ନୂଆଦିଲ୍ଲୀ,୧୪/୦୧: ଦକ୍ଷିଣ ଆଫ୍ରିକାରେ ଅଘଟଣ। ବେଆଇନ ସୁନା ଖଣିରେ ଫସି ୧୦୦ ଜଣ ଶ୍ରମିକଙ୍କ ମୃତ୍ୟୁ ।ଖଣିରେ ଫସି ରହିଥିବା ଏହି ଶ୍ରମିକମାନେ ଅନେକ ମାସ ଧରି ଭୋକ ଏବଂ ଶୋଷରେ ଥିବା ବେଳ ତାଙ୍କର ମୃତ୍ୟୁ ହୋଇଛି। ଦକ୍ଷିଣ ଆଫ୍ରିକାର ଷ୍ଟିଲଫୋଣ୍ଟେନ ସହର ନିକଟସ୍ଥ ବଫେଲଫୋଣ୍ଟେନରେ ଥିବା ସୁନା ଖଣିରୁ ଏହି ଘଟଣା ସାମ୍ନାକୁ ଆସିଛି। ଏହି ଘଟଣା ସମ୍ବନ୍ଧୀୟ ସୂଚନା ଶ୍ରମିକମାନଙ୍କ ଦ୍ବାରା ମୋବାଇଲ୍ ଫୋନକୁ ପଠାଯାଇଥିବା ଭିଡିଓରୁ ମିଳିଛି। ଯେଉଁଥିରେ ପ୍ଲାଷ୍ଟିକ୍ରେ ଗୁଡ଼ାଯାଇଥିବା ମୃତଦେହ ଦେଖାଯାଉଛି ।
ମାଇନିଂ ଆଫେକ୍ଟେଡ୍ କମ୍ୟୁନିଟିଜ୍ ୟୁନାଇଟେଡ୍ ଇନ୍ ଆକ୍ସନ୍ ଗ୍ରୁପ୍ ଅନୁଯାୟୀ, ଏ ପର୍ଯ୍ୟନ୍ତ ୨୬ ଜଣ ଶ୍ରମିକଙ୍କୁ ଜୀବିତ ଉଦ୍ଧାର କରାଯାଇଛି। ସେହିପରି ୧୮ ଜଣଙ୍କ ମୃତଦେହ ବାହାର କରାଯାଇଛି। ତଥାପି, ଏହି ଖଣି ଏତେ ଗଭୀର ଯେ ସେଠାରେ ପ୍ରାୟ ୫୦୦ କର୍ମଚାରୀ ସେଠାରେ ଫସି ରହିପାରନ୍ତି। ତେବେ ଖଣିର ଗଭୀରତା ୨.୫ କିମି ବୋଲି କୁହାଯାଉଛି। ପୋଲିସ ଖଣିକୁ ସିଲ୍ କରିବାକୁ ଉଦ୍ୟମ କରିବା ପରେ ଶ୍ରମିକ ଓ ପୋଲିସ ମଧ୍ୟରେ ସଂଘର୍ଷ ହୋଇଥିଲା। ପୋଲିସ କହିଛି ଯେ ଗିରଫଦାରୀ ଭୟରେ ଶ୍ରମିକମାନେ ବାହାରକୁ ଆସୁନାହାଁନ୍ତି। ପୋଷ୍ଟ ମର୍ଟମ ରିପୋର୍ଟରେ ମୃତ୍ୟୁର ପ୍ରଥମ କାରଣ କ୍ଷୁଧା ବୋଲି କୁହାଯାଇଛି। ଖଣିରେ ଖାଦ୍ୟ ଏବଂ ଜଳ ଯୋଗାଣ ବନ୍ଦ ଥିବାରୁ ସମସ୍ତ ଶ୍ରମିକଙ୍କ ମୃତ୍ୟୁ ଘଟିଛି। ଶ୍ରମିକଙ୍କ ମୃତ୍ୟୁ ଖଣିର ସୁରକ୍ଷା ଏବଂ ପରିଚାଳନା ଉପରେ ଗୁରୁତର ପ୍ରଶ୍ନ ସୃଷ୍ଟି କରିଛି। ଦକ୍ଷିଣ ଆଫ୍ରିକାରେ ବେଆଇନ ଖଣି ଏକ ସାଧାରଣ ସମସ୍ୟା। ଯେତେବେଳେ ବଡ଼ ବଡ଼ କମ୍ପାନୀଗୁଡ଼ିକ ଖଣିଗୁଡ଼ିକୁ ଅଦରକାରୀ ଭାବି ପରିତ୍ୟାଗ କରନ୍ତି, ସେତେବେଳେ ସ୍ଥାନୀୟ ଖଣି ଶ୍ରମିକମାନେ ସେଠାରୁ ବଳକା ସୁନା ବାହାର କରିଥାନ୍ତି ।
