ଢେଙ୍କାନାଳ,୧୮/୦୫:ଢେଙ୍କାନାଳ ଜିଲ୍ଲା ସଦର ବ୍ଳକ ବଣସିଂହ ପଞ୍ଚାୟତର ନାଗେନା ବାଲିଘାଟରୁ ହାଇୱା ଚାଳକଙ୍କ ମୃତଦେହ ଉଦ୍ଧାର । ମୃତକ ଢେଙ୍କାନାଳ ସଦର ଥାନା ଅନ୍ତର୍ଗତ ଖମାର ଗ୍ରାମର ରୁଦ୍ର ନାରାୟଣ ନାଏକ ବୋଲି ଜଣାପଡ଼ିଛି। ହତ୍ୟା ସନ୍ଦେହରେ ୨ ଜଣଙ୍କୁ ଅଟକ ରଖି ପୁଲିସର ତଦନ୍ତ ଜାରି ରହିଛି।
ସୂଚନା ମୁତାବକ, ଶନିବାର ରାତି ୧୧ଟା ସମୟରେ ରୁଦ୍ର ବାଲି ଘାଟକୁ ଟିପ୍ପର ନେଇ ଯାଇଥିଲେ। ଦୁଇ ଟ୍ରିପ ବାଲି ପକାଇବା ପରେ ଭୋର୍ ସମୟରେ ପୁଣି ଘାଟକୁ ଆସିଥିଲେ। ପରେ ସେଠାରେ କେହି ତାଙ୍କୁ ମାରି ପକାଇ ଦେଇଥିବା ଅଭିଯୋଗ କରିଛନ୍ତି ପରିବାର ଲୋକ। ସକାଳୁ ଏହି ଖବରପାଇ ପରିବାର ଲୋକ ଘଟଣାସ୍ଥଳରେ ପହଞ୍ଚିଥିଲେ। ଘଟଣାକୁ ନେଇ ବାଲିଘାଟରେ ଚାପା ଉତ୍ତେଜନା ଦେଖିବାକୁ ମିଳିଛି। ସଦରଥାନା ପୁଲିସ ବାଲିଘାଟରେ ପହଞ୍ଚି ତଦନ୍ତ ଜାରି ରଖିବା ସହ ହତ୍ୟା ସନ୍ଦେହରେ ସୁକିନ୍ଦା ଅଂଚଳର ଚିନ୍ମୟ ବେହେରା ଓ ବଡ଼ ନଗେନା ଗ୍ରାମର ପ୍ରମୋଦ ବେହେରା ନାମକ ଦୁଇଜଣ ପୋକଲିନ ଅପରେଟରଙ୍କୁ ଅଟକ ରଖି ପଚରା ଉଚୁରା କରୁଛି।
