ନୂଆଦିଲ୍ଲୀ,୨୨/୦୭: ଭୂକମ୍ପ ଝଟକାରେ ଥରିଲା ହରିୟାଣା। ସକାଳ ୬ଟାରେ ହରିୟାଣାର ଫରିଦାବାଦରେ ଭୂକମ୍ପ ଝଟକା ଅନୁଭୂତ ହୋଇଛି । ଯାହାର ରିକ୍ଟର ସ୍କେଲରେ ତୀବ୍ରତା ୩.୨ ରେକର୍ଡ କରାଯାଇଛି। ଫଳରେ ଅଧିକାଂଶ ଲୋକ ଭୟଭୀତ ହୋଇ ଘରୁ ବାହାରକୁ ପଳାଇଥିଲେ । ତେବେ ଏହି ଭୂମିକମ୍ପ ନେଇ କୌଣସି କ୍ଷୟକ୍ଷତି ହେବାର ସୂଚନା ନାହିଁ ।
ସୂଚନା ଅନୁଯାୟୀ, ଭୂମିକମ୍ପର କେନ୍ଦ୍ରସ୍ଥଳ ଫରିଦାବାଦର ଦକ୍ଷିଣ ପୂର୍ବରେ ୧୬ କିଲୋମିଟର ଏବଂ ଭୂମିଠାରୁ ଗଭୀରତା ୫ କିଲୋମିଟର ଥିଲା। ତେବେ ଗତ ଗୋଟିଏ ସପ୍ତାହ ମଧ୍ୟରେ ହରିୟାଣାରୁ ଅନେକ ଭୂମିକମ୍ପର ରିପୋର୍ଟ ଆସିଛି। ତୃତୀୟ ଭୂମିକମ୍ପ ୧୬ ଜୁଲାଇରେ ହୋଇଥିଲା ଏବଂ ଆଜି ଚତୁର୍ଥ ଥର ପାଇଁ ପୃଥିବୀ ଥରି ଉଠିଛି। ବୁଧବାର ରାତିରେ ହରିୟାଣାର ରୋହତକ ଜିଲ୍ଲାରେ ମୃଦୁ ଭୂମିକମ୍ପ ଅନୁଭୂତ ହୋଇଥିଲା। ବୁଧବାର ରାତି ପ୍ରାୟ ୧୨ଟା ୪୬ ମିନିଟରେ ୩.୩ ତୀବ୍ରତାର ଏକ ଭୂମିକମ୍ପ ରେକର୍ଡ କରାଯାଇଥିଲା। ଏହାର କେନ୍ଦ୍ରସ୍ଥଳ ରୋହତକରୁ ୧୫ କିଲୋମିଟର ପୂର୍ବରେ ୧୦ କିଲୋମିଟର ଗଭୀରତାରେ ଥିଲା। ସେହିପରି ୧୧ ଜୁଲାଇରେ ରୋହତକ ନିକଟସ୍ଥ ଜିଲ୍ଲା ଝାଜ୍ଜରରେ ସମାନ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଥିଲା। ଏହାର ଗୋଟିଏ ଦିନ ପୂର୍ବରୁ ଝାଜ୍ଜରରେ ୪.୪ ତୀବ୍ରତାର ଭୂମିକମ୍ପ ଅନୁଭୂତ ହୋଇଥିଲା। ସେହି ସମୟରେ ଦିଲ୍ଲୀରେ ମଧ୍ୟ ମୃଦୁ ଭୂମିକମ୍ପ ଯୋଗୁଁ ଭୂମି କମ୍ପିତ ହୋଇଥିଲା।
