ଜଗତସିଂହପୁର, ୧୬/୦୬ : ଘର ଭିତରୁ ସନ୍ଦେହଜନକ ଅବସ୍ଥାରେ ଯୁବକଙ୍କ ମୃତଦେହ ଉଦ୍ଧାର। ଜଗତସିଂହପୁର ଜିଲ୍ଲା ରଘୁନାଥପୁର ଥାନା ଜିରା ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି। ମୃତକ ଜଣଙ୍କ ଉକ୍ତ ଗ୍ରାମର ରାଜେନ୍ଦ୍ର ନାୟକ (୪୭ ବର୍ଷ) ବୋଲି ଜଣାପଡ଼ିଛି।
ସୂଚନାନୁଯାୟୀ, ଜିରା ଗ୍ରାମର ରାଜେନ୍ଦ୍ର ନାୟକ ବିବାହିତ ହୋଇଥିବା ସତ୍ତ୍ଵେ ତାଙ୍କର ଜଣେ ଅବିବାହିତ ଭାଇଙ୍କ ସହ ରହୁଥିଲେ। ରବିବାର ଠାରୁ ସେ ଘରୁ ବାହାରି ନଥିଲେ। ସନ୍ଦେହ ହେବାରୁ ଆଖପାଖ ଲୋକ ଘରକୁ ଯାଇ ରାଜେନ୍ଦ୍ରଙ୍କ ନିସ୍ତେଜ ଶରୀର ଦେଖି ପୁଲିସକୁ ଖବର ଦେଇଥିଲେ। ଘଟଣାସ୍ଥଳରେ ରଘୁନାଥପୁର ପୁଲିସ ପହଞ୍ଚି ମୃତଦେହ ଉଦ୍ଧାର କରି ତଦନ୍ତ ଆରମ୍ଭ କରିଛି।
ବିଷାକ୍ତ ମଦ ପାଇଁ ଏହି ଅଘଟଣ ଘଟିଥିବା ସନ୍ଦେହ କରାଯାଉଛି। ଜିରା ଅଞ୍ଚଳରେ ବହୁଳ ଭାବେ ଚୋରା ମଦ ବିକ୍ରି କରାଯାଉଥିବା ଅଭିଯୋଗ ହେଉଛି। ନିକଟରେ ତିର୍ତୋଲ ସିରସ୍ତାରେ ବିଷାକ୍ତ ମଦ ଯୋଗୁଁ ଦୁଇ ଜଣଙ୍କ ଅକାଳ ମୃତ୍ୟୁ ଘଟିଥିବା ଅଭିଯୋଗ ହୋଇଥିଲା। ହେଲେ ଏଦିଗରେ ସେଭଳି ଖୋଳତାଡ଼ ହୋଇନଥିଲା। ଅନୁରୂପ ଭାବେ କୁଜଙ୍ଗରୁ ଅପମିଶ୍ରିତ ନକଲି ମଦ ଜବତ ହୋଇଥିଲା। ଏକ୍ଷେତ୍ରରେ ବି ତଦନ୍ତ ବାଟବଣା ରହିଥିଲା। ବର୍ତ୍ତମାନ ସମୟରେ ଜିଲ୍ଲାରେ ସ୍ଥାୟୀ ଅବକାରୀ ଅଧିକ୍ଷକ କେହିନଥିବାରୁ ତଦନ୍ତ ବାଟବଣା ହେଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି।
