ନୂଆଦିଲ୍ଲୀ ୧୫/୦୧: ଆମେରିକାର କାଲିଫର୍ଣ୍ଣିଆ ରାଜ୍ୟର ଲସ୍ ଏଞ୍ଜେଲ୍ସସ୍ଥିତ ଜଙ୍ଗଲରେ ଲାଗିଥିବା ନିଆଁ ଲିଭିବା ତ ଦୂର କଥା, ଆହୁରି ଭୟଙ୍କର ରୂପ ନେବାରେ ଲାଗିଛି । ଏହାକୁ ଉଗ୍ର ବନାଇବା ପାଇଁ କାଳ ସାଜି ମାଡ଼ି ଆସୁଛି ପବନ । ପବନର ବେଗ ଘଣ୍ଟା ପ୍ରତି ୧୨୦ କିଲୋମିଟର ରହିଛି । ବୁଧବାର ସନ୍ଧ୍ୟା ସୁଦ୍ଧା ଏହା ଲସ୍ ଏଞ୍ଜେଲ୍ସର ଦକ୍ଷିଣ-ପଶ୍ଚିମ ଜଙ୍ଗଲଗୁଡ଼ିକୁ ଧକ୍କା ଦେବ । ଫଳରେ ନିଆଁର ରୂପ ପ୍ରଚଣ୍ଡ ହୋଇ ଛାରଖାର କରିପକାଇବ । ସଦ୍ୟ ଘଟଣାରେ ସାନ୍ ଡିଏଗୋ କାଉଣ୍ଟିର ରୋମାନିଆ କମ୍ୟୁନିଟି ପାମୋ ରୋଡ୍ସ୍ଥିତ ଜଙ୍ଗଲରେ ନିଆଁ ଲାଗିଛି । ଏହାକୁ ‘ପାମୋ ଫାୟାର’ କୁହାଯାଉଛି । ଏହା ୧୦ ଏକରରେ ବ୍ୟାପିଛି ।
ଲସ୍ ଏଞ୍ଜେଲ୍ସର ବିଭିନ୍ନ ସ୍ଥାନରେ ଥିବା ଜଙ୍ଗଲଗୁଡ଼ିକରେ ଜାନୁଆରୀ ୭ରେ ନିଆଁ ଲାଗିଥିଲା । ଏହାକୁ ଲିଭାଇବା ପାଇଁ ପ୍ରାଣମୂର୍ଚ୍ଛା ଉଦ୍ୟମ ଜାରି ରହିଛି । ଏ ପର୍ଯ୍ୟନ୍ତ ଏଥିରେ ୨୪ ଜଣ ପ୍ରାଣ ହରାଇଛନ୍ତି । ସପ୍ତାହେ ବିତିଥିଲେ ସୁଦ୍ଧା ଏହାକୁ ନିୟନ୍ତ୍ରଣ କରାଯିବା ସମ୍ଭବ ହୋଇନାହିଁ । ରିପୋର୍ଟ ମୁତାବକ, ଲସ୍ ଏଞ୍ଜେଲ୍ସ ନିକଟସ୍ଥ ଦକ୍ଷିଣ-ପଶ୍ଚିମ ଏଞ୍ଜେଲ୍ସର ଏକ ବଡ଼ ଭାଗରେ ଭୀଷଣ ନିଆଁ ଲାଗିବା ଆଶଙ୍କା ରହିଛି । ଏଠାରେ ଥିବା ସାନ୍ତା ମୋନିକା ଓ ସାନ୍ତା ସୁଜାନା ପାଇଁ ବିଶେଷ ଚେତାବନୀ ଜାରି କରାଯାଇଛି । ଲସ୍ ଏଞ୍ଜେଲ୍ସର ପାଲିସେଡ୍ସ, ଇଟନ, ହର୍ଷ୍ଟ, ଲିଡିଆ ଓ କେନେଥ ଅଞ୍ଚଳରେ ନିଆଁ ଲାଗିଥିଲା । ଏହାଯୋଗୁ ପ୍ରାୟ ୧ ଲକ୍ଷ ଲୋକ ବିସ୍ଥାପିତ ହୋଇଥିଲେ । ଜଙ୍ଗଲ ନିଆଁ କ୍ରମେ ଜନବସତି ଆଡ଼କୁ ଦ୍ରୁତ ଗତିରେ ଧାବମାନ ହେଉଛି । ଏହା ଗ୍ରୋସରି ଷ୍ଟୋର, ଗ୍ୟାସ୍ ଷ୍ଟେସନକୁ ଜଳାଇବା ସହ କାର୍ଗୁଡ଼ିକୁ ପୋଡ଼ି ଛାରଖାର କରି ପକାଉଛି ।
