ସୁନ୍ଦରଗଡ଼,୧୧/୧୦: ଆକ୍ସନ ମୋଡ୍‌ରେ ସୁନ୍ଦରଗଡ଼ ଅବକାରୀ ବିଭାଗ । ସୁନ୍ଦରଗଡର ଲେଫ୍ରିପଡା ଓ ଟାଙ୍ଗରପାଲି ଜଙ୍ଗଲର ଦେଶୀ ମଦ କାରଖାନା ଉପରେ ଚଢାଉ । ଦଶ କୁଇଣ୍ଟାଲ ପୋଚ ନଷ୍ଟ କରିବା ସହ ଶହେ ଲିଟର ଦେଶୀ ମଦ ଜବତ କରିଛି ଅବକାରୀ ବିଭାଗ । 

ସୂଚନା ମୁତାବକ, ସୁନ୍ଦରଗଡର ଲେଫ୍ରିପଡା ଓ ଟାଙ୍ଗରପାଲି ଜଙ୍ଗଲରେ ଦେଶୀ ମଦ ବନା ଯାଉଥିବା ନେଇ ପୂର୍ବରୁ ଖବର ପାଇଥିଲା ଅବକାରୀ ବିଭାଗ । ଖବର ପାଇ ଅବକାରୀ ବିଭାଗର ସୁପରିଟେଣ୍ଡେଣ୍ଟ ସଞ୍ଜୀବ ପଣ୍ଡାଙ୍କ ନିର୍ଦ୍ଦେଶରେ ଏକ ଟିମ ଜଙ୍ଗଲରେ ଅଚାନକ ଚଢ଼ାଉ କରିଥିଲା । ସେଠାରେ ଚଢାଉ କରି ଦଶ କୁଇଣ୍ଟାଲ ପୋଚ ନଷ୍ଟ କରିବା ସହ ଶହେ ଲିଟର ଦେଶୀ ମଦ ଜବତ କରିଥିଲା ଟିମ୍‌ । ତେବେ ଏହି ଚଢାଉ ସମୟରେ ଦେଶୀ ମଦ ବନାଉଥିବା ମାଫିଆ ମାନେ ଘଟଣାସ୍ଥଳରୁ ଫେରାର ହେଇଯାଇଛନ୍ତି । ସେମାନଙ୍କୁ ଖୋଜି ଘଟଣାର ତଦନ୍ତ ଚଳାଇଛି ଅବକାରୀ ବିଭାଗ ।