କେନ୍ଦୁଝର, ୯।୬ : କେନ୍ଦୁଝର ଓ ଆନନ୍ଦପୁର ବନଖଣ୍ଡର କୋଳିମାଟି ନିକଟରେ ଏକ ଅସୁସ୍ଥ ହାତୀକୁ ରବିବାର ସନ୍ଧ୍ୟାରେ ଟ୍ରାଙ୍କୁଲାଇଜ୍ କରି ଚିକିତ୍ସା କରାଯାଇଥିଲା। ହାତୀର ବାମ ଗୋଡ଼ର ଉପର ଭାଗରେ ଏକ ଗଭୀର କ୍ଷତ ହୋଇଥିଲା। ଏହି କ୍ଷତରୁ ଏକ ଭଙ୍ଗା ତୀର ଅପରେସନ କରି କାଢ଼ିବା ପରେ ଔଷଧ ଲେପ ଲଗାଯାଇଥିଲା। ଖୁବଶୀଘ୍ର ଚେତା ଫେରିବ ବୋଲି ବନ ବିଭାଗ ପକ୍ଷରୁ କୁହାଯାଇଥିଲା । ମାତ୍ର ୧୮ ଘଣ୍ଟା ପରେ ବି ହାତୀର ଚେତା ଫେରିନି। ଯାହାକୁ ନେଇ ବନ ବିଭାଗ ଚିନ୍ତାରେ ରହିଛି ।
ପ୍ରାୟ ୧ ମାସ ତଳେ ହାତୀକୁ ଶିକାର କରି ଦାନ୍ତ ଲୁଟିବା ପାଇଁ ଶିକାରୀ ତୀର ମାଡ଼ କରିଥିବା ବନ ବିଭାଗ ପକ୍ଷରୁ ସ୍ୱୀକାର କରାଯାଇଛି। ସେହିଦିନ ଠାରୁ ଅସୁସ୍ଥ ହାତୀ ଠିକ୍ ଭାବରେ ଖାଦ୍ୟ ଖାଉ ନଥିବାରୁ ଦୁର୍ବଳ ହୋଇପଡିଛି। ଟ୍ରାଙ୍କୁଲାଇଜ୍ ପରେ ଅଧିକ ମାତ୍ରାରେ ନିସ୍ତେଜକ ଔଷଧ କାରଣରୁ ହାତୀର ଚେତା ଫେରି ପାରୁନଥିବା ଅଭିଯୋଗ ହେଉଛି। ବନ ବିଭାଗ ଓ ଡାକ୍ତରୀ ଟିମ୍ ଘଟଣାସ୍ଥଳରେ ରହି ଚିକିତ୍ସା ଚଳାଇଛନ୍ତି। ହାତୀର ଦାନ୍ତଗୁଡ଼ିକ ଅକ୍ଷତ ଅବସ୍ଥାରେ ରହିଛି ।
