ମୋରଡ଼ା, ୨୯/୦୮: କିସ୍ତି ଟଙ୍କା ଦେଇ ଫେରିବା ବେଳେ ମୃତ୍ୟୁ ମୁଖରେ ପଡ଼ିଲେ ମହିଳା । ଗାଁ ପୋଖରୀରେ ମିଳିଲା ମହିଳାଙ୍କ ମୃତଦେହ । ମୃତ ମହିଳା ଜଣକ ସାନମୁଣ୍ଢାବଣି ପଞ୍ଚାୟତର ବାଘାଝରଣା ଡାହିସାହି ଗ୍ରାମର ପାରାଓ ହାଁସଦାଙ୍କ ସ୍ତ୍ରୀ ସୁମିତ୍ରା ହାଁସଦା ବୋଲି ଜଣାପଡ଼ିଛି । ସାନମୁଣ୍ଢାବଣି ପଞ୍ଚାୟତର ଉଲୁମୁଣ୍ଡି ଜୁଗୁନି ସାହିରେ ଏଭଳି ଅଭାବନୀୟ ଘଟଣା ଘଟିଛି ।
ସୂଚନା ଅନୁଯାୟୀ, ସୁମିତ୍ରା ଅଗଷ୍ଟ ୨୭ ତାରିଖ ଅର୍ଥାତ ମଙ୍ଗଳବାର ସନ୍ଧ୍ୟାରେ କିସ୍ତି ଟଙ୍କା ଦେବାକୁ ଶାଶୁଘରୁ ବାପଘରକୁ ଆସିଥିଲେ । ସେଠାରେ କିସ୍ତି ଟଙ୍କା ଦେଇ ଚାଲିଯାଇଥିଲେ । ତେବେ ଗୁରୁବାର ସକାଳୁ ସୁମିତ୍ରାଙ୍କ ମୃତଦେହ ଉଲୁମୁଣ୍ଡି ଜୁଗୁନି ସାହିର ପୋଖରୀରେ ଭାସୁଥିବାର ଦେଖିବାକୁ ପାଇଥିଲେ ଗ୍ରାମବାସୀ । ଏହା ଦେଖି ତୁରନ୍ତ ପୋଲିସ ଏବଂ ଅଗ୍ନିଶମ ବାହିନୀକୁ ଖବର ଦେଇଥିଲେ ଘଟଣାସ୍ଥଳରେ ପୋଲିସ ଏବଂ ଅଗ୍ନିଶମ ବାହିନୀ ପହଞ୍ଚି ପୋଖରୀରୁ ମୃତଦେହ ଉଦ୍ଧାର କରିଥିଲେ । ମୋରଡ଼ା ଥାନା ଅଧିକାରୀ ସତ୍ୟନାରାୟଣ ବଳ ଓ ଏଏସଆଇ ଦୀନବନ୍ଧୁ ଦେହୁରୀ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ବ୍ୟବଚ୍ଛେଦ ପାଇଁ ବାରିପଦାସ୍ଥିତ ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜ ଆଣ୍ଡ ହସ୍ପିଟାଲକୁ ପଠାଇଛନ୍ତି । ଏଥି ସହିତ ଘଟଣାର ତଦନ୍ତ ମଧ୍ୟ ଆରମ୍ଭ କରିଛନ୍ତି । ପରେ ଖବର ପାଇ ସାନମୁଣ୍ଢାବଣି ଆରଆଇ କୃଷ୍ଣମୋହନ ମହାନ୍ତ ଘଟଣାସ୍ଥଳରେ ପହଞ୍ଚି ମୃତକଙ୍କ ପରିବାରକୁ ଚାରି ଲକ୍ଷ ଟଙ୍କା କ୍ଷତି ପୂରଣ ମିଳିବ ବୋଲି କହିଛନ୍ତି । ସରପଞ୍ଚ ମାଇନ ମାର୍ଣ୍ଡି ମଧ୍ୟ ଯଥାଶୀଘ୍ର ମୃତକଙ୍କ ପରିବାରକୁ ହରିଶ୍ଚନ୍ଦ୍ର ଯୋଜନାର ଆର୍ଥିକ ସହାୟତା ଦେବେ ବୋଲି କହିଛନ୍ତି ।