ଭୁବନେଶ୍ଵର, ୨୨/୧୧ : ଓଡ଼ିଶାରୁ ନୂଆ ନୂଆ ଗନ୍ତବ୍ୟ ସ୍ଥଳକୁ ଉଡ଼ିବ ବିମାନ। ଦେଶ ବିଦେଶର ପ୍ରମୁଖ ସହର ସହ ଯୋଡ଼ି ହେବ ଓଡ଼ିଶା। ନୂଆ ବଜାର, ନୂଆ ନିବେଶ ପାଇଁ ଖୋଲିବ ଦ୍ଵାର। ନୂଆ ଉଡ଼ାଣରେ ଆଗକୁ ଉଡ଼ି ଚାଲିବ ବିକଶିତ ଓଡ଼ିଶାର ସ୍ଵପ୍ନ। ପ୍ରଥମ ପର୍ଯ୍ୟାୟରେ ୫ଟି ସ୍ଥାନକୁ ଚଳାଚଳ କରିବ ବିମାନ। ନୂଆବର୍ଷରୁ ହେବ ଏହାର ଶୁଭାରମ୍ଭ। ବିଜୁ ପଟ୍ଟନାୟକ ବିମାନବନ୍ଦର ନିର୍ଦ୍ଦେଶକ ପ୍ରସନ୍ନ ପ୍ରଧାନ ଏହି ସୂଚନା ଦେଇଛନ୍ତି।
ଜାନୁଆରୀରୁ ଦେଶ ବିଦେଶର ପ୍ରମୁଖ ସହରକୁ ଓଡ଼ିଶାରୁ ସିଧାସଳଖ ଉଡ଼ିବ ବିମାନ। ଭୁବନେଶ୍ୱର ଏବଂ ଝାରସୁଗୁଡ଼ାରୁ ନୂଆ ସହରକୁ ଯୋଡ଼ି ହେବ ବିମାନ ସେବା। ନୂଆ ଗନ୍ତବ୍ୟ ସ୍ଥଳକୁ ବିମାନ ସେବା ସଂଯୋଗୀକରଣ ପାଇଁ ସ୍ୱତନ୍ତ୍ର ନୀତି ଆଣିଛି ରାଜ୍ୟ ପରିବହନ ବିଭାଗ। ଯେଉଁ ଡୋମେଷ୍ଟିକ୍ ରୁଟ୍ରେ ଭୁବନେଶ୍ୱର, ଝାରସୁଗୁଡ଼ା, ଜୟପୁର, ରାଉରକେଲା, ଉତ୍କେଲା ବିମାନବନ୍ଦରରୁ ଏଯାବତ୍ ବିମାନ ସେବା ଆରମ୍ଭ ହୋଇନାହିଁ, ସେଭଳି ରୁଟ୍ରେ ବିମାନ ସେବା ଆରମ୍ଭ ହେବ। ଏଥିପାଇଁ ରାଜ୍ୟ ପରିବହନ ବିଭାଗ ପକ୍ଷରୁ ବିଭିନ୍ନ ଦିଗକୁ ନେଇ ସର୍ବେକ୍ଷଣ କରାଯାଇଛି। ଏଥିରେ ୮ଟି ଘରୋଇ ରୁଟ୍ ଓ ୪ଟି ଆନ୍ତର୍ଜାତିକ ଗନ୍ତବ୍ୟ ସ୍ଥଳ ଚିହ୍ନଟ ହୋଇଛି। ଡୋମେଷ୍ଟିକ ରୁଟ୍ରେ ଡେରାଡୁନ, ଗୋଆ, ଜମ୍ମୁ, ଜୟପୁର, ସୁରତ, କୋଚି, ଶିରଡି, ଅହମ୍ମଦାବାଦ ସହର ରହିଛି। ଆନ୍ତର୍ଜାତିକ ରୁଟରେ ଆବୁଧାବି, ଓମାନ, ବାହାରେନ, କୁଏତକୁ ବିମାନ ସେବା ଯୋଡ଼ିବାକୁ ରାଜ୍ୟ ସରକାର ଲକ୍ଷ୍ୟ ରଖିଛନ୍ତି। ପ୍ରଥମ ପର୍ଯ୍ୟାୟରେ ୫ଟି ସ୍ଥାନକୁ ବିମାନ ଚଳାଚଳ କରିବ। ଡୋମେଷ୍ଟିକ ବିମାନ ପାଇଁ କେତେକ ଏୟାରଲାଇନ୍ସ ଆଗ୍ରହ ପ୍ରକାଶ କରିଥିବାବେଳେ ନୂଆ ଆନ୍ତର୍ଜାତିକ ରୁଟ୍ ପାଇଁ କେହି ଆଗ୍ରହ ଦେଖାଇନାହାନ୍ତି। ତେବେ ନୂଆ ସହରକୁ ବିମାନ ସେବା ଆରମ୍ଭ ହେଲେ ନିବେଶ ପାଇଁ ଦ୍ୱାର ଖୋଲିବ। ନୂଆ ଉଡ଼ାଣରେ ବିକଶିତ ଓଡ଼ିଶାର ସ୍ୱପ୍ନ ଆଗକୁ ଆଗକୁ ଉଡ଼ି ଚାଲିବ ବୋଲି ରାଜ୍ୟ ପରିବହନ ବିଭାଗ ଅଧିକାରୀଙ୍କ କହିଛନ୍ତି।
