ନୂଆଦିଲ୍ଲୀ,୨୨/୦୭: ଉପରାଷ୍ଟ୍ରପତି ପଦରୁ ଜଗଦୀପ ଧନଖଡ଼ଙ୍କ ଇସ୍ତଫା ପରେ ଦେଶରେ ରାଜନୀତି ସମ୍ପୂର୍ଣ୍ଣ ବଦଳି ଯାଇଛି। ଧନଖଡ଼ଙ୍କ ଇସ୍ତଫାକୁ ନେଇ ସବୁଠି ଆଲୋଚନା ହେଉଛି। ଗୋଟିଏ ପଟେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମଙ୍ଗଳବାର ଧନଖଡ଼ଙ୍କ ଇସ୍ତଫା ଗ୍ରହଣ କରିଥିବା ବେଳେ ଅନ୍ୟପଟେ ଗୃହ ମନ୍ତ୍ରଣାଳୟ ମଧ୍ୟ ଏ ନେଇ ଏକ ବିଜ୍ଞପ୍ତି ଜାରି କରିଛି। ଇସ୍ତଫା ମଧ୍ୟରେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର ମଧ୍ୟ ହଠାତ୍ ଚର୍ଚ୍ଚାକୁ ଆସିଛନ୍ତି। ଦିଲ୍ଲୀରେ ଉପରାଷ୍ଟ୍ରପତିଙ୍କ ଇସ୍ତଫା କିନ୍ତୁ ଏହାଠାରୁ ଅଧିକ ହଇଚଇ ସୃଷ୍ଟି କରିଛି ବିହାରରେ। ଏଠାରେ ମୁଖ୍ୟ ବିରୋଧୀ ଦଳ ରାଷ୍ଟ୍ରୀୟ ଜନତା ଦଳ (ଆର୍ଜେଡି) ମଙ୍ଗଳବାର ଦାବି କରିଛି ଯେ ଉପରାଷ୍ଟ୍ରପତି ଜଗଦୀପ ଧନଖଡ଼ଙ୍କ ଇସ୍ତଫା ଭାରତୀୟ ଜନତା ପାର୍ଟି ଦ୍ୱାରା ରଚିତ ଏକ ଷଡ଼ଯନ୍ତ୍ର, ଯାହାର ଲକ୍ଷ୍ୟ ବିହାରରେ ବିଧାନସଭା ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ହଟାଇବା।
ତଥାପି, ରାଜ୍ୟରେ ସବୁଠାରୁ ଅଧିକ ସମୟ ଧରି ମୁଖ୍ୟମନ୍ତ୍ରୀ ରହିବାର ରେକର୍ଡ ରଖିଥିବା ନୀତିଶ କୁମାରଙ୍କ ନିକଟତମ ସହଯୋଗୀ ମନ୍ତ୍ରୀ ଶ୍ରବଣ କୁମାର ଏପରି କୌଣସି ଦାବିକୁ ଅସ୍ୱୀକାର କରିଛନ୍ତି। ସେ କହିଛନ୍ତି ଯେ ଅକ୍ଟୋବର-ନଭେମ୍ବରରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ନୀତିଶଙ୍କୁ ଏନ୍ଡିଏର ଚେହେରା ଘୋଷଣା କରାଯାଇଛି। ଉପରାଷ୍ଟ୍ରପତି ପଦ ପାଇଁ ନୀତିଶ କୁମାରଙ୍କ ନାଁକୁ ଉଲ୍ଲେଖ କରି ବିହାର ବିଧାନସଭାରେ ଆରଜେଡିର ମୁଖ୍ୟ ସଚେତକ ଅଖତାରୁଲ ଇସଲାମ ଶାହିନ ଦାବି କରିଛନ୍ତି, "ଦୀର୍ଘ ସମୟ ଧରି ବିଜେପି ନୀତିଶଙ୍କୁ ହଟାଇବା ପାଇଁ ଚେଷ୍ଟା କରୁଛି, ଯାହାଫଳରେ କି ସେ ଏଠାରେ ନିଜର ମୁଖ୍ୟମନ୍ତ୍ରୀ କରିପାରିବ। ବିହାରରେ ବିଧାନସଭା ନିର୍ବାଚନ ପୂର୍ବରୁ ସେମାନେ ହତାଶ ହୋଇଯାଇଛନ୍ତି, ଯେଉଁଥିରେ ଏନ୍ଡିଏର ପରାଜୟ ନିଶ୍ଚିତ।"
ଆରଜେଡି ନେତା ଶାହିନ ନ୍ୟୁଜ ଏଜେନ୍ସି ପିଟିଆଇ ସହିତ ଏକ ଭିଡିଓ ସାକ୍ଷାତକାରରେ ଦାବି କରିଛନ୍ତି, "ବହୁତ ଦିନ ଧରି ନୀତୀଶଙ୍କୁ ହଟାଇବା ସପକ୍ଷରେ ଅନେକ ବରିଷ୍ଠ ବିଜେପି ନେତା କହିଆସୁଛନ୍ତି। ପୂର୍ବତନ କେନ୍ଦ୍ରମନ୍ତ୍ରୀ ଅଶ୍ୱିନୀ କୁମାର ଚୌବେ ଥରେ ନୀତୀଶଙ୍କୁ ଉପପ୍ରଧାନମନ୍ତ୍ରୀ କରିବା ପାଇଁ ମଧ୍ୟ ପରାମର୍ଶ ଦେଇଥିଲେ। ତେଣୁ, ଧନଖଡ଼ଙ୍କ ଇସ୍ତଫା ବିଜେପିର ଏକ ଷଡ଼ଯନ୍ତ୍ର ବୋଲି ଭାବିବା ଭୁଲ ହେବ ନାହିଁ, ଯାହାର ଲକ୍ଷ୍ୟ ହେଉଛି ନୀତୀଶ କୁମାରଙ୍କୁ ଉପରାଷ୍ଟ୍ରପତି ଭଳି ରାଜନୈତିକ ଭାବରେ ଗୁରୁତ୍ୱପୂର୍ଣ୍ଣ ପଦବୀ ଦେଇ ମୁଖ୍ୟମନ୍ତ୍ରୀ ଆସନରୁ ହଟାଇବା।" ସେହିପରି ପୂର୍ବତନ ଉପମୁଖ୍ୟମନ୍ତ୍ରୀ ଏବଂ ଦିବଂଗତ ନେତା ସୁଶୀଲ କୁମାର ମୋଦି ଥରେ ଦାବି କରିଥିଲେ ଯେ ନୀତୀଶ କୁମାର ଉପରାଷ୍ଟ୍ରପତି ପଦବୀ ପାଇଁ ଲବି କରୁଥିଲେ ଏବଂ ଯେତେବେଳେ ଲୋକସଭାରେ ସଂଖ୍ୟାଗରିଷ୍ଠତା ଥିବା ବିଜେପି, ଜନତା ଦଳ ୟୁନାଇଟେଡ୍ ଅଧ୍ୟକ୍ଷଙ୍କୁ ଏହି ପଦବୀ ଦେବାକୁ ମନା କରିଦେଇଥିଲେ, ସେତେବେଳେ ସେ ଏନଡିଏ ଛାଡ଼ି ଦେଇଥିଲେ।
ଲୋକସଭା ୨୦୨୫ରେ ଏନ୍ଡିଏର ପ୍ରମୁଖ ସହଯୋଗୀ ଜେଡିୟୁ:
ନୀତିଶ ୨୦୨୨ ରେ ବିଜେପି ସହିତ ସମ୍ପର୍କ ଭାଙ୍ଗି ଦେଇଥିଲେ ଏବଂ ଜେଡିୟୁକୁ ଭାଙ୍ଗିବା ପାଇଁ ଷଡ଼ଯନ୍ତ୍ର କରୁଥିବାର ଅଭିଯୋଗ କରିଥିଲେ, କିନ୍ତୁ ଗତ ବର୍ଷ ଲୋକସଭା ନିର୍ବାଚନର କିଛି ସମୟ ପୂର୍ବରୁ, ସେ ତାଙ୍କର ମନ ପରିବର୍ତ୍ତନ କରିଥିଲେ ଏବଂ ଏନ୍ଡିଏ ସହିତ ପୁଣି ଏକ ମେଣ୍ଟ ଗଠନ କରିଥିଲେ। ନିର୍ବାଚନ ପରେ ଜେଡିୟୁର ପ୍ରଦର୍ଶନ ଭଲ ଥିଲା ଏବଂ ଦଳ ଏନ୍ଡିଏରେ ଏକ ଗୁରୁତ୍ୱପୂର୍ଣ୍ଣ ସହଯୋଗୀ ହୋଇଗଲା କାରଣ କେନ୍ଦ୍ରରେ କ୍ଷମତାରେ ରହିବା ପାଇଁ ବିଜେପିକୁ ସେତେବେଳେ ଜେଡିୟୁର ସମର୍ଥନ ଆବଶ୍ୟକ ଥିଲା।
ଏହାରି ଭିତରେ ଜନତା ଦଳ ୟୁନାଇଟେଡ୍ (ଜେଡିୟୁ)ର ବରିଷ୍ଠ ନେତା ଶ୍ରବଣ କୁମାର ଆରଜେଡି ନେତାଙ୍କ ଦାବି ଉପରେ ଅସନ୍ତୋଷ ପ୍ରକାଶ କରିଛନ୍ତି। ସେ କହିଛନ୍ତି, "ନୀତୀଶ ବିହାର ଛାଡ଼ିବାର ପ୍ରଶ୍ନ ଉଠୁନାହିଁ। ସେ ଏଠାରେ ରହିବେ, ଏବଂ ବିଧାନସଭା ନିର୍ବାଚନରେ ଏନଡିଏକୁ ଏକ ବଡ଼ ବିଜୟ ଦେବେ। ସେ ବିହାରର ଲୋକଙ୍କ ସେବା କରି ଆଉ ଏକ କାର୍ଯ୍ୟକାଳ ମଧ୍ୟ ପୂରଣ କରିବେ।" ଏହା ପୂର୍ବରୁ, ଉପରାଷ୍ଟ୍ରପତି ଧନଖଡ଼ ସୋମବାର ସନ୍ଧ୍ୟାରେ ସ୍ୱାସ୍ଥ୍ୟଗତ କାରଣ ଦର୍ଶାଇ ତାଙ୍କ ପଦରୁ ଇସ୍ତଫା ଦେଇ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲେ। ସେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ନିକଟକୁ ଇସ୍ତଫାପତ୍ର ପଠାଇ କହିଥିଲେ ଯେ ସେ ତୁରନ୍ତ ପ୍ରଭାବରୁ ପଦ ଛାଡ଼ି ଦେଉଛନ୍ତି। ତଥାପି, ହଠାତ୍ ଇସ୍ତଫା ଦେବା ନେଇ ବିରୋଧୀ ଦଳରେ ଅନେକ ଚର୍ଚ୍ଚା ଆଲୋଚନା ଲାଗି ରହିଛି।
