ଗଞ୍ଜାମ, ୦୪/୧୨: ୧୬ ନମ୍ବର ଜାତୀୟ ରାଜପଥରେ ରନ୍ଧନ ଗ୍ୟାସ ଭରା ଟ୍ରକରେ ଲାଗିଲା ନିଆଁ । ନିଆଁ ଲାଗିବାର କାରଣ ଅସ୍ପଷ୍ଟ ରହିଛି । ଗଞ୍ଜାମ ଥାନା ଅନ୍ତର୍ଗତ ସୂର୍ଯ୍ୟନାରାୟଣ ପୁର ଗ୍ରାମନିକଟ ୧୬ ନମ୍ବର ଜାତୀୟ ରାଜପଥରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଖୋର୍ଦ୍ଧା ଗ୍ୟାସ ଡିପୋରୁ ଗ୍ୟାସ ଭରି ଓଡି ୦୨ସି ୫୮୫୫ ନମ୍ବର ବିଶିଷ୍ଟ ଟ୍ରକ୍ ବ୍ରହ୍ମପୁର ଅଭିମୁଖେ ଯାଉଥିଲା । ଏହି ସମୟରେ ଗଞ୍ଜାମ ଥାନା ସୂର୍ଯ୍ୟନାରାୟଣ ପୁର ଗ୍ରାମ ନିକଟ ୧୬ ନମ୍ୱର ଜାତୀୟ ରାଜପଥରେ ପହଞ୍ଚିବା ସମୟରେ ଇଞ୍ଜିନରୁ ଧୁଆଁ ବାହାରିଥିଲା । ଏହା ଦେଖି ଗାଡିର ଡ୍ରାଇଭର ପ୍ରହଲ୍ଲାଦ ଜେନା ଗାଡି ଛାଡି ଦୂରକୁ ଚାଲିଯାଇ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଏସଡିପିଓ ଗୌରହରି ସାହୁ, ଗଞ୍ଜାମ ଥାନା ଆଇଆଇସି ସୁମିତ୍ରା ପାତ୍ର ପ୍ରମୁଖ ଘଟଣା ସ୍ଥଳକୁ ଆସି ଅଗ୍ନିଶମ ବିଭାଗକୁ ସୂଚନା ଦେଇଥିଲେ । ସୂଚନା ପାଇ ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ କରିଛି । ଏହି ଘଟଣା ସମୟରେ ରାସ୍ତା ଦେଇ ଯାଉଥିବା ସମସ୍ତ ଯାନବାହାନ ଚଳାଚଳକୁ କିଛି ସମୟ ପାଇଁ ବନ୍ଦ କରି ଦିଆଯାଇଥିଲା ।
