ନୂଆଦିଲ୍ଲୀ,୨୨/୦୭: ଛାରଖାର ହେବ ଶତ୍ରୁ ଶିବିର । ପାକିସ୍ତାନର ଅବସ୍ଥା ହେବ ଶୋଚନୀୟ । ଭାରତୀୟ ସେନାକୁ ମିଳିଛି 'ଆପାଚି' ବଳ । ଆପାଚି ଏଏଚ-୬୪ଇ ହେଲିକପ୍ଟର ପ୍ରଥମ ବ୍ୟାଚ ଶେଷରେ ଭାରତରେ ପହଞ୍ଚିଛି । ୩ଟି ଆପାଚି ହେଲିକପ୍ଟର ଆମେରିକାରୁ ଆସି ହିଣ୍ଡନ ଏୟାରବେସ୍‌ରେ ପହଞ୍ଚିଛି । ପ୍ରାୟ ୫୦୦ କୋଟି ଟଙ୍କା ଚୁକ୍ତିରେ ଭାରତକୁ ୬ ଆପାଚି ମିଳିବ ।  ୧୫ ମାସ ବିଳମ୍ବରେ ପ୍ରଥମ ପର୍ଯ୍ୟାୟରେ ୩ଟି 'ଆପାଚି' ଭାରତରେ ପହଞ୍ଚିଛି । ଏହି ହେଲିକପ୍ଟର ଯୋଧପୁରରେ ନିୟୋଜିତ ହେବ । ଅପରେସନ୍ ସିନ୍ଦୂର ପରେ ଯେଉଁଠି ପଶ୍ଚିମ ସୀମାର ତାକତ ବଢାଇବା ଆବଶ୍ୟକତା ରହିଛି ।

ଆର୍ମି ଏଭିଏସନ୍‌ କୋର ଗତ ବର୍ଷ ମାର୍ଚ୍ଚରେ ଯୋଧପୁର ନାଗତଲାବରେ ଆପାଚିର ସ୍କ୍ଲାର୍ଡନ ପ୍ରସ୍ତୁତ କରିଥିଲେ । ଏହା ସହିତ ପାଇଲଟ ଏବଂ ଗ୍ରାଉଣ୍ଡ ଷ୍ଟାଫଙ୍କୁ ଟ୍ରେନିଂ ମଧ୍ୟ ଦିଆସରିଛି । ଆପାଚି ଏଏଚ-୬୪ଇ ଦୁନିଆର ସବୁଠୁ ଉନ୍ନତ ହେଲିକପ୍ଟର । ଏହାକୁ ଆମେରିକା କମ୍ପାନୀ ବୋଇଂ ତିଆରି କରିଛି । ଏହାକୁ ଉଡନ୍ତା ଟେକ୍‌ ବି କୁହନ୍ତି । କାରଣ ଏହା ପାଖରେ ଦ୍ରୁତ, ଶକ୍ତିଶାଳୀ ଏବଂ ସଠିକ୍‌ ହମଲାର କ୍ଷମତା ରହିଛି । ଆପାଚି ଆକ୍ରମଣ ହେଲିକପ୍ଟରଗୁଡ଼ିକୁ ବିଶ୍ୱର ସବୁଠାରୁ ଆଧୁନିକ ଏବଂ ଘାତକ ହେଲିକପ୍ଟର ଭାବରେ ବିବେଚନା କରାଯାଏ । ଏଗୁଡ଼ିକ ଶତ୍ରୁର ଦୁର୍ଗ ଭେଦ କରି ଏହାର ଅଞ୍ଚଳ ଭିତରେ ଗଭୀର ଆକ୍ରମଣ କରିବାକୁ ସକ୍ଷମ । ଆମେରିକା ନିଜେ ପାନାମାରୁ ଆଫାଗାନିସ୍ତାନ ଏବଂ ଇରାକ ପର୍ଯ୍ୟନ୍ତ ଆପାଚି ଆକ୍ରମଣ ହେଲିକପ୍ଟର ବ୍ୟବହାର କରିଥିଲା । 

ଆପାଚିରେ  ଦୁଇଟି ଜେନେରାଲ ଇଲେକ୍ଟ୍ରିକ୍ T700 ଟର୍ବୋସାଫ୍ଟ ଇଞ୍ଜିନ୍ ଏବଂ ସାମ୍ନାରେ ଏକ ସେନ୍ସର ଲାଗିଛି । ଏହା ଅନ୍ଧାରରେ ମଧ୍ୟ ଉଡ଼ିପାରିବ । ଘଣ୍ଟା ପ୍ରତି ୩୬୫ କିଲୋମିଟର ବେଗରେ ଉଡ଼େ । ଏହା ଯେକୌଣସି ପ୍ରକାରର ପାଗରେ ପୂର୍ଣ୍ଣ କ୍ଷମତା ସହିତ କାମ କରିବ । କ୍ୟାବିନେଟ କମିଟି ଆମେରିକାରୁ  ୩୯ଟି ଆପାଚି ହେଲିକପ୍ଟର କ୍ରୟକୁ ଅନୁମୋଦନ କରିଥିଲା । ଏହା ପରେ ସେପ୍ଟେମ୍ବର  ୨୦୨୫ରେ ଭାରତୀୟ ବାୟୁସେନା ପାଇଁ ୨୨ଟି ଆପାଚେ ହେଲିକପ୍ଟର କ୍ରୟ ପାଇଁ ଚୁକ୍ତି ସ୍ୱାକ୍ଷରିତ ହୋଇଥିଲା। ଏହା ପରେ ସରକାର ନିଷ୍ପତ୍ତି ନେଇଥିଲେ ଯେ ବର୍ତ୍ତମାନ କ୍ରୟ କରାଯାଇଥିବା ସମସ୍ତ ଆପାଚି ହେଲିକପ୍ଟର ସେନାକୁ ଯିବ। ୧୫ ମାସ ବିଳମ୍ବକୁ ନେଇ ଅନେକ ପ୍ରଶ୍ନ ଉଠିଛି । ଭାରତୀୟ ସେନା ୨୦୨୩ ମସିହାରୁ ଆକ୍ରମଣାତ୍ମକ ଆପାଚି ହେଲିକପ୍ଟର ପାଇବା ପ୍ରକ୍ରିୟା ଆରମ୍ଭ କରିବାର ଥିଲା, କିନ୍ତୁ ପ୍ରଥମେ କୋଭିଡ୍ ଏବଂ ପରେ ଅନ୍ୟାନ୍ୟ କାରଣରୁ ଏହା ବିଳମ୍ବ ହୋଇଥିଲା । ସେନା ପାଇଁ ୬ଟି ଆପାଚି ହେଲିକପ୍ଟର ପାଇଁ  ଫେବୃଆରୀ ୨୦୨୦ ରେ ଚୁକ୍ତି ସ୍ୱାକ୍ଷରିତ ହୋଇଥିଲା ।