ନୟାଗଡ଼, ୨୫/୦୭ : ବନ୍ଦ ଘର ଭିତରୁ ବାପ-ଝିଅଙ୍କ ମୃତଦେହ ଉଦ୍ଧାର। ନୟାଗଡ଼ ସହର ଦେବୋତ୍ତର ଲେନ-୪ରେ ଘଟିଛି ଏଭଳି ଅଭାବନୀୟ ଘଟଣା। ଝିଅକୁ ବିଷ ଦେବା ପରେ ବାପା ନିଜେ ଆତ୍ମହତ୍ୟା କରିଥିବା ଅନୁମାନ କରୁଛି ପୋଲିସ।
ସୂଚନାନୁଯାୟୀ, ନୟାଗଡ଼ ସହର ଦେବୋତ୍ତର ଲେନ-୪ର ପୁଲକ ବିଶ୍ୱାଳ ପ୍ରଥମ ପତ୍ନୀଙ୍କ ମୃତ୍ୟୁ ପରେ ଗତ ୩ ମାସ ପୂର୍ବରୁ ଦ୍ୱିତୀୟ ବିବାହ କରିଥିଲେ। ଗତ ସୋମବାର ଦ୍ଵିତୀୟ ପତ୍ନୀ ତାଙ୍କ ବାପ ଘରକୁ ଯାଇଥିଲେ। ବାପ ଘରେ ୨ ଦିନ ରହି ଗତକାଲି ରାତିରେ ନୟାଗଡ଼ ସ୍ଥିତ ଭଡାଘରକୁ ଫେରି ଆସିଥିଲେ। ହେଲେ ଘର ଭିତର ପଟୁ ବନ୍ଦ ଥିବା ଦେଖିବାକୁ ପାଇଥିଲେ। ବହୁ ସମୟ ପର୍ଯ୍ୟନ୍ତ କବାଟ ବାଡେଇଥିଲେ। କେହି ଉତ୍ତର ନଦେବାରୁ ସନ୍ଦେହ କରି ପୋଲିସକୁ ଖବର ଦେଇଥିଲେ। ସ୍ଥାନୀୟ ମ୍ୟାଜିଷ୍ଟ୍ରେଟଙ୍କ ଉପସ୍ଥିତିରେ ନୟାଗଡ଼ ଟାଉନ ଥାନା ପୋଲିସ ବିଳମ୍ବିତ ରାତିରେ ପହଞ୍ଚି ଘରର ତାଲା ଭାଙ୍ଗି ଘରେ ପଶିଥିଲା ତେବେ ଭିତରେ ଯାହା ଦେଖିବାକୁ ମିଳିଲା ତାହା କେହି ବିଶ୍ଵାସ କରିପାରି ନଥିଲେ। ପୁଲକ ବିଶ୍ଵାଳଙ୍କୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିବା ବେଳେ ୫ ବର୍ଷର ଝିଅର ମୃତଦେହ ବେଡ୍ ଉପରେ ପଡି ରହିଥିଲା।
ଝିଅକୁ କୌଣସି ବିଷାକ୍ତ ଖାଦ୍ୟ ଦେବା ପରେ ପୁଲକ ଆତ୍ମହତ୍ୟା କରିଥିବା ନେଇ ପୋଲିସ ଅନୁମାନ କରୁଥିବା ବେଳେ ସବୁଦିଗକୁ ନେଇ ତଦନ୍ତ ଜାରି ରଖିଛି। ଆଜି ସାଇଣ୍ଟିଫିକ ଟିମ୍ ଆସିବା ପରେ ମୃତଦେହ ବାହାର କରାଯିବ ବୋଲି ଥାନାଅଧିକାରୀ ସୂଚନା ଦେଇଛନ୍ତି। ମୃତଦେହରୁ ଦୁର୍ଗନ୍ଧ ବାହାରୁଥିବାରୁ ଏହା ସୋମବାରର ଘଟଣା ବୋଲି ପୋଲିସ ଅନୁମାନ କରୁଛି।