କରଞ୍ଜିଆ,୦୭/୦୯: ଶିମିଳିପାଳ ଅଭୟାରଣ୍ୟରେ ଦନ୍ତା ହାତୀ ଶିକାର ଘଟଣାରେ ଆଉ ୫ ଜଣଙ୍କୁ ଗିରଫ କରିଛି ବନବିଭାଗ । ପୂର୍ବରୁ ଏହି ମାମଲାରେ ୧୧ ଜଣ ଶିକାରୀଙ୍କୁ ଗିରଫ କରିବାରେ ସଫଳ ହୋଇଥିଲା ବନବିଭାଗ । ବର୍ତ୍ତମାନ ଆଉ ୫ ଜଣ ଶିକାରୀଙ୍କୁ ଗିରଫ କରାଯାଇଛି । ୫ଜଣ ଅଭିଯୁକ୍ତଙ୍କ ମଧ୍ୟରୁ ୩ ଜଣ କନ୍ଦିବିଲ୍ ଏବଂ ଅନ୍ୟ ଦୁଇଜଣ ଭାଲିଆଗୋଡା ଓ ଖେଜୁରି ଗାଁର ବୋଲି ଜଣାପଡିଛି । ଶିମିଳିପାଳ ଦକ୍ଷିଣ ବନ୍ୟପ୍ରାଣୀ ବନଖଣ୍ଡର ଜାତୀୟ ଉଦ୍ୟାନ ରେଞ୍ଜ୍ ଅଞ୍ଚଳରେ ୨୦୨୩ ମସିହାରେ ଏହି ଦୁର୍ଘଟଣା ହୋଇଥିଲା ।
ସୂଚନା ଅନୁଯାୟୀ, ଦନ୍ତା ହାତୀ ଶିକାର ଘଟଣାରେ ୫ ଜଣ ଫେରାର ହୋଇଯାଇଥିଲେ । ଏମାନଙ୍କ ବିରୁଦ୍ଧରେ କୋର୍ଟ ଜାମିନ୍ ବିହୀନ ପରୱାନା ଜାରି କରିଥିଲେ । ତେବେ ଏକ ବିଶେଷ ସୂତ୍ରରୁ ଖବର ପାଇ ଶିମିଳିପାଳ ଦକ୍ଷିଣ ବନ୍ୟପ୍ରାଣୀ ବନଖଣ୍ଡର ସହକାରୀ ବନ୍ୟ ସଂରକ୍ଷକଙ୍କ ନେତୃତ୍ୱରେ ଏକ ଟିମ୍ ଏହି ୫ ଜଣ ଶିକାରୀଙ୍କୁ ଗିରଫ କରିବାରେ ସଫଳ ହୋଇଛନ୍ତି ।
୨୦୨୩ ମସିହା ନଭେମ୍ବର ମାସରେ ଶିମିଳିପାଳ ଦକ୍ଷିଣ ବନ୍ୟପ୍ରାଣୀ ବନଖଣ୍ଡର ଜାତୀୟ ଉଦ୍ୟାନ ରେଞ୍ଜ୍ ଅଞ୍ଚଳରେ ଏକ ଦନ୍ତା ହାତୀର ଶିକାର କରାଯାଇଥିଲା । ହାତୀଟିର ଶିକାର କରି ତାର ଦାନ୍ତ କାଟି ନେଇଯାଇଥିଲେ ୧୬ ଶିକାରୀ । ଏହି ଘଟଣାରେ ବନବିଭାଗ ଉକ୍ତ ୧୬ ଜଣ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରି ୧୧ ଜଣ ଶିକାରୀଙ୍କୁ ଗିରଫ କରିବାରେ ସଫଳ ହୋଇଥିବା ବେଳେ ୫ ଜଣ ଫେରାର ହୋଇଥିଲେ ।