ଢେଙ୍କାନାଳ,୧୩/୮: ଢେଙ୍କାନାଳ ଜିଲ୍ଲା ଭୁବନ ବ୍ଲକ ନୂଆ ଭୁବନ ଉଚ୍ଚ ବିଦ୍ୟାଳୟରେ ଅଘଟଣ। ଛାତ୍ରଛାତ୍ରୀଙ୍କ ପାଇଁ ମଧ୍ୟାହ୍ନ ଭୋଜନ ରୋଷେଇ ସମୟରେ ଗ୍ୟାସ ସିଲିଣ୍ଡରରେ ହଠାତ୍ ନିଆଁ ଲାଗିଯାଇଥିଲା। ଅଗ୍ନିକାଣ୍ଡରେ ରୋଷେଇ ସାମଗ୍ରୀ ଜଳିଯିବା ସହିତ ପରିବା, ଅଣ୍ଡା ପୋଡି ନଷ୍ଟ ହୋଇଯାଇଛି। ରୋଷେଇ କରୁଥିବା ପାଚିକାମାନେ ଅଳ୍ପକେ ବର୍ତ୍ତି ଯାଇଛନ୍ତି। ନିଆଁ ଲାଗିବା କ୍ଷଣି ଅଗ୍ନିଶମ ମେସିନ ବ୍ୟବହାର କରି ଆୟତ୍ତ କରାଯାଇଥିଲା। ଫଳରେ ସେମାନେ ଅଳ୍ପକେ ବର୍ତ୍ତି ଯାଇଥିଲେ।
ଏହି ବିଦ୍ୟାଳୟରେ ମୋଟ ୪୫୨ ଜଣ ଛାତ୍ରଛାତ୍ରୀ ଅଧ୍ୟୟନ କରୁଥିବାବେଳେ ୧୪ ଜଣ ଶିକ୍ଷକ ଶିକ୍ଷୟତ୍ରୀ ନିଯୁକ୍ତି ରହିଛନ୍ତି। ୪ ଜଣ ପାଚିକା ରୋଷେଇ କାର୍ଯ୍ୟରେ ନିୟୋଜିତ ଥିଲେ। ଗ୍ୟାସ ସିଲିଣ୍ଡରରେ କିପରି ନିଆଁ ଲାଗିଲା କାରଣ ଅସ୍ପଷ୍ଟ ରହିଛି। ନିୟମିତ ବ୍ୟବଧାନରେ ଗ୍ୟାସଗୁଡ଼ିକ ରକ୍ଷଣାବେକ୍ଷଣ କରାଯାଉନଥିବା ଅଭିଯୋଗ ହୋଇଛି। ସ୍କୁଲର ଗ୍ୟାସ୍ ଷ୍ଟୋଭ ମରାମତି କରୁଥିବା ବେଳେ ଅପରେଟର ରବିନ୍ଦ୍ର କୁମାର ଦାସ ଆହତ ହୋଇ ଭୁବନ ଡାକ୍ତରଖାନାରେ ଚିକିତ୍ସିତ ହେଉଥିବା ଜଣାଯାଇଛି।
