କଟକ, ୩୦/୧୦ : ୨୩ ବର୍ଷରୁ କମ୍‌ ପୁରୁଷ ସି.କେ ନାୟୁଡୁ ଟ୍ରଫିର ୩ୟ ଲିଗ୍‌ ମ୍ୟାଚରେ ଘରୋଇ କେରଳ ବିପକ୍ଷରେ ଓଡି଼ଶା ପ୍ରଥମ ଇନିଂସ ଅଗ୍ରଣୀ ହାସଲ କରିଛି । କେରଳର ପ୍ରଥମ ଇନିଂସ ୩୧୯ ରନ ଜବାବରେ ଓଡ଼ିଶା ୮ ୱିକେଟରେ ୪୭୨ ରନ କରିଛି । ପେସ୍‌ ବୋଲର ସମ୍ୱିତ ବରାଳ ଉଭୟ ବୋଲିଂ ଏବଂ ବ୍ୟାଟିଂରେ ଚମତ୍କାର ପ୍ରଦର୍ଶନ କରିଛନ୍ତି । ୪ ୱିକେଟ ନେବା ସହ ସେ ୧୦୬ ରନ କରି ଅପରାଜିତ ରହିଛନ୍ତି । 

ବୁଧବାର ହେଉଛି ମ୍ୟାଚର ଅନ୍ତିମ ଦିବସ । ୧୫୩ ରନରେ ଆଗୁଆ ରହିଥିବା ଓଡି଼ଶା କେରଳ ଠାରୁ ବିଜୟ ପଏଣ୍ଟ ହାସଲ କରିବାକୁ ଲକ୍ଷ୍ୟ ରଖିଛି । ଦ୍ୱିତୀୟ ଦିବସ ଖେଳ ଶେଷ ସୁଦ୍ଧା ଓଡ଼ିଶା ୩ ୱିକେଟ୍‌ରେ ୨୦୫ ରନ୍‌ କରିଥିଲା । ଆଜି ତୃତୀୟ ଦିବସରେ ଦଳ ପୂରା ଦିନ ବ୍ୟାଟିଂ କରିଥିଲା । ସମ୍ବିତ ଶତକ ହାସଲ କରି ଅପରାଜିତ ରହିଥିବାବେଳେ ଓମ୍‌ ୯୨, ସାୱନ ପହରିଆ ୫୮, ସାଇଦୀପ ମହାପାତ୍ର ୬୪ ଏବଂ ଆଶୁତୋଷ ମାର୍ଣ୍ଡି ୫୧ ରନ୍‌ କରିଥିଲେ ।