ସୁବର୍ଣ୍ଣପୁର,୨୦/୦୫: ନ୍ୟାୟ ଦାବିରେ ପରିବାର ଲୋକଙ୍କ ଧାରଣା। ଜମିଜମା ବିବାଦକୁ ନେଇ ଉପଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଲେ ପରିବାର । ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଉପଖଣ୍ଡ ଉଲୁଣ୍ଡା ବ୍ଲକ କୋଟସମଲେଇ ପଞ୍ଚାୟତରୁ ସାମ୍ନାକୁ ଆସିଛି ଏହି ଘଟଣା।
ଉକ୍ତ ପଞ୍ଚାୟତର ରଣିପାଲି ମୌଜାରେ ଗଜରା କୁମ୍ଭାରଙ୍କ ନାଁରେ ଥିବା ଏକ ରୟତି ଘରବାରି ପ୍ଲଟକୁ ଗାଁର ସୁରେଶ ଜଗଦଳା ଓ ରମେଶ ମହାନନ୍ଦ ବଳପୂର୍ବକ ନିଜ ଜମି କହି ବେଦଖଲ କରିଥିଲେ । ଏନେଇ ଗଜରାଙ୍କ ତିନି ପୁଅ ଫେବୃଆରୀ ମାସରୁ ଉପଜିଲ୍ଲାପାଳଙ୍କ ଦ୍ବାରସ୍ଥ ହୋଇଥିଲେ । ବୀରମହାରାଜପୁର ପୁଲିସ, ସ୍ଥାନୀୟ ରାଜସ୍ବ ନିରୀକ୍ଷକ ଓ ଉଲୁଣ୍ଡା ତହସିଲଦାର ତଦନ୍ତ ପରେ ଉପଜିଲ୍ଲାପାଳଙ୍କୁ ରିପୋର୍ଟ ପ୍ରଦାନ କରିଥିଲେ । ହେଲେ ଏହାପରେ ବି ଉପଜିଲ୍ଲାପାଳ ଫୈସଲା ନ ଶୁଣାଇ ତାରିଖ ପରେ ତାରିଖ ଗଡ଼ାଇ ଚାଲିଛନ୍ତି । ଯାହାକୁ ନେଇ ଗଜରା କୁମ୍ଭାରଙ୍କ ପରିବାର ଆଜି ବାଧ୍ୟ ହୋଇ ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି ।
