କଣାସ,୦୧/୦୯: ଭୋପାଳରୁ ଆସିଲା ବାର୍ଡ ଫ୍ଲୁ ଟେଷ୍ଟ ରିପୋର୍ଟ । ଡେଲାଙ୍ଗ ଓ ନିମାପଡ଼ା ଅଞ୍ଚଳରେ ସଂକ୍ରମିତ ହୋଇଛି ବାର୍ଡ ଫ୍ଲୁ । ପ୍ରାଣୀସମ୍ପଦ ବିଭାଗର ଆରଆର ଟିମ୍ ଓ ସ୍ଥାନୀୟ ପ୍ରାଣୀ ଚିକିତ୍ସା ଅଧିକାରୀ ଆରମ୍ଭ କଲେ କୁକୁଡ଼ା ମରା ଅଭିଯାନ । ଡେଲାଙ୍ଗର ମୋଟରି ଅଞ୍ଚଳରେ ପ୍ରାୟ ୭୦ଟି କୁକୁଡା ଫାର୍ମର ୧୦ହଜାର କୁକୁଡା ଏବଂ ନିମାପଡ଼ାର କୋଠକୋସଙ୍ଗ ଅଞ୍ଚଳରେ ପ୍ରାୟ ୫୦ ଟି ଫାର୍ମର ୧୦ ହଜାର କୁକୁଡ଼ା ମାରିବାର ଲକ୍ଷ୍ୟ ରଖାଯାଇଛି ।

ସୂଚନା ଅନୁଯାୟୀ, ଅଗଷ୍ଟ ୨୯ ତାରିଖ ଅର୍ଥାତ ଗୁରୁବାରରେ ଡେଲାଙ୍ଗ ଓ ନିମାପଡ଼ା ଅଞ୍ଚଳର କୁକୁଡ଼ାଙ୍କ ନମୁନା ଟେଷ୍ଟ କରିବା ପାଇଁ ଭୋପାଳ ପଠାଯାଇଥିଲା । ତେବେ ସେପ୍ଟେମ୍ୱର ୧ ଅର୍ଥାତ ରବିବାର ଏହି ଟେଷ୍ଟର ରିପୋର୍ଟ ଆସିଛି । ଡେଲାଙ୍ଗ ଓ ନିମାପଡ଼ା ଅଞ୍ଚଳର କୁକୁଡ଼ା ବାର୍ଡ ଫ୍ଲୁ ପଜେଟିଭ୍‌ ବୋଲି ଏହି ରିପୋର୍ଟରୁ ଜଣାପଡ଼ିଛି । ବାର୍ଡ ଫ୍ଲୁ ଚିହ୍ନଟ ହେବାପରେ ଆରମ୍ଭ ହେଲା କୁକୁଡ଼ା ମରା ଅଭିଯାନ । ନିମାପଡ଼ାର କୋଠକୋସଙ୍ଗ ଓ ଡେଲାଙ୍ଗର ମୋଟରି ଅଞ୍ଚଳରେ ଆରଆର ଟିମ ପହଞ୍ଚିଲେଣି । ଉଭୟ ସ୍ଥାନରେ ଆରଆର ଟିମର ୪୦ ଜଣିଆ ସଦସ୍ୟ ରହିଛନ୍ତି । 

ତେବେ ରବିବାର ଆରଆର ଟିମ ସଦସ୍ୟଙ୍କର ରକ୍ତ ନମୁନା ସଂଗ୍ରହ କରି ସେମାନଙ୍କ ସ୍ଵାସ୍ଥ୍ୟବସ୍ଥା ଯାଞ୍ଚ କରାଯାଇଛି । ଏହା ପରେ କିଭଳି କୁକୁଡ଼ା ମରାଯିବ ଓ ମଲା କୁକୁଡ଼ାକୁ କିଭଳି ପୋତାଯିବ, ସେ ନେଇ ଟ୍ରେନିଂ ଦିଆଯିବା ପରେ ଅପରାହ୍ନରେ କୁକୁଡ଼ା ମରା ଯାଇ ପାରେ ବୋଲି ଖବର ମିଳିଛି ।