ତେଲକୋଇ, ୨୨/୦୬: ତେଲକୋଇ-ଜଗମୋହନପୁର ଯୋଗାଯୋଗ ବିଚ୍ଛିନ୍ନ । ରବିବାର ହୋଇଥିବା ପ୍ରବଳ ବର୍ଷାରେ ଲୋକନାଥପୁର ନିକଟରେ ବାଉଁଶ ଯୋରା ପୋଲର ଡାଇଭର୍ସନ ରାସ୍ତା ଧୋଇ ହୋଇଯାଇଛି । ଫଳରେ ତେଲକୋଇରୁ ଜଗମୋହନପୁର, ଦେବଗଡ଼, ସମ୍ବଲପୁର, ରାଉରକେଲାକୁ ଯୋଗଯୋଗ ବିଚ୍ଛିନ୍ନ ହୋଇଛି । ଏହା ସହିତ ତେଲକୋଇ ବ୍ଲକର ଛାମୁଣ୍ଡା, ଜଗମୋହନପୁର, ବିଞ୍ଜବାହାଳ ଆଦି ପଞ୍ଚାୟତର ୨୦ରୁ ଅଧିକ ଗାଁ ବ୍ଲକ୍ ମୁଖ୍ୟାଳୟରୁ ବିଚ୍ଛିନ୍ନ ହୋଇଛି । ଯାହା ଫଳରେ ଜରୁରୀ କାଳୀନ ସେବା ମଧ୍ୟ ପ୍ରଭାବିତ ହୋଇଛି । ପୂର୍ତ୍ତ ବିଭାଗର ଦାୟିତ୍ୱହୀନତା ଏବଂ ନିମ୍ନମାନର ଡାଇଭର୍ସନ କାର୍ଯ୍ୟ ଯୋଗୁଁ ଏଭଳି ସମସ୍ୟା ଉପୁଜୁଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ ।
ରବିବାର ସକାଳ ସମୟରୁ ଡାଇଭର୍ସନ ପୋଲ ଧୋଇ ହୋଇଯାଇଥିବା ବେଳେ ଅଦ୍ୟାବଧି ମରାମତି ହୋଇ ପାରିନାହିଁ । ଫଳରେ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଯାତ୍ରୀବାହୀ ବସ୍ ଓ ଅନ୍ୟାନ୍ୟ ଗାଡ଼ି ସବୁ ଦୋବଲା ପାଳ, ଛାମୁଣ୍ଡା ଦେଇ ଏକ ସଂକୀର୍ଣ୍ଣ ରାସ୍ତାରେ ଯାତାୟାତ କରୁଛନ୍ତି । ତେଣୁ ଜିଲ୍ଲାପାଳ ଏ ଦିଗରେ ତୁରନ୍ତ ପଦକ୍ଷେପ ଗ୍ରହଣ କରିବାକୁ ସ୍ଥାନୀୟ ଅଞ୍ଚଳ ବାସୀ ଦାବି କରିଛନ୍ତି ।
