କାମାକ୍ଷାନଗର,୨୯/୩(ଆପ୍ର): ୮୦ ବର୍ଷରୁ ଉର୍ଦ୍ଧ୍ୱ ବୟସର ବୃଦ୍ଧବୃଦ୍ଧା ତଥା ୮୦ ପ୍ରତିଶତରୁ ଊର୍ଦ୍ଧ୍ୱ ଭିନ୍ନକ୍ଷମଙ୍କୁ ସରକାର ୩୫ଶହ ଟଙ୍କା ଭତ୍ତା ଦେଉଛନ୍ତି। ମାତ୍ର ବିଭାଗୀୟ ଅଧିକାରୀଙ୍କ ଖାମ୍ଖିଆଲି ନୀତି ଯୋଗୁଁ ଅନେକ ଯୋଗ୍ୟ ହିତାଧିକାରୀ ଏଥିରୁ ବଞ୍ଚିତ ହେଉଛନ୍ତି। ପରଜଙ୍ଗ ବ୍ଳକ୍ ମୁକ୍ତାପଶି ଗ୍ରାମ ୮୦ ବର୍ଷରୁ ଊର୍ଦ୍ଧ୍ୱ ଭିନ୍ନକ୍ଷମ ବୃଦ୍ଧା ରେଣୁ ସାହୁଙ୍କୁ ବର୍ଦ୍ଧିତ ଭତ୍ତା ମିଳୁନି। ଭିନ୍ନକ୍ଷମ ମା’ଙ୍କୁ ବୋହି ଆଜି ପୁଅ ଭରତ ସାହୁ କାମାକ୍ଷାନଗର ଉପଜିଲ୍ଲାପାଳଙ୍କୁ ଫେରାଦ ହୋଇ ଏ ସମ୍ପର୍କରେ ଅଭିଯୋଗ କରିଛନ୍ତି।
ରେଣୁଙ୍କ ବୟସ ୮୦ ଟିପିଥିବା ବେଳେ ସେ ଭିନ୍ନକ୍ଷମ ମଧ୍ୟ। ଗୋଟିଏ ଗୋଡ଼ ତାଙ୍କର ଜନ୍ମରୁ ଦୀର୍ଘବର୍ଷ ଧରି କାମ କରୁନି। ଯାହାଫଳରେ ସେ ଚଲାବୁଲା କରିପାରୁନାହାନ୍ତି। ନିୟମ ଅନୁଯାୟୀ ତାଙ୍କୁ ୩୫ଶହ ଟଙ୍କା ଭତ୍ତା ମିଳିବା କଥା। ମାତ୍ର ତାଙ୍କୁ ଏବେ ୧୨ଶହ ଟଙ୍କା ଭତ୍ତା ମିଳୁଛି। ବର୍ଦ୍ଧିତ ଭତ୍ତା ଦେବାକୁ ସେ ମା’ଙ୍କୁ ବୋହି ବ୍ଲକ୍ କାର୍ଯ୍ୟାଳୟକୁ ଯାଇ ନିରାଶ ହେବା ପରେ ଆଜି ଉପଜିଲ୍ଳାପାଳଙ୍କ ନିକଟକୁ ଅଭିଯୋଗ କରିବାକୁ ଆସିଥିଲେ। ଚାଲିପାରୁନଥିବା ମା’ଙ୍କୁ କାନ୍ଧରେ ବୋହି ଉପଜିଲ୍ଲାପାଳ ଦିନମଣି ନାଏକଙ୍କ ନିକଟକୁ ନେଇଥିଲେ। ଉପଜିଲ୍ଲାପାଳ ସମସ୍ତ ଅଭିଯୋଗ ଶୁଣିବା ସହ ବ୍ଲକ୍ ପ୍ରଶାସନ ସହ ଆଲୋଚନା କରି ପଦକ୍ଷେପ ନେବାକୁ ପ୍ରତିଶ୍ରୁତି ଦେଇଥିବା ଜଣାପଡିଛି।
