ଦେବଗଡ଼, ୧୦/୦୮: ସନ୍ଦେହ ହେଲେ ଟେଷ୍ଟ କରିବୁ...ଉଠେଇ ନେବୁ, ଆମେ ପରା ପୁଲିସ୍ ବାବୁ । ଏହା କୌଣସି ଫିଲ୍ମ ଡାଇଲଗ୍ ନୁହେଁ । ବରଂ ଦେବଗଡ଼ ସହରରେ ଚାଲିଥିବା ପ୍ରସିଦ୍ଧ ଗଣେଶ ମେଳା ପାଇଁ ମଡେଲ ଥାନା ପକ୍ଷରୁ ଶୁଭାରମ୍ଭ ହୋଇଥିବା ସ୍ୱତନ୍ତ୍ର ମଦୁଆ ଧରପଗଡ ଗାଡ଼ିର ପୁଲିସ୍ କର୍ମଚାରୀଙ୍କ କଥାବାର୍ତ୍ତା । ତେଣୁ ଜିଲ୍ଲାରେ ବିଭିନ୍ନ ଅଞ୍ଚଳରୁ ବର୍ଷକୁ ଥରେ ଶ୍ରୀଗଣେଶଙ୍କ ଦର୍ଶନ ପାଇଁ ଆସୁଥିବା ଶ୍ରଦ୍ଧାଳୁ ଓ ଦର୍ଶକଙ୍କୁ ସୁରକ୍ଷା ଦେବାକୁ ପୁଲିସ ପକ୍ଷରୁ ସ୍ୱତନ୍ତ୍ର ପଦକ୍ଷେପ ନିଆଯାଇଛି । ବିଶେଷତଃ ସନ୍ଧ୍ୟା ବେଳେ କିଛି ଅସାମାଜିକ ବ୍ୟକ୍ତି ଢକଲମ୍ ହେବାସହ ଗହଳି ସ୍ଥାନରେ ବୋବାଲ୍ କରୁଥିବାରୁ ମେଳା ଉପଭୋଗ କରିବାକୁ ଆସୁଥିବା ମହିଳାଙ୍କ ସୁରକ୍ଷା ଦୃଷ୍ଟିରୁ ଏଭଳି ପଦକ୍ଷେପ ଗ୍ରହଣ କରାଯାଇଥିବା ପୁଲିସ ପକ୍ଷରୁ କୁହାଯାଇଛି । ଫଳରେ ପୁଲିସ ବାଲାଙ୍କ ଏଭଳି ପଦକ୍ଷେପ ମଦୁଆ ମହଲରେ ଏକ ପ୍ରକାର ଭୟର ବାତାବରଣ ସୃଷ୍ଟି କରିଥିବା ବେଳେ ସଚେତନ ମହଲରେ ପ୍ରଶଂସିତ ହୋଇଛି ।
ଏ ସମ୍ପର୍କରେ ମଡେଲ ଥାନା ଆଇଆଇସି ସରୋଜ କୁମାର ସେଠୀଙ୍କୁ ପଚାରିବାରେ ମଦୁଆ ପକଡ୍ ଗାଡି ବିଭିନ୍ନ ରାସ୍ତା ଓ ସାହି ଗଳି ସହ ପ୍ରଧାନପାଟ, ମହିଳା କଲେଜ, ମହୁଲଢିପା ନାଳ ପଡିଆ, ଆଇ.ଜି.ଷ୍ଟାଡିୟମ ଓ ଏନ୍ଏଚ୍ ବାଇପାସ ଭଳି ବିଭିନ୍ନ ନିଛାଟିଆ ଜାଗାରେ ପଇଁତରା ମାରିବାସହ ମଦୁଆଙ୍କୁ ଆକଟ କରିବା ନିମନ୍ତେ ଏଭଳି ପଦକ୍ଷେପ ନିଆଯାଇଥିବା କହିଛନ୍ତି । ତେଣୁ ମେଳା ଦେଖିବାକୁ ଆସୁଥିବା ଲୋକେ ଏ ଦିଗରେ ବିଶେଷ ଯତ୍ନବାନ ହେବାସହ ମଦୁଆଙ୍କ ପ୍ରାର୍ଦୁଭାବ ଦେଖିଲେ ତୁରନ୍ତ ୧୧୨ ଟୋଲଫ୍ରି ନମ୍ବରରେ ପୁଲିସ୍ ମଦୁଆ ପକଡ୍ ଗାଡ଼ି ଇନଚାର୍ଜ ଏସ୍ଆଇ ବିନୟ ପରିଡାଙ୍କୁ ସୂଚନା ଦେବା ନିମନ୍ତେ ଅନୁରୋଧ କରିଛନ୍ତି ।
