କଟକ,୧୨/୦୧: ରାଜ୍ୟବ୍ୟାପୀ ବିଭିନ୍ନ ଥାନାରେ ସାଇବର ଅପରାଧ ଅଭିଯୋଗ ବଢ଼ିବାରେ ଲାଗିଛି । ତଦନ୍ତ ପ୍ରକ୍ରିୟାରେ ପୁଲିସ୍ ସେତେଟା ସଫଳ ହେଉନଥିବାରୁ ଏତଲାକାରୀ ନିରାଶ ହେଉଛନ୍ତି । ଏଭଳି ସ୍ଥିତିରେ ଆଗାମୀ ଦିନରେ ସାଇବର ଅପରାଧ ତଦନ୍ତରେ ରାଜ୍ୟ ପୁଲିସ୍ ବାହିନୀରେ ସାଇବର କମାଣ୍ଡୋମାନେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ ବୋଲି ଜଣେ ବରିଷ୍ଠ ପୁଲିସ୍ ଅଧିକାରୀ କହିଛନ୍ତି । ରାଜ୍ୟ ପୁଲିସ୍ ବାହିନୀ ପକ୍ଷରୁ ସାଇବର କମାଣ୍ଡୋ ଚୟନ ପ୍ରକ୍ରିୟା କରାଯାଉଛି । ଜିଲ୍ଲା ସ୍ତରରୁ ସୁପାରିସ ହୋଇଥିବା ବିଟେକ୍ ଡିଗ୍ରୀଧାରୀ ଏସ୍ଆଇଙ୍କଠାରୁ ଆରମ୍ଭ କରି ଏଏସ୍ଆଇ ଓ କନ୍ଷ୍ଟେବଲ ପ୍ରମୁଖ ଭୁବନେଶ୍ୱରସ୍ଥିତ ଟ୍ରାଫିକ୍ ଟ୍ରେନିଂ ଇନ୍ଷ୍ଟିଚ୍ୟୁଟ୍ (ଟିଟିଆଇ) ରେ ଶନିବାର ଏହି ପରୀକ୍ଷା ଦେଇଥିବା ସୂଚନା ମିଳିଛି ।
ପ୍ରାଥମିକ ପର୍ଯ୍ୟାୟରେ ଶହେ ଜଣ ପୁଲିସ୍ କର୍ମଚାରୀ ପରୀକ୍ଷା ଦେଇଛନ୍ତି । ଓଏମ୍ଆର୍ ଭିତ୍ତିକ ୨୦୦ ନମ୍ବରର ପରୀକ୍ଷା ସାଇବର ଅପରାଧ ସଂକ୍ରାନ୍ତ ପ୍ରଶ୍ନକୁ ନେଇ ହୋଇଥିଲା । ପରୀକ୍ଷା ଦେଇଥିବା ପୁଲିସ୍ କର୍ମଚାରୀମାନଙ୍କ ମଧ୍ୟରୁ ଖୁବ ଶୀଘ୍ର ଯୋଗ୍ୟତା ତାଲିକା ପ୍ରକାଶ ପାଇବ । ଯୋଗ୍ୟ ପୁଲିସ କର୍ମଚାରୀଙ୍କୁ ଜାତୀୟ ସ୍ତରରେ ଇଣ୍ଡିଆନ୍ ସାଇବର କ୍ରାଇମ୍ କୋ- ଅର୍ଡିନେସନ୍ ସେଣ୍ଟର ପକ୍ଷରୁ ସାଇବର ଅପରାଧ ତଦନ୍ତରେ ଦକ୍ଷତା ବୃଦ୍ଧି ଲାଗି ଟ୍ରେନିଂ ଦିଆଯିବ । ଆଇଆଇଟି ବିଶେଷଜ୍ଞ ସମେତ ସାଇବର ଜ୍ଞାନକୌଶଳ ସମ୍ପର୍କରେ ଜାତୀୟ ସ୍ତରରେ ଦକ୍ଷ ଅଧିକାରୀମାନଙ୍କଠାରୁ ସମ୍ପୃକ୍ତ ସାଇବର କମାଣ୍ଡୋମାନେ ତାଲିମ୍ ନେଇ ଫେରିବା ପରେ ତଦନ୍ତକାରୀ ଅଧିକାରୀଙ୍କୁ ତଦନ୍ତରେ ସହଯୋଗ କରିବେ । ସାଇବର