ପାଠ ପଢ଼ିଥିଲେ । ତାଙ୍କ ସ୍ତ୍ରୀ ମୌଲୀ ଜଣେ ବ୍ରିଟିଶ ନର୍ସ ଭାବେ କାର୍ଯ୍ୟରତ । ତାଙ୍କର ଜଣେ ପୁଅ ଉମର ଓ ଦୁଇ ଝିଅ ହିନା ଓ ସାରା । ପୁଅ ଉମର ଅବଦୁଲ୍ଲା ମଧ୍ୟ ରାଜନୀତିରେ ବେଶ୍ ସକ୍ରିୟ ଓ ଜମ୍ମୁ-କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଥିଲେ । କଂଗ୍ରେସ ନେତା ସଚିନ୍ ପାଇଲଟ୍ଙ୍କ ସହ ଫାରୁକ୍ଙ୍କ ଝିଅ ସାରାଙ୍କ ବିବାହ ହୋଇଥିଲା । କିନ୍ତୁ, ବର୍ତ୍ତମାନ ଉଭୟଙ୍କ ବିଚ୍ଛେଦ ହୋଇଛି ।
ଅଗଷ୍ଟ ୨୦୧୯ରେ କେନ୍ଦ୍ର ସରକାର ଜାମ୍ମୁ କାଶ୍ମୀରରେ ଧାରା ୩୭୦ ଲାଗୁ କରିଥିଲେ । ଏହି ସମୟ ମଧ୍ୟରେ ଫାରୁକ୍ ଅବଦୁଲ୍ଲା ଏବଂ ଜାମ୍ମୁ କାଶ୍ମୀରର ଅନ୍ୟ ରାଜନୈତିକ ନେତାମାନଙ୍କୁ ଗୃହରେ ଅଟକ ରଖାଯାଇଥିଲା । ସେପ୍ଟେମ୍ବରରେ ତାଙ୍କ ତରଫରୁ ଏକ ହିବିୟସ୍ କର୍ପସ୍ ଆବେଦନ କରାଯିବା ପରେ ସେ ସାଧାରଣ ଜନତାଙ୍କ ବ୍ୟାଘାତ ଘଟାଇଥିବାର ଅଭିଯୋଗ ହୋଇଥିଲା । ଗିରଫ ଆଦେଶ ଶେଷ ହେବା ପରେ ମାର୍ଚ୍ଚ ୨୦୨୦ରେ ତାଙ୍କୁ ମୁକ୍ତ କରାଯାଇଥିଲା । ଫାରୁକ୍ ଅବଦୁଲ୍ଲା ୧୯୮୦ରେ ଶ୍ରୀନଗରରୁ ଲୋକସଭା ଆସନ ଜିତିଥିଲେ ଓ ସଂସଦରେ ପହଞ୍ଚିଥିଲେ । ସେ ନିଜ ରାଜନୈତିକ ଜୀବନୀରେ ଅନେକ ମହତ୍ତ୍ୱପୂର୍ଣ୍ଣ ପଦରେ କାର୍ଯ୍ୟରତ ଥିବା ବେଳେ ଦେଶ ଓ ରାଜ୍ୟ ସେବାରେ ନିଜକୁ ନିୟୋଜିତ କରିଥିଲେ ।
