ଭୁବନେଶ୍ୱର,୧୧/୦୮: ଦୁଇମାସର ହୋଇଥିଲା । କ୍ଷୀର ଖାଉଥିଲା । ମା’ ଯୁଆଡେ ଯାଉଥିଲା ତା ପଛେ ପଛେ ଗୋଡ଼ାଉଥିଲା । ମା’କୁ ନ’ ଦେଖିଲେ ରଡ଼ି ଛାଡ଼ୁଥିଲା । ମା' ଯେଉଁଠି ଥିଲେ ବି ଛୁଆର ଡାକ ଶୁଣି ଧାଇଁ ଆସୁଥିଲା । ସବୁବେଳେ ମା’ ପାଖେ ପାଖେ ରହୁଥିବା ବାଛୁରୀ ଛୁଆଟି କେବେ ଭାବିନଥିଲା ଯେ ଦିନେ ସେ ଏକୁଟିଆ ହୋଇଯିବ । ଗତ ସପ୍ତାହରେ ମା’ର ମୃତ୍ୟୁ ପରେ ଏବେ ମାତୃହରା ହୋଇପଡ଼ିଛି ନିରୀହ ଛୁଆଟି । ମା'କୁ ଖୋଜିଖୋଜି ସେ ଅଥୟ ହୋଇଗଲାଣି । ସ୍ଥାନୀୟ ବଡ଼ଗଡ଼ ଇଏ କଲୋନୀରେ ଏଭଳି ଏକ ଦୁଃଖଦ ଦୃଶ୍ୟ ଦେଖିବାକୁ ମିଳିଛି । ଏକକୋମଳ ବାଛୁରୀଟି ମା' ଗାଈକୁ ହରାଇବା ଏବେ ସାରା ଅଞ୍ଚଳରେ ତାକୁ ନେଇ ଚର୍ଚ୍ଚା ଲାଗିରହିଛି । ମା' ଗାଈଟି ତାକୁ ବହୁତ ଗେହ୍ଲା କରୁଥିଲା । ମା'କୁ ନପାଇ ବାଛୁରୀଟି ଏବେ ନା ଠିକ୍ ସେ କିଛି ଖାଉଛି ନା ଶୋଉଛି । ଆଖିରୁ ଖାଲି ଲୁହ ଗଡ଼ାଉଛି ।
ଇଏ କଲୋନୀରେ ଏକ ବୁଲା ଧଳା ଗାଈଟି ରହୁଥିଲା । ୨୦୧୮ରୁ ସେ କଲୋନୀ ସାରା ବୁଲୁଥିଲା । ତାର କେହି ମାଲିକ ନଥିବାରୁ ତାକୁ ସମସ୍ତେ ଆଦର କରୁଥିଲେ ଓ ଶ୍ରଦ୍ଧାରେ ଗେହ୍ଲି ଡାକୁଥିଲେ । ଘର ହେଉ କି ଦୋକାନ ସବୁଠି ତାକୁ ଖାଇବାକୁ ମିଳୁଥିଲା । ଗତ ମେ ମାସରେ ସେ ଏକ ଅଣ୍ଡିରା ବାଛୁରୀ ଜନ୍ମ ଦେଇଥିଲା । ମା’ ଭଳି ଛୁଆକୁ ମଧ୍ୟ ସ୍ଥାନୀୟ ଲୋକେ ସ୍ନେହ, ଆଦର କରୁଥିଲେ । ପରସ୍ପରକୁ କେହି କ୍ଷଣିକ ଛାଡି ରହିପାରୁନଥିଲେ । ଗତ ଶନିବାର ହଠାତ୍ ଗେହ୍ଲିର ଶରୀର ଅସୁସ୍ଥ ହୋଇପଡ଼ିଥିଲା । ରାସ୍ତାରେ ସେ ପଡ଼ିରହି ଛଟପଟ ହେଉଥିବା ବେଳେ କଲୋନୀର ବିଶ୍ୱଜିତ ମହାପାତ୍ର ପଶୁ ଡାକ୍ତରଙ୍କୁ ଡାକିଥିଲେ । ଡାକ୍ତର ଆସି ଗାଈକୁ ଇଞ୍ଜେକସନ ଦେଇଥିଲେ । ତଥାପି ତା ଦେହ ଭଲ ହୋଇନଥିଲା । ରାତିସାରା ପଡ଼ିପଡ଼ି ରବିବାର ସକାଳେ ତାର ଜୀବନ ଚାଲିଯାଇଥିଲା ।
ଗେହ୍ଲୀର ମୃତ୍ୟୁ ଖବର ପାଇ କଲୋନୀବାସୀ ଆସି ତା ଶରୀରରେ ନାଲି ଅବିର ଓ ହଳଦି ପକାଇ ପୂଜା କରିଥିଲେ । ଏପରିକି ଖବର ଦେବା ସତ୍ତେ୍ୱ ସ୍ମାର୍ଟସିଟି ଗାଡି ମୃତଦେହ ହଟାଇନଥିଲା । ରାତି ଅଧରେ କିଛି ଯୁବକ ଅଟୋରେ ଶବ ନେଇ କଲୋନୀ ସୀମାନ୍ତରେ ପୋତିଥିଲେ । ତେବେ ଯେଉଁସ୍ଥାନରେ ଗେହ୍ଲି ପଡ଼ିଥିଲା କୁନି ବାଛୁରୀ ମଧ୍ୟ ସେଠାକୁ ଆସି ତାକୁ ଖୋଜିଥିଲା । ହେଲେ ପାଇନଥିଲା । ତା ପରଠୁ ଆଜି ପର୍ଯ୍ୟନ୍ତ ସେ ସେହି ସ୍ଥାନରେ ହିଁ ଶୋଉଛି । ବିଶ୍ୱଜିତ୍ କହିଛନ୍ତି, ମା, ଛୁଆଙ୍କ ସଂପର୍କ ହିଁ ଏମିତି । ତା ମା ଆଉ ନାହିଁ ବୋଲି ସେ ଜାଣିନି । ସେଥିପାଇଁ ଦିନସାରା ମାକୁ ଖୋଜୁଛି ରାତି ହେଲେ ମା ମରିଥିବା ସ୍ଥାନରେ ଶୋଉଛି । ଲୋକେ ତାକୁ ପେଜ, ତୋରାଣି, ରୁଟି ଖାଇବାକୁ ଦେଉଛନ୍ତି । କାଳେ ମା ଫେରିବ ସେ ଆଶାରେ ଚାହିଁବସିଛି ।