ଅପରାଧୀଙ୍କୁ ଠାବ କରିବା ସହ ସେମାନଙ୍କ ବିରୋଧରେ ବଳିଷ୍ଠ ପ୍ରମାଣ ଯୋଗାଡ଼ କରିବାରେ ଟ୍ରେନିଂପ୍ରାପ୍ତ ସାଇବର କମାଣ୍ଡୋମାନେ ପ୍ରମୁଖ ଭୂମିକା ନେବେ ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି । ପୁଲିସ୍ କର୍ମଚାରୀଙ୍କ ମଧ୍ୟରୁ ସାଇବର କମାଣ୍ଡୋ ଭାବେ କାର୍ଯ୍ୟ କରିବା ପାଇଁ ଇଛୁକ କର୍ମଚାରୀମାନଙ୍କ ନାଁ ସୁପାରିସ କରିବା ପାଇଁ କ୍ରାଇମବ୍ରାଞ୍ଚ ପକ୍ଷରୁ ଗତ ନଭେମ୍ବର ମାସରେ ଜିଲ୍ଲା ଏସ୍ପିମାନଙ୍କୁ ନିର୍ଦ୍ଦେଶ ଦିଆଯାଇଥିଲା । ଏଥିଲାଗି ଏସ୍ପିମାନେ ବିଟେକ୍ ଡିଗ୍ରୀଧାରୀ ପୁଲିସ୍ କର୍ମଚାରୀଙ୍କ ନାଁ ଚୟନ କରି କ୍ରାଇମବ୍ରାଞ୍ଚକୁ ପଠାଇଥିଲେ । ଜିଲ୍ଲା ସ୍ତରରେ ହୋଇଥିବା ଚୟନ ପ୍ରକ୍ରିୟାରେ କେତେକ ଅଫିସର ନିରାଶ ହୋଇଥିବା ଅଭିଯୋଗ ହୋଇଛି ।
ଅନ୍ୟପକ୍ଷରେ ଏସ୍ପିମାନେ ଡିସେମ୍ବରରେ ପଠାଇଥିବା ବିଟେକ୍ ଡିଗ୍ରୀଧାରୀ ପୁଲିସ୍ କର୍ମଚାରୀମାନଙ୍କ ନାଁ ଯାଞ୍ଚ ପରେ ସେଥିରୁ ଶହେ ଜଣଙ୍କ ନାଁକୁ କ୍ରାଇମବ୍ରାଞ୍ଚ ବାଛି ପରୀକ୍ଷା କରାଇଛି । ସୂଚନାଯୋଗ୍ୟ, ସାଇବର ଠକେଇ ସଂକ୍ରାନ୍ତରେ ୨୦୨୩ରେ ରାଜ୍ୟରେ ବିଭିନ୍ନ ଥାନାରେ ୧୮ ହଜାର ୯୯୪ ଅଭିଯୋଗ ହୋଇଥିବା ବେଳେ ୨୦୨୪ରେ ୪୦ ହଜାର ୨୭୦ ଅଭିଯୋଗ ହୋଇଥିଲା । ଏହି ଦୁଇ ବର୍ଷରେ ହୋଇଥିବା ଅଭିଯୋଗରୁ ପୁଲିସ୍ ମାତ୍ର ୭୬୯ଟି ମାମଲା ରୁଜୁ କରିଥିଲା । ଅଧିକାଂଶ ସାଇବର ଠକେଇ ଅଭିଯୋଗରେ ଅଭିଯୋଗକାରୀଙ୍କ ଏତଲାକୁ ପୁଲିସ୍ ଗୁରୁତ୍ୱ ଦେଉନଥିବାରୁ ସେଗୁଡ଼ିକ ପଞ୍ଜିକୃତ ହୋଇପାରୁନଥିବା ଜଣାଯାଇଛି । ଥାନା ସ୍ତରରେ ସାଇବର ଅପରାଧ ତଦନ୍ତରେ ଅଫିସରମାନଙ୍କ ଦକ୍ଷତା ନଥିବାରୁ ସେମାନେ ମାମଲା ରୁଜୁ କରି ବୋଝ ନେବାକୁ ପ୍ରସ୍ତୁତ ନାହାନ୍ତି ବୋଲି ଜଣେ ଅଧିକାରୀ କହିଛନ୍ତି ।
